JINGPYNPAW 18 - Khasi CL Bible (BSI)

Ka jingkyllon jong ka Babilon

¹ Hadien kane nga la ïohi ïa uwei pat u angel uba wan hiar na bneng. U la don ka bor bakhraw, bad ka jingphyrnai jong u ka la pynthaba ïa ka pyrthei baroh kawei.

² U la pyrta ha ka sur kaba jam: “Ka la kyllon! Ka Babilon Bakhraw ka la kyllon! Mynta ka la long ka jaka shong ki ksuid bad ki mynsiem bymkhuid; baroh ki jait sim kiba jakhlia bad kiba isaitmet ki shong ha ka.

³ Naba ki jaitbynriew baroh ki la dih ïa ka waiñ jong ka — ka waiñ bakhor jong ka jingkwah brai awria jong ka. Ki syiem jong ka pyrthei ki la ïaleh awria bad ka, bad ki nongkhaïi jong ka pyrthei ki la kiew spah bha na ka jingkwah brai bym lah teh lakam jong ka.”

⁴ Nangta nga la ïohsngew ïa kawei pat ka sur na bneng, ka da ong, “To mihnoh, ko ki briew jong nga! To mihnoh na ka! Phim dei ban ïashim bynta ha ki pop jong ka; phim dei ban ïoh bynta ha ka jingshah pynshitom jong ka!

⁵ Naba ïa ki pop jong ka la kynton shajrong kat shaduh bneng, bad U Blei u kynmaw ïa ki kam bymman jong ka.

⁶ Leh ïa ka thik kumba ka la leh ïa phi; siew kylliang ar shah ïa ka na ka bynta baroh kaba ka la leh. Pyndap ïa ka khuri jong ka da ka jingdih kaba ar shah ka jingkhor kum ka jingdih kaba ka la pynkhreh na ka bynta jong phi.

⁷ To ai ha ka, katta ka jingshitom bad ka jingsngewsih kat ka burom bad ka jingpahuh kaba ka la ai ïa lade. Naba ka ïai-ong ïa lade: ‘Hangne nga shong, ka syiem! Ngam long ka riewkynthei, ngan ym tip ïa ka jingsngewsih!’

⁸ Namar kane, ha ka shi sngi yn sa shoh ïa ka da ki khlam — ka jingpang, ka jingsngewsih bad ka 'nemsniew. Bad yn thang ïa ka da ka ding, namar ba U Trai uba U Blei, uba bishar ïa ka, u long uba khlaiñbor.”

⁹ Ki syiem jong ka pyrthei kiba la ïashim bynta ha ka jingawria bad ka jingkwah brai jong ka kin lynñiar bad ïam na ka bynta ka nongbah haba ki ïohi ïa ka tdem na ki thylliej ding kiba bam duh ïa ka.

¹⁰ Kin ïeng jngai bah na ka, namar ba ki sheptieng ban ïoh bynta ha ki jingshitom jong ka. Ki ong, “Katno kaba ishyrkhei! Katno kaba itriem! Kane ka nongbah Babilon kaba khraw bad kaba khlaiñbor! Tang hapoh shi kynta pha la shah pynshitom!”

¹¹ Ki nongkhaïi jong ka pyrthei ruh kin ïam bad ïambriew na ka bynta jong ka, namar ba ym don shuh mano mano ban thied ïa ki mar jong ki;

¹² ym don mano mano ban thied ïa ka ksiar, ka rupa, ki mawkordor, bad ki paila jong ki; ki mar linen, ka jaiñ sawbthuh, ka jaiñ rusom, bad ka jaiñ basaw hain hain; ïa baroh ki jait dieng bakynsai bad baroh ki jait jingthaw ba la shna na ka bniat hati bad na ka dieng baremdor, na ka rnong, ka nar, bad u maw marbl;

¹³ bad ïa ka siasia, ki musla, ïa ka jingiwbih, ka mirr, bad ka jingiwbih remdor; ïa ka waiñ bad ka umphniang Olib, ïa u 'purew bad u kew, ïa ki jingri bad ki langbrot, ïa ki kulai bad ki kali kulai, ïa ki mraw bad wat ïa ki mynsiem briew ruh.

