JINGPYNPAW 17 - Khasi CL Bible (BSI)

Ka nuti bapawnam

¹ Nangta uwei na kita ki hynñiew ngut ki angel kiba la don ïa ki hynñiew tylli ki pliang, u la wan sha nga bad u la ong, “Ale, ngan pyn-i ha me ba kumno yn pynshitom ïa ka nuti bapawnam, kata ka nongbah bakhraw ïa kaba la tei hajan ki wah babun.

² Ki syiem jong ka pyrthei ki la ïaleh awria bad ka, bad ki briew jong ka pyrthei ki la buaid na kaba dih ïa ka waiñ jong ka jingawria jong ka.”

³ U Mynsiem u la bat synshar ïa nga, bad u angel u la rah ïa nga sha ka ri shyiap. Hangta nga la ïohi ïa ka briew kaba shong halor u mradkhlaw rong saw uba la don ki kyrteng kiba ñiewbeiñ ïa U Blei ba la thoh baroh shi rynïeng jong u; u mradkhlaw u la don hynñiew tylli ki khlieh bad shiphew tylli ki reng.

⁴ Kata ka briew ka la riam ha ki jaiñ ba sawbthuh bad basaw hain hain, bad ba la tap da ki jingdeng ksiar, ki mawkordor, bad ki paila. Ha ka kti jong ka, ka la bat ïa ka khuri ksiar kaba dap da kiei kiei kiba isaitmet bad ijakhlia, kiba mih na ka jingawria jong ka.

⁵ Ha ka shyllangmat jong ka, la thoh ïa ka kyrteng kaba don ka jingmut kaba rieh: “Ka Babilon Bakhraw, ka kmie jong ki nuti baroh bad kiba sakma baroh ha ka pyrthei.”

⁶ Bad nga la ïohi ïa kata ka briew ba ka la buaid da ka snam jong ki briew jong U Blei, bad da ka snam jong kito kiba la shah pynïap namar ba ki la ïaineh skhem ha U Jisu. Haba nga la ïohi ïa ka, nga la sngewkyndit shikatdei eh.

⁷ “Balei ba me la sngewkyndit?” u angel u la kylli ïa nga. “Ngan ïathuh ha me ïa ka jingmut barieh jong kata ka briew, bad jong u mradkhlaw uba kit ïa ka, uta u mradkhlaw uba don hynñiew tylli ki khlieh bad shiphew tylli ki reng.

⁸ Uta u mradkhlaw u la ju im shisien, hynrei um shym im shuh; u la jan wan kiew na ka liewlong khlem trai bad un mih ban shah pynjot. Ki briew kiba shong ha ka pyrthei kiba ïa ki kyrteng jong ki ym shym la thoh ha ka kitab jong kiba im ha shuwa ban pynlong ïa ka pyrthei, kin ïasngew kyndit lut katba ki dang khmih ïa u mradkhlaw. U la ju im shisien; mynta um shym im shuh, hynrei un wan mih biang.

⁹ “Kane ka khot ïa ka jingstad bad jingshemphang. Ki hynñiew tylli ki khlieh ki long hynñiew tylli ki lum, ha kiba kata ka briew ka shong. Ki long ruh ki hynñiew ngut ki syiem:

¹⁰ San ngut na ki, ki la kyllon, uwei u dang synshar, bad uwei pat um pat wan; haba u wan, u dei ban synshar tang shipor.

¹¹ Bad u mradkhlaw uba la ju im shisien, hynrei u bym shym im shuh, u dei hi u syiem uba phra uba long uwei na ki hynñiew ngut bad u mihnoh ban shah pynjot.

¹² “Ki shiphew tylli ki reng kiba me la ïohi ki long ki shiphew ngut ki syiem ki bym pat shym la sdang ban synshar, hynrei ki ban sa ïoh ka iktiar ban synshar kum ki syiem tang shi kynta bad u mradkhlaw.

¹³ Kine baroh shiphew ngut ki don kajuh ka jingthmu, bad ki ai ïa ka bor bad ka iktiar jong ki ha u mradkhlaw.

¹⁴ Kin ïaleh pyrshah ïa U Khunlangbrot; hynrei U Khunlangbrot, lem bad ki nongbud jong u ïa kiba u la khot, u la jied, bad kiba ïaineh skhem, un jop ïa ki, namar ba u dei U Trai jong ki trai bad U Syiem jong ki syiem.”

¹⁵ U angel u la ong ruh ha nga, “Ki um ïa kiba me la ïohi, ha kaba kata ka nuti ka shong, ki long ki jaitbynriew, ki paidlang, ki kynja bynriew bad ki jait ktien.

¹⁶ Ki shiphew tylli ki reng kiba me la ïohi, bad u mradkhlaw, kin isih ïa ka nuti; kin sa knieh noh ïa kaei kaei baroh kaba ka don bad kin iehnoh lyngkhuit ïa ka; kin bam ïa ka doh jong ka bad kin pynjot ïa ka da ka ding.

¹⁷ Naba U Blei u la buh ha ki dohnud jong ki ïa ka mon ban pyndep ïa ka jingthmu jong u da kaba ïatreilang bad da kaba ai ha u mradkhlaw ïa ka bor jong ki ban synshar tad ynda ki ktien jong U Blei ki wan urlong shisha.

¹⁸ “Ka briew kaba me la ïohi ka long ka nongbah bakhraw kaba synshar halor ki syiem jong ka pyrthei.”