JINGPYNPAW 12 - Khasi CL Bible (BSI)

Ka briew bad u Ïakjakor

¹ Nangta ka dak kaba khraw bad kaba maïan ka la paw ha ka sahit bneng. La don ka briew, kaba ka jaiñphong jong ka, ka long ka sngi bad kaba don u bnai hapoh ki kjat jong ka bad ka pansngiat ki khat-ar tylli ki khlur halor ka khlieh jong ka.

² Ka la jan ban kha khun, bad ki jingsuh bad ki jingjynjar jong ka jingkha khun ki pynlong ïa ka ban kyang jam.

³ Sa kawei pat ka dak bamaïan ka la paw ha ka sahit bneng. La don u Ïakjakor uba heh bad uba rong saw uba don hynñiew tylli ki khlieh bad shiphew tylli ki reng, bad kawei ka pansngiat ha kawei pa kawei jong ki khlieh jong u.

⁴ Da u tdong jong u, u la patan na ka sahit bneng ïa shi bynta na ki lai bynta ki khlur bad u la bret arsut ïa ki sha ka khyndew. U la ïeng ha khmat jong kata ka briew, khnang ban bam ïa u khunlung jong ka tang mar ïa kha ïa u.

⁵ Te ka la kha khun shynrang, u ban synshar halor ki jaitbynriew baroh da u diengduh nar. Hynrei la knieh noh ïa u khunlung bad la leit rah sha U Blei bad sha ka khet jong u.

⁶ Kata ka briew ka la phet sha ka ri shyiap, sha ka jaka ba U Blei u la pynkhreh na ka bynta jong ka; ha kaba yn sumar ïa ka haduh shihajar arspah hynriewphew sngi.

⁷ Nangta ka thma ka la khie ha bneng. U Mikhael bad ki angel jong u ki la ïaleh pyrshah ïa u Ïakjakor, uba la ïaleh kylliang lem bad ki angel jong u;

⁸ hynrei la jop ïa u Ïakjakor, bad ïa u lem bad ki angel jong u ym shym shah shuh ban shong ban sah ha bneng.

⁹ Ïa u Ïakjakor uba heh la bret shabar — ïa uta u bseiñ na mynbarim, ïa uba la khot u Ksuid, lane u Soitan, uta uba la shukor ïa ka pyrthei baroh kawei. La bret arsut ïa u sha ka khyndew, bad ïa ki angel baroh jong u lem bad u.

¹⁰ Nangta nga la ïohsngew ïa ka sur bajam ha bneng kaba ong, “Mynta ka jingpynim jong U Blei ka la wan! Mynta U Blei u la pyn-i ïa ka bor jong u kum u Syiem! Mynta U Messaïah jong u, u la pyn-i ïa la ka bor! Naba ïa uta uba la ïeng ha khmat jong U Blei jong ngi bad uba la mudui ïa ki hynmen ki para jong ngi mynsngi bad mynmiet la bret shabar jong ka bneng.

¹¹ Ki hynmen ki para jong ngi ki la ïoh ka jingjop halor jong u da ka snam jong U Khunlangbrot bad da ka jingshisha kaba ki la pynbna; bad ki la mon bad aiti ïa la ka jingim bad ban ïap.

¹² Bad kumta to shadkmen, phi ki bneng, bad phi baroh kiba shong basah hangta! Hynrei katno ka long kaba kordit ïa kata ka khyndew bad ïa ka duriaw! Naba u Ksuid u la wan hiar ha phi, bad ïa u la pyndap da ka jingbitar shla, namar ba u tip ba u don sa tang khyndiat ka por.”

¹³ Haba u Ïakjakor u la sngewthuh ba u la shah bret noh arsut sha ka khyndew, u la sdang ban thwet ïa kata ka briew kaba la kha khun shynrang.

¹⁴ La ai ha ka, ar tylli ki thapniang jong u pukni uba heh khnang ba kan her noh sha la ka jaka ha kata ka ri shyiap, ha kaba yn sumar ïa ka, lai snem shiteng, ha ka jingshngain na ka jingtur ïaleh jong u Ïakjakor.

¹⁵ Bad nangta na ka shyntur jong u, u Ïakjakor u la theh noh ïa jingshlei um nadien jong kata ka briew, khnang ba yn kit noh ïa ka.

¹⁶ Hynrei ka khyndew ka la ïarap ïa kata ka briew; ka la ang ïa la ka shyntur bad ka la nguid ïa ka um kaba la wan tuid na ka shyntur jong u Ïakjakor.

¹⁷ U Ïakjakor u la bitar shla ïa kata ka briew bad u la leit noh ban ïaleh pyrshah ïa ki khun ki ksiew jong ka kiba dang sah, ïa baroh kito kiba kohnguh ïa ki hukum jong U Blei bad kiba ïaineh ha ka jingshisha ïa kaba U Jisu u la pynpaw.

¹⁸ Bad u Ïakjakor u la ïeng ha ka rud duriaw.