JINGPYNPAW 11 - Khasi CL Bible (BSI)

Ki ar ngut ki sakhi

¹ La ai ha nga ïa u dieng uba syriem ïa u diengthew, bad la ong ïa nga, “Khie leit bad thew ïa ka Templ U Blei bad ïa ka duwan, bad ñiew ïa kito kiba mane ha ka templ.

² Hynrei wat thew ïa ki phyllaw kiba shabar, namar la ai noh ïa ki ha kiba mane blei thala, ki ban sa ïuhroit ïa ka Nongbah Bakhuid haduh sawphew ar bnai.

³ Ngan sa phah ïa ki sakhi jong nga ar ngut kiba kup da ki jaiñ khain, bad kin pynbna ïa ka khubor U Blei ha kita ki shihajar arspah hynriewphew sngi.”

⁴ Ki ar ngut ki sakhi ki long ki ar tylli ki dieng Olib bad ki ar tylli ki diengpynïeng sharak kiba ïeng ha khmat U Trai jong ka pyrthei.

⁵ Lada uno uno u pyrshang ban pynmynsaw ïa ki, ka ding kan mih na ki shyntur jong ki bad kan bam duh ïa ki nongshun jong ki; bad ha kane ka rukom, uno uno uba pyrshang ban pynmynsaw ïa ki un shah pynïap.

⁶ Ki don ka bor ban set ïa ka sahit bneng ba yn ym hap slap ha ka por ba ki pynbna ïa ka khubor U Blei. Ki don ka bor ruh halor ki pukri um, ban pynkylla snam ïa ki; ki don ka bor ruh ban shoh ïa ka khyndew da kano kano ka jait khlam katba shong ka mon jong ki.

⁷ Haba ki dep ban pynbna ïa ka khubor jong ki, uta u mradkhlaw uba wan kiew na ka liewlong ba khlem trai un ïaleh pyrshah ïa ki.

⁸ Un jop ïa ki bad un pynïap ïa ki, bad ki metïap jong ki kin shu sah ha ka surok bah jong kata ka nongbah bakhraw, ha kaba ïa U Trai jong ki la sahnarphna. Ka kyrteng pharshi jong kata ka nongbah ka long ka Sodom, lane ka Ijipt.

⁹ Ki briew na baroh ki hima, ki kynja bynriew, ki jait ktien, bad ki jaitbynriew kin shu khmih ïa kita ki metïap jong ki haduh lai sngi shiteng bad kin ym shah ban tep ïa ki.

¹⁰ Ki briew kiba shong ha ka pyrthei kin ïakmen namar ka jingïap jong kine ki ar ngut. Kin ïalehkmen bad kin ïa-ai jingai sngewbha markylliang, namar ba kita ki ar ngut ki nongïathuhlypa ki la wallam shibun ki jingshitom halor u bynriew.

¹¹ Hadien lai sngi shiteng, ka jingpyrsad mynsiem ba ai jingim ka la wan na U Blei bad ka la rung ha ki, bad ki la ïeng joit; bad baroh kiba la ïohi ïa ki, ki la sngewtriem.

¹² Nangta kita ki ar ngut ki nongïathuhlypa ki la ïohsngew ïa ka sur kaba jam na bneng kaba ong ïa ki, “To wan kiew shane!” Katba ki nongshun jong ki, ki dang khmih, ki la kiew sha bneng ha u lyoh.

¹³ Ha kata ka khyllipmat hi la jia ka jingkhih jumai kaba jur; shi bynta na ka shiphew bynta jong ka nongbah la pynjot, bad hynñiew hajar ngut ki briew ki la ïap. Kita kiwei pat ki briew ki la sngewtriem bad ki la ïaroh ïa ka jingkhraw U Blei jong ka bneng.

¹⁴ Ka jingshyrkhei kaba ar ka la kut, hynrei ka jingshyrkhei kaba lai kan sa wan shen!

Ka turoi kaba hynñiew

¹⁵ Nangta u angel uba hynñiew u la put ïa la ka turoi, bad la don ki sur kiba jam ha bneng, kiba ong, “Ka bor ban synshar halor ka pyrthei ka long mynta ka jong U Trai jong ngi bad jong U Messaïah jong u, bad un synshar junom la junom!”

^16-17 Nangta ki arphew saw ngut ki nongsharai balang kiba shong ha ki khet jong ki ha khmat U Blei ki la dem ngon ïa lade bad ki la mane ïa U Blei, da kaba ong: “Ko Trai U Blei Badonbor Baroh, uta uba long bad uba la ju long! Ngi ainguh ïa me ba me la shimti ïa ka bor bakhraw jong me bad me la sdang ban synshar!

¹⁸ Kiba mane blei thala ki la dap da ka jingbitar shla, namar ka por jong ka jingbitar jong me ka la poi, ka por ban bishar ïa kiba ïap. Ka por ka la poi ban ainong ïa ki shakri jong me, ki nongïathuhlypa, bad ïa ki briew jong me baroh, kito baroh kiba tiengburom ïa me, kiba khraw bad kiba rit kumjuh. Ka por ka la poi ban pynjot ïa kito kiba pynjot ïa ka pyrthei!”

¹⁹ Ïa ka Templ U Blei ha bneng la plie, bad ïa ka Synduk ka Jutang la ïohi hangta. Nangta la don ki jingthaba leilieh, ki jingkyrhuh bad ki jingsawa u pyrthat, ka jingkhynñiuh jumai bad ka jinghap phria kaba jur.