JINGPYNPAW 15 - Khasi CL Bible (BSI)

Ki angel bad ki khlam kiba khatduh

¹ Nangta nga la ïohi ha ka suiñbneng ïa kawei pat ka jingïohi kaba maïan, kaba khraw bad kaba iphylla. La don hynñiew ngut ki angel lem bad hynñiew tylli ki khlam, kiba long kiba khatduh, namar ki long ki jingpynpaw kiba khatduh jong ka jingbitar U Blei.

² Nangta nga la ïohi ïa kaei kaba i kum ka ïit bakhraw kaba la khleh lang bad ka ding. Nga la ïohi ruh ïa kito kiba la jop ïa u mradkhlaw bad ïa ka dur jong u bad ïa uta uba ka kyrteng jong u la mihkhmat da u dak jingkheiñ. Ki la ïeng hajan ka ïit bakhraw, ki da bat ïa ki duitara kiba U Blei u la ai ha ki

³ bad ki da rwai ïa ka jingrwai u Moses, u shakri jong U Blei, bad ïa ka jingrwai U Khunlangbrot: “U Trai uba U Blei Badonbor Baroh, katno kiba khraw bad kiba phylla long ki kam jong me! U Syiem jong ki jaitbynriew, katno kiba dei bad kiba shisha ki long lynti jong me!

⁴ Uei u ban ym ïeng ha ka jingtiengburom ïa me, A Trai? Uei u ban kyntait ban pynbna ïa ka jingkhraw jong me? Tang ma me hi uba khuid. Baroh ki jaitbynriew kin wan bad mane ïa me, namar ïa ki jingleh bahok jong me la ïohi da baroh.”

⁵ Hadien kane nga la ïohi ïa ka templ ha bneng ba ka plie, lem bad ka Ïingjaiñ ka Jingdon Ryngkat U Blei hapoh jong ka.

⁶ Ki hynñiew ki angel kiba la don ïa ki hynñiew tylli ki khlam ki la mihnoh na ka Templ, kiba la kup da ki jaiñ linen ba-thaba kiba khuid lem bad ki panpoh ksiar ba la teh sawdong ki shadem jong ki.

⁷ Nangta uwei na ki saw tylli ki kherub u la ai ha ki hynñiew ngut ki angel ïa ki hynñiew tylli ki pliang ksiar ba la pyndap da ka jingbitar jong U Blei, uba im junom la junom.

⁸ Ïa ka templ la pyndap da ka tdem na ka burom bad ka bor jong U Blei, bad ym don mano mano ba lah ban leit shapoh ka templ tad haduh ba ki hynñiew tylli ki khlam ba la wanrah da ki hynñiew ngut ki angel, ki la poi sha kaba kut.