JINGPYNPAW 16 - Khasi CL Bible (BSI)

Ki pliang ka jingbitar U Blei

¹ Nangta nga la ïohsngew ïa ka sur kaba jam kaba kren na ka Templ, ha ki hynñiew ngut ki angel: “Khie leit bad theh noh ïa ki hynñiew tylli ki pliang jong ka jingbitar U Blei ha ka pyrthei!”

² U angel uba nyngkong u la leit bad u la theh noh ïa ka pliang jong u ha ka pyrthei. Ki prum kiba shyrkhei bad kiba tyrha ki la mih ha kito kiba la don ïa ka shab jong u mradkhlaw bad ha kito kiba la mane ïa ka dur jong u.

³ Nangta u angel uba ar u la theh noh ïa ka pliang jong u ha ka duriaw. Ka um ka la kylla long kum ka snam jong u briew uba ïap, bad uwei pa uwei u jingthaw ba-im hapoh duriaw u la ïap.

⁴ U angel uba lai u la theh noh ïa ka pliang jong u ha ki wah bad ha ki umpohliew, bad ki la kylla snam.

⁵ Nga la ïohsngew ïa u angel uba dei khmih ïa ki um ba u ong, “Ki jingbishar kiba me la pynlong ki long kiba hok, A Uba Khuid, me uba long bad uba la long!

⁶ Ki la theh noh ïa ka snam jong ki briew jong U Blei bad jong ki nongïathuhlypa, bad kumta me la ai ha ki ïa ka snam ban dih. Ki la ïoh ïa kaba ki dei hok ban ïoh!”

⁷ Nangta nga la ïohsngew ïa ka sur na ka duwan kaba ong, “Ko Trai uba U Blei Badonbor Baroh! Kaba shisha bad kaba hok ki long da shisha ki jingbishar jong me!”

⁸ Nangta u angel uba saw u la theh noh ïa ka pliang jong u ha ka sngi, bad la shah ïa ka ban thang ïa ki briew da jingshit tyrha bajur jong ka.

⁹ La thang ïa ki da ka jingshit tyrha kaba jur, bad ki la tim ïa ka kyrteng jong U Blei, uba don ka bor halor kine ki khlam. Hynrei kim shym phai noh na ki pop jong ki bad ïaroh ïa ka jingkhraw jong u.

¹⁰ Nangta u angel uba san u la theh noh ïa ka pliang jong u ha ka khet jong u mradkhlaw. Ka jingdum ka la tap ïa ka hima jong u mradkhlaw, bad ki briew ki la dait ïa la ki thylliej namar ka jingpang jong ki,

¹¹ bad ki la tim ïa U Blei jong ka bneng namar ki jingpang bad ki prum jong ki. Hynrei kim shym la phai noh na ki lynti basniew jong ki.

¹² Nangta u angel uba hynriew u la theh noh ïa ka pliang jong u ha ka wahbah Ïuphratis. Ka wah ka la rngad, ban pynbiang ka lynti ïa ki syiem kiba wan na mihngi.

¹³ Nangta nga la ïohi lai tylli ki mynsiem bymkhuid kiba i kum ki jakoid. Ki la ïamih na ka shyntur jong u Ïakjakor, na ka shyntur jong u mradkhlaw, bad na ka shyntur jong u nongïathuhlypa balamler.

¹⁴ Ki long ki mynsiem jong ki ksuid kiba leh ïa ki kambah. Kine lai tylli ki mynsiem ki leit noh sha ki syiem baroh jong ka pyrthei, ban lumlang ïa ki na ka bynta ka thma ha ka Sngi kaba khraw jong U Blei Badonbor Baroh.

¹⁵ “To shahshkor! Nga wan kum u nongtuh! Suk uta uba peitmat bad uba sumar ïa la ki jaiñkup, khnang ba un ym ïaid lyngkhuit kylleng bad shah pynlehrain ha khmat ki briew!”

¹⁶ Nangta ki mynsiem ki la wallam lang ïa ki syiem ha ka jaka kaba ha ka ktien Hebru la khot “Ka Armageddon.”

¹⁷ Nangta u angel uba hynñiew u la theh noh ïa ka pliang jong u ha suiñ. Ka sur kaba jam ka la wan na ka khet kaba ha ka templ, ka da ong, “La pyndep!”

¹⁸ La don ki jingthaba leilieh, ki jingkyrhuh bad jingtied pyrthat, bad u jumai uba shyrkhei. Ym pat ju don kum uta u jumai naduh ba la thaw ïa u khunbynriew; une u la long u jumai uba jur tam na baroh!

¹⁹ Ïa ka nongbah kaba khraw la kad ha ki lai bynta, bad ïa ki nongbah jong ki ri baroh la pynjot. U Blei u la kynmaw ïa ka Babilon bakhraw bad u la pynlong ïa ka ban dih ïa ka waiñ na ka khuri jong u — ka waiñ jong ka jingbitar shla jong u.

²⁰ Baroh ki dewlynnong ki la jah, baroh ki lumbah kim don shuh.

²¹ Ki phria kiba heh, uwei uwei uba khia kat sanphew kilo, ki la hap na sahit bneng ha ki briew, kiba la tim ïa U Blei namar ka khlam jong u phria, namar ka la long ka khlam kaba shyrkhei eh.