JINGPYNPAW 13 - Khasi CL Bible (BSI)

Ki ar tylli ki mradkhlaw

¹ Nangta nga la ïohi ïa uwei u mradkhlaw uba wan mih na duriaw. U la don shiphew tylli ki reng bad hynñiew tylli ki khlieh; halor kawei pa kawei jong ki reng jong ka, la don ka pansngiat, bad halor kawei pa kawei jong ki khlieh jong ka la don ka kyrteng kaba krenbeiñ Blei.

² Uta u mradkhlaw u ïasyriem ïa u 'labasa, bad ki kjat kum ki kjat dngiem bad ka shyntur u kum ka shyntur sing. U Ïakjakor u la ai ha u mradkhlaw ïa ka bor jong u hi, ïa ka khet jong u, bad ïa ka bor synshar baïar jong u.

³ Kawei na ki khlieh jong uta u mradkhlaw ka i kumba ka la shah pynmong jur, hynrei ka jingmong ka la ïohkhiah. Ka pyrthei baroh kawei ka la sngewphylla bad ka la bud ïa uta u mradkhlaw.

⁴ Uwei pa uwei u la mane ïa u Ïakjakor namar ba u la ai ïa la ka bor synshar ha uta u mradkhlaw. Ki la mane ruh ïa uta u mradkhlaw, bad ki la ong, “Uei uba kum u mradkhlaw? Uei uba lah ban ïaleh pyrshah ïa u?”

⁵ Ïa u mradkhlaw la shah ban pynlong ki jingkob sarong kiba long ki jingbeiñ ïa U Blei, bad la shah ïa u ban don ka bor synshar haduh sawphew ar bnai.

⁶ U la sdang ban tim ïa U Blei, ïa ka kyrteng jong u, ïa ka jaka shong jong u, bad ïa kito baroh kiba shong ha bneng.

⁷ La shah ïa u ban ïaleh pyrshah ïa ki briew jong U Blei bad ban jop ïa ki, bad la ai ha u ïa ka bor halor kawei pa kawei ka jaitbynriew, ka hima, ka ktien bad halor u bynriew baïapher.

⁸ Baroh ki briew kiba shong ha ka pyrthei kin mane ïa u, lait noh ïa kito kiba ïa ki kyrteng jong ki la thoh ha shuwa ka jingpynlong ïa ka pyrthei ha ka kitab jong kiba im kiba dei ki jong uta U Khunlangbrot ïa uba la shah pynïap.

⁹ “To shahshkor, te, lada phi don ki shkor!

¹⁰ Uno uno uba dei ban shah kem un shah kem da shisha; uno uno uba dei ban shah pynïap da ka waitlam un shah pynïap shisha da ka waitlam. Kane ka dawa ïa ka jingïaishah bad ïa ka jingngeit na ka liang jong ki briew jong U Blei.”

¹¹ Nangta nga la ïohi sa uwei pat u mradkhlaw, uba la wan kiew napoh ka khyndew. U la don ar tylli ki reng kum ki jong u khunlangbrot, bad u la kren kum u Ïakjakor.

¹² U la pyndonkam ïa ka bor synshar baïar jong u mradkhlaw uba nyngkong ha ka jingdon ryngkat jong u. U la pynbor ïa ka pyrthei bad ïa baroh kiba shong ha ka ban mane ïa u mradkhlaw uba nyngkong, uba ka jingmynsaw jong u ka la ïohkhiah.

¹³ Une u mradkhlaw uba ar, u la leh ki kambah kiba khraw; u la pynlong ïa ka ding ban wan hiar na bneng sha ka pyrthei ha ka jingïohi jong uwei pa uwei baroh.

¹⁴ Bad u la shukor ïa ki briew baroh kiba im ha ka pyrthei da ki kambah ïa kiba la shah ïa u ban leh ha khmat jong uta u mradkhlaw uba nyngkong. U mradkhlaw u la ong ïa ki ban tei ka durblei ha ka jingpyndonburom ïa u mradkhlaw ïa uba la shah pynmynsaw da ka waitlam bad pynban uba dang im.

¹⁵ La shah ïa u mradkhlaw uba ar ban pyrsad jingim ha kata ka dur jong u mradkhlaw uba nyngkong, khnang ba ka durblei ka lah ban kren bad pynïap ïa kito baroh ki ban ym mane ïa ka.

¹⁶ U mradkhlaw u la pynbor ïa ki briew baroh, kiba rit bad kiba khraw, kiba riewspah bad kiba duk, ki mraw bad kiba laitluid, ban don ka shab ïa kaba la buh ha ki kti kamon jong ki lane ha ki shyllangmat jong ki.

¹⁷ Ym don mano mano ba lah ban thied ne die khlem don kane ka shab, kaba long, ka kyrteng jong u mradkhlaw lane u dak jingkheiñ uba ïeng na ka bynta ka kyrteng jong u.

¹⁸ Kane ka dawa ïa ka jingstad. Uno uno uba shemphang u lah ban batai ïa ka jingmut jong u dak jingkheiñ jong u mradkhlaw, namar u dak jingkheiñ u ïeng na ka bynta ka kyrteng jong u briew. U dak jingkheiñ jong kata ka kyrteng u long hynriewspah hynriewphew hynriew.