JINGKHEIÑ 8 - Khasi CL Bible (BSI)

Ka rukom ban buh ïa ki sharak

¹ U Trai u ong ha u Moses,

² “Ïathuh ha u Aaron ba haba u buh ïa ki hynñiew tylli ki sharak ha u diengpynïeng sharak, un buh ïa ki ha kata ka rukom ba kin shat jingshai sha khmat.”

³ U Aaron u la kohnguh bad u la buh ïa kita ki sharak da kaba phai sha khmat u diengpynïeng sharak.

⁴ Naduh khlieh haduh trai jong u diengpynïeng sharak la thaw da ka ksiar ba la shoh tyrnem, kat kum ka dur ba U Trai u la pyn-i ha u Moses.

Ka jingpynkhuid bad jingpynkyntang ïa ki Lebi

⁵ U Trai u ong ha u Moses,

⁶ “Pynkyrpang ïa ki Lebi na kiwei pat ki briew ki Israel bad pynkhuid ïa ki

⁷ ha kane ka rukom: synreit ha ki da ka um jingpynkhuid bad ong ba kin khi shñiuh baroh shi rynïeng bad sait ïa la ki jaiñ. Te yn sa ñiew ïa ki ba ki long kiba khuid katba kum ka jinglehniam.

⁸ Nangta kin shim uwei u masi lyngraw bad ka jingainguh bam da u 'purew ba la khleh umphniang Olib; bad me pat men shim sa uwei u masi lyngraw na ka bynta ka jingkñia namar ka pop.

⁹ Nangta lumlang ruh ïa u paid Israel baroh bad pynïeng ïa ki Lebi ha khmat ka Ïingjaiñ ka Jingdon Ryngkat jong nga.

¹⁰ Ki khun Israel kin buh ïa la ki kti halor ki khlieh jong kita ki Lebi,

¹¹ bad nangta u Aaron un pynkyntang ïa ki Lebi sha nga kum ka jingai kaba kyrpang na ki Israel, ba kumta ki lah ban trei ïa ka kam jong nga.

¹² Nangta ki Lebi kin buh ïa la ki kti halor ki khlieh jong ki ar tylli ki masi lyngraw; ïa uwei yn kñia kum ka jingkñia namar ka pop bad ïa uwei pat kum ka jingainguh thang, na ka bynta ban pyndep ïa ka jinglehniam pynkhuid ïa ki Lebi.

¹³ “Pynkyrpang ïa ki Lebi kum ka jingai bakyrpang ïa nga, bad buh ïa u Aaron bad ki khun shynrang jong u ban khmih ïa ki.

¹⁴ Pynkyrpang ïa ki Lebi ha kane ka rukom napdeng ki Israel, khnang ba kin long ki jong nga.

¹⁵ Hadien ba me la pynkhuid bad pynkyntang ïa ki Lebi, kin sa long kiba bit ban trei ha ka Ïingjaiñ.

¹⁶ Nga la kam kynti ïa ki ha ka jaka jong ki khun shynrang baroh jong ki Israel kiba la kha nyngkong, bad ki long tang ki jong nga hi.

¹⁷ Mynba nga la pynïap ïa baroh kiba la kha nyngkong ha ka ri Ijipt, nga la pynkyntang kum la u khun nyngkong jong kawei pa kawei ka ïing Israel bad ïa uba la kha nyngkong na uwei pa uwei u jingri.

¹⁸ Mynta pat nga shim ïa ki Lebi ha ka jaka jong kito baroh kiba la kha nyngkong jong ki Israel,

¹⁹ bad nga aiti ïa ki Lebi ha u Aaron bad ki khun shynrang jong u kum ka jingai sngewbha na ki Israel, ba kin trei ha ka Ïingjaiñ na ka bynta ki paid Israel bad ban ïada ïa ki Israel na ka jingmynsaw kaba lah ban ngat ha ki lada jia ba ki wan tur sha jan eh jong ka Jaka Kyntang.”

²⁰ Kumta keiñ u Moses, u Aaron, bad baroh ki paid Israel ki la pynkyntang ïa ki Lebi, kumba U Trai la hukum ïa u Moses.

²¹ Ki Lebi ruh ki la pynkhuid ïa lade bad sait ïa la ki jaiñ, bad u Aaron u la pynkyntang ïa ki kum ka jingai kaba kyrpang sha U Trai. U la pyndep ruh ïa ka jinglehniam pynkhuid na ka bynta jong ki.

²² Uta u paidbah u la leh ïa kaei kaei baroh kumba U Trai u la hukum ïa u Moses ha kaba ïadei bad ki Lebi. Bad kumta ki Lebi ki long kiba bit ban trei ha ka Ïingjaiñ hapoh u Aaron bad ki khun shynrang jong u.

²³ U Trai u ong ha u Moses,

²⁴ “Uwei pa uwei u Lebi, haba u la dap arphew san snem ka rta, u dei ban pyndep ïa la ki kamram jong u ha ka Ïingjaiñ ka Jingdon Ryngkat jong nga,

²⁵ bad haba u la dap sanphew snem ka rta, un shongthait noh.

²⁶ Hadien kata, u lah ban shu ïarap ïa la ki para Lebi haba ki pyndep la ki kamram ha ka Ïingjaiñ, hynrei u um bit ban leh da lade hi ïa kano kano ka kam. Da kumne men pynbeit ryntih ïa ki kamram jong ki Lebi.”