JINGKHEIÑ 9 - Khasi CL Bible (BSI)

Ka Jingkhawai Niam Ka Jinglait, kaba ar

¹ U Trai u la kren ha u Moses ha ka ri shyiap Sinai ha u bnai uba nyngkong jong ka snem kaba ar hadien ba ki Israel ki la mihnoh na Ijipt.

^2-3 U da ong, “Ha ka sngi kaba khatsaw jong une u bnai, da kaba sdang ha ka por basep ka sngi, ki paid Israel ki dei ban rakhe ïa ka Jingkhawai Niam Ka Jinglait kat kum ki aiñ bad jingbuhbeit ryntih baroh na ka bynta kane.”

⁴ Kumta u Moses u la ong ïa ki paidbah ban rakhe ïa ka Jingkhawai Niam Ka Jinglait,

⁵ bad ha ka janmiet jong ka sngi kaba khatsaw ha u bnai uba nyngkong ki la rakhe kumta ha ka ha ri shyiap Sinai. Ki paidbah ki la leh ïa kaei kaei baroh kumba U Trai u la hukum ïa u Moses.

⁶ Hynrei don ki briew ki bymkhuid kat kum ka jinglehniam namar ba ki la ktah ïa ka metïap bad kim lah ban rakhe ïa ka Jingkhawai Niam Ka Jinglait ha kata ka sngi. Ki la leit sha u Moses bad u Aaron,

⁷ bad ki ong, “Ngi long ki bymkhuid namar ngi la ktah ïa ka metïap, hynrei balei ym shah ïa ngi na kaba wanrah jingainguh ha U Trai lem bad kiwei pat ki Israel?”

⁸ U Moses u jubab, “Ap haduh ba ngan da ïoh ki jingbthah na U Trai.”

⁹ U Trai u la ong ha u Moses

¹⁰ ban ong ha ki paid Israel, “Haba uno uno na phi ne na ki khun ki ksiew jong phi ki long ki bymkhuid na kaba ktah ïa ka metïap lane ki don jngai ha ka jingleit jong ki, hynrei kiba kwah pat ban rakhe ïa ka Jingkhawai Niam Ka Jinglait,

¹¹ la shah ïa phi ban rakhe ïa ka hadien shi bnai, ha ka janmiet jong ka sngi kaba khatsaw ha u bnai uba ar. Rakhe ïa ka da u kpu bakhlem thiat bad ki jhur kthang.

¹² Wat pynsah jingbam ei ei haduh mynstep bad wat pynkheiñ ïa kano kano ka shyieng jong u jingri. Rakhe ïa ka Jingkhawai Niam Ka Jinglait kat kum ki jingbuhbeit ryntih baroh.

¹³ Hynrei lada uno uno na phi uba long bymkhuid bad u bym shym leit jingleit bad u bym rakhe ïa ka Jingkhawai Niam Ka Jinglait, yn ym ñiew shuh kum ki briew jong nga, namar um shym wanrah jingainguh sha nga ha ka por ba la buh. Uta u dei ban shahshitom namar ka pop jong u.

¹⁴ “Lada u nongwei uba shong hapdeng jong phi u kwah ban rakhe ïa ka Jingkhawai Niam Ka Jinglait, u dei ban rakhe ïa ka kat kum ki jingbuhbeit ryntih baroh. Kajuh ka aiñ ka treikam ïa uwei pa uwei baroh, la u traishnong ne u nongwei.”

U lyoh ding

^15-16 Ha ka sngi ba la pynïeng ïa ka Ïingjaiñ ka Jingdon Ryngkat U Trai, u lyoh u la wan bad tap ïa ka. Mynmiet, uta u lyoh u paw kum ka ding.

¹⁷ Man ka por ba uta u lyoh u kiew shajrong, ki paid Israel ki lied noh ïa ki dara, bad ki pynïeng dara pat ha ka jaka ha kaba uta u lyoh u wan hiar.

¹⁸ Da ka hukum U Trai, ki Israel ki lied noh ïa ki dara, bad da ka hukum jong u ki pynïeng pat ïa ki dara. Katba u lyoh u dang neh halor ka Ïingjaiñ, ki shong ki sah ha kajuh ka jaka.

¹⁹ Haba u lyoh u neh bun sngi halor ka Ïingjaiñ, ki kohnguh ïa U Trai, bad kim shym mihnoh.

²⁰ Teng teng, uta u lyoh u neh halor ka Ïingjaiñ tang khyndiat sngi; la kumno kumno ruh, kat kum ka hukum U Trai, ki sah ha kajuh ka jaka ne ki kynriah noh shawei.

²¹ Teng teng pat, uta u lyoh u neh tang naduh janmiet haduh mynstep, bad u tang shu kiew shajrong, ki mihnoh. Man ka por ba uta u lyoh u kiew shajrong, ki mihnoh.

²² La ka long ar sngi, shi bnai, shisnem lane kham slem, katba u lyoh u dang don halor ka Ïingjaiñ, kim shym mihnoh; hynrei haba u la kiew shajrong, ki la mihnoh.

²³ Ki pynïeng dara bad ki lied noh ïa ki dara da kaba kohnguh ïa ki hukum kiba U Trai u la ai lyngba u Moses.