JINGKHEIÑ 7 - Khasi CL Bible (BSI)

Ki jingainguh jong ki nongïalam

¹ Ha ka sngi ba u Moses u la dep pynïeng ïa ka Ïingjaiñ ka Jingdon Ryngkat U Trai, u la pynsleh bad pynkyntang ïa ka Ïingjaiñ bad ïa ki tiar ki tar jong ka baroh, bad ïa ka duwan bad ki khiew ki pliang jong ka baroh.

² Nangta ki rangbah kur kiba long ki nongïalam ha ki jait ki Israel, kijuh hi ki briew kiba pynïaid ïa ka jingkheiñbriew,

³ ki la wallam ïa ki jingainguh jong ki sha U Trai: hynriew tylli ki kali bad khat-ar tylli ki masi dab, kawei ka kali na ka bynta ar ngut ki nongïalam, bad uwei u masi dab ïa uwei uwei na ki. Hadien ba ki la wan ai ïa ki,

⁴ U Trai u ong ha u Moses,

⁵ “To pdiang ïa kine ki jingai ba yn ïoh pyndonkam ha ki kam kiba ïadei bad ka Ïingjaiñ; ai ïa ki ha ki Lebi kat kum ka kam ba ki dei ban leh.”

⁶ Kumta u Moses u ai ïa kita ki kali bad ki masi dab ha ki Lebi.

⁷ U la ai ar tylli ki kali bad saw tylli ki masi dab ha ka jait Gershon,

⁸ bad saw tylli ki kali bad phra tylli ki masi dab ha ka jait Merari. Ïa ka kam jong ki baroh la dei ban pyndep ha ka jingpynïaid u Ithamar u khun jong u Aaron.

⁹ Hynrei u Moses um shym la ai kali lane masi dab ha ka jait Kohath, namar ïa ki tiar kiba kyntang kiba ki shim sumar, ki dei ban bah ha la ki tyrpeng.

¹⁰ Ki nongïalam ki la wallam ruh ki jingainguh ban rakhe ïa ka jingpynkyntang ïa ka duwan. Haba ki la khreh ban ai ïa ki jingainguh jong ki ha ka duwan,

¹¹ U Trai u ong ha u Moses, “Ong ïa ki ba uwei na ki nongïalam un wanrah man la ka sngi haduh khat-ar sngi kynthih ïa ki jingainguh jong u ban pynkyntang ïa ka duwan.”

^12-83 Ki la wallam ïa ki jingainguh jong ki kumne harum: Ha ka sngi kaba nyngkong ka jait Judah ha ka jingïalