JINGPYNPAW 14 - Khasi CL Bible (BSI)

U Khunlangbrot bad ki briew jong u

¹ Te nga la peit, bad la don U Khunlangbrot uba ïeng halor u lum Seïon; lem bad u la don shi lakh sawphew saw hajar ngut ki briew kiba la don ïa ka kyrteng jong u, bad ïa ka kyrteng jong U Kpa jong u ïa kaba la thoh ha ki shyllangmat jong ki.

² Bad nga la ïohsngew ïa ka sur na bneng kaba sawa kum ka jingkyrhuh jong ka kshaid, bad kum ka jingtied jam jong u pyrthat. Ka sawa kum ka sur jingtem ba la tem da ki nongtem kiba tem ïa la ki duitara.

³ Ki shi lakh sawphew saw hajar ngut ki briew ki la ïeng ha khmat ka khet, ha khmat ki saw tylli ki jingthaw ba-im, bad ha khmat ki nongsharai balang; ki la ïarwai ïa ka jingrwai kaba thymmai, kaba tang ma ki hi ki lah ban nang. Na ki bynriew baroh, ki long tang ma ki, kiba la siewspah.

⁴ Ki long ki rangbah kiba la ri khuid ïa lade khlem ïathiah shongkha bad ki kynthei; ki long ki rangsotti. Ki bud ïa U Khunlangbrot kat shaba u leit. La siewspah ïa ki napdeng u khunbynriew bad ki long kiba nyngkong ïa kiba la ainguh ha U Blei bad ha u Khunlangbrot.

⁵ Ym ju lap ïa ki ba ki ïathuh lamler; ki long kiba khlem thohbria.

Ki lai ngut ki angel

⁶ Nangta nga la ïohi ïa uwei pat u angel uba her shajrong eh ha suiñ, lem bad ka khubor bymjukut jong ka Khubor Babha ban pynbna ha ki briew ka pyrthei, ha kawei pa kawei ka jaitbynriew, ka jait, ka ktien bad ka kynja bynriew.

⁷ U la kren ha ka sur kaba jam, “To pyndonburom ïa U Blei bad to ïaroh ïa ka jingkhraw jong u! Naba ka por ka la poi ïa u ba un bishar ïa u khunbynriew. To mane ïa uta uba la thaw ïa ka bneng, ïa ka khyndew, ïa ka duriaw bad ïa ki umpohliew!”

⁸ U angel uba ar u la bud ïa uba nyngkong, u da ong, “Ka la kyllon! Ka Babilon Bakhraw ka la kyllon! Ka la pynlong ïa ki briew baroh ban dih ïa ka waiñ jong ka — ka waiñ kaba khor jong ka jingkwah brai khlem akor!”

⁹ U angel uba lai u la bud ïa ki ar ngut ki angel kiba sha khmat, da kaba kren ha ka sur kaba jam, “Uno uno u mane ïa u mradkhlaw bad ïa ka dur jong u bad pdiang ïa ka shab ha ka shyllangmat jong u lane ha ka kti jong u,

¹⁰ u hi da lade un dih ïa ka waiñ ka jong U Blei, ka waiñ ka jingbitar shla jong U, kaba u la theh noh ha ka bor jong ka baroh ha ka khuri ka jingbitar jong U! Baroh kiba leh ïa kane kin shah pynsaja ha ka ding bad ha u kyndok ha khmat ki angel bakhuid bad ha khmat U Khunlangbrot.

¹¹ Ka tdem jong ka ding kaba pynsaja ïa ki ka kiew shajrong junom la junom. Ym don jingtngen mynsngi ne mynmiet ïa kito kiba mane ïa u mradkhlaw bad ïa ka dur jong u, ïa uno uno uba don ïa ka shab jong ka kyrteng jong u mradkhlaw.”

¹² Kane ka khot ïa ka jingïaishah ha ka liang ki briew jong U Blei, kito kiba kohnguh ïa ki hukum jong U Blei bad kiba ïaineh ha U Jisu.

¹³ Nangta nga la ïohsngew ïa ka sur na bneng kaba ong, “To thoh ïa kane: Suk kito kiba naduh mynta ki ïap ha kaba shakri ïa U Trai!” “Ho-oid shisha!” U Mynsiem u jubab. “Kin ïoh shongthait na ki jingtrei shitom jong ki, namar ki soh ka jingshakri jong ki, ki leit lem bad ki.”

Ka aïom ot ka pyrthei

¹⁴ Nangta nga la khmih, bad la don u lyoh uba lieh, bad uba shong halor u lyoh u la long uta uba i kum u briew, uba don ka pansngiat ksiar halor ka khlieh jong u bad ka rashi kaba nep ha ka kti jong u.

¹⁵ Nangta uwei pat u angel u la wan mihnoh na ka Templ bad u la pyrta da ka sur kaba jam sha uta uba shong halor u lyoh, “To pyndonkam ïa la ka rashi bad to ot ïa ka jingot, namar ka por ka la poi; ka pyrthei ka la ih na ka bynta ka jingot!”

¹⁶ Te uta uba shong halor u lyoh u la pyndonkam ïa la ka rashi ha ka pyrthei, bad la ïohlum ïa ka jingot jong ka pyrthei.

¹⁷ Nangta nga la ïohi ïa uwei pat u angel ba u wan mihnoh na ka Templ ha bneng, bad u ruh u la don ka rashi kaba nep.

¹⁸ Nangta sa uwei pat u angel, uba dei khmih ïa ka ding, u la wan na ka duwan. U la pyrta ha ka sur kaba jam sha uta u angel uba la don ka rashi kaba nep, “To pyndonkam ïa la ka rashi, bad ot ïa ki sohwaiñ na ka bri sohwaiñ jong ka pyrthei, namar ba ki sohwaiñ ki la ih!”

¹⁹ Kumta u angel u la pyndonkam ïa la ka rashi ha ka pyrthei, u la ot ïa ki sohwaiñ na uta u dieng sohwaiñ, bad u la bret ïa ki sha ka jaka khñiot waiñ jong ka jingbitar shla jong U Blei.

²⁰ Ïa ki sohwaiñ la khñiot ha ka jaka khñiot waiñ shabar ka nongbah, bad ka snam ka la mihnoh na ka jaka khñiot waiñ ha ka jingshlei kumba laispah kilomitar ka jingjrong bad la jan ar mitar ka jingjylliew.