¹⁴ Ki nongkhaïi ki ong ha ka, “Baroh kiei kiei kiba bha kiba pha la angnud ban ïoh ki la jah noh, bad baroh ka spah jong pha bad ka rong phong jong pha ki la leit noh, phan ym shem shuh ïa ki!”

¹⁵ Ki nongkhaïi, kiba la kylla riewspah na kaba ïakhaïi ha kata ka nongbah, kin ïeng sha jngai bah, namar ki sngewsheptieng ban ïoh bynta lem na ki jingshitom jong ka. Kin lynñiar bad ïambriew, bad ong,

¹⁶ “Katno kaba ishyrkhei! Katno kaba itriem ïa ka nongbah kaba khraw! Ka la ju riam ïa lade da ki jaiñ linen, kiba sawbthuh, bad kiba saw hain hain, bad ka kup ïa lade da ki jingdeng ksiar, ki mawkordor, bad ki paila!

¹⁷ Bad ha ka shi kynta ka la duh lut ïa kane ka spah!” Baroh ki kapten jong ki liengbah bad ki nongshong lieng, ki maji bad baroh kiwei pat kiba la ïoh kamai na ka duriaw, ki la ïeng na sha jngai bah,

¹⁸ bad ki la lynñiar jam haba ki la ïohi ïa ka tdem na ki thylliej dieng kiba la bam duh ïa ka: “Ym pat ju don kawei pat ka nongbah kum kane ka nongbah kaba khraw!”

¹⁹ Ki la kynting pui pui halor ki khlieh jong ki, ki la lynñiar bad ki la ïambriew, da kaba ong, “Katno kaba shyrkhei! Katno kaba itriem ïa ka nongbah kaba khraw! Ka long ka nongbah ha kaba baroh kiba don ki liengbah kiba ïaid ha ki duriaw ki la kylla riewspah ha ka spah jong ka! Bad ha ka shi kynta ka la duh lut ïa kiei kiei baroh!”

²⁰ To shadkmen, ko ka bneng, namar ka jingpynjot ïa ka! to shadkmen, ko ki briew jong U Blei bad ki apostol bad ki nongïathuhlypa! Naba U Blei u la pynrem ïa ka na ka bynta kaei kaba ka la leh ïa phi!

²¹ Nangta u angel bakhlaiñbor u la shim ïa u maw uba heh la kat u mawtylliat baheh bad u la kawang ïa u sha ka duriaw, da kaba ong, “Kane ka long kumno ïa ka nongbah Babilon bakhraw yn pynkhyllem ha ka borbah bad yn ym ïohi shuh ïa ka da lei lei.

²² Ïa ka sur jingtem jong ki duitara bad ka sur jong ki nongrwai, jong ki nongput ïa ka tangmuri bad ïa ka turoi, yn ym ïohsngew shuh ha pha! Ïa uno uno u nongtrei ha kano kano ka kam yn ym shem shuh ha pha; bad ïa ka jingsawa jong u mawtylliat yn ym ïohsngew shuh!

²³ Ïa ka jingshai ka sharak yn ym ïohi shuh da lei lei ha pha; ïa ka sur u nongleitkurim bad ka nongleitkurim yn ym ïohsngew shuh ha pha! Ki nongkhaïi jong pha ki la long kiba donbor tam ha ka pyrthei baroh, bad da ka myntor balamler pha la shukor ïa ki briew baroh jong ka pyrthei!”

²⁴ Ïa ka Babilon la pynshitom namar ïa ka snam jong ki nongïathuhlypa bad jong ki briew jong U Blei la shem hapoh ka nongbah; ho-oid, ka snam jong kito baroh kiba la shah pynïap ha ka pyrthei.