JINGPYNPAW 10 - Khasi CL Bible (BSI)

U angel bad ka kot kli kaba rit

¹ Nangta nga la ïohi sa uwei pat u angel bakhrawbor ba u wan hiar na bneng. La sop ïa u ha u lyoh bad la don u simpyllieng sawdong ka khlieh jong u; ka durkhmat jong u ka long kum ka sngi, bad ki kjat jong u kum ki rishot ding.

² U la don ïa ka kot kli barit ba la plied ha ka kti jong u. U la buh ïa ka kjat kamon jong u halor ka duriaw bad ïa ka kjat kadiang jong u halor ka khyndew,

³ bad u la pyrta da ka sur kaba jam kaba sawa kum ka jingkyrhuh ki sing. Hadien ba u la pyrta jam, ki hynñiew tylli ki pyrthat ki la jubab da ka jingkyrhuh.

⁴ Hamar ba ki la kren, nga la sdang ban thoh. Hynrei nga la ïohsngew ïa ka sur kaba kren na bneng, “To buhrieh ïa kaei kaba ki hynñiew tylli ki pyrthat ki la ong; wat thoh ïa ka!”

⁵ Te u angel ïa uba nga la ïohi ba u ïeng halor ka duriaw bad halor ka khyndew u la rah ïa la ka kti kamon sha bneng

⁶ bad u la smai ha ka kyrteng U Blei, uba im junom la junom, uba la thaw ïa ka bneng, ïa ka khyndew, bad ïa kata ka duriaw, bad baroh kiba don ha ki. Uta u angel u la ong, “Yn ym don jingpynslem shuh!

⁷ Hynrei haba u angel uba hynñiew u put ïa la ka turoi, te U Blei un pyndep ïa ka jingthmu barieh jong u, kumba u la pynbna ha la ki shakri, ki nongïathuhlypa.”

⁸ Nangta kata ka sur ïa kaba nga la ïohsngew kaba kren na bneng ka la kren biang ha nga, ka da ong, “To leit bad shim ïa ka kot kli kaba la plied kaba don ha ka kti jong u angel uba ïeng halor kata ka duriaw bad halor ka khyndew.”

⁹ Nga la leit sha uta u angel bad nga la kyrpad ïa u ban ai ha nga ïa ka kot kli kaba rit. U la ong ïa nga, “To shim ïa ka bad to bam ïa ka; kan sa kylla jew ha ka 'nierbah jong me, hynrei ha ka shyntur jong me kan long kaba thiang kum ka ngap.”

¹⁰ Nga la shim ïa kata ka kot kli barit na ka kti jong u bad nga la bam ïa ka; bad ha ka shyntur ka thiang kum ka ngap. Hynrei hadien ba nga la nguid ïa ka, ka la kylla jew ha ka 'nierbah jong nga.

¹¹ Te la ïathuh ïa nga, “Sa shisien pat ka dei ïa me ban pynbna ïa ka khubor U Blei sha kiba bun ki jaitbynriew, ki kynja bynriew, ki jait ktien, bad ki syiem.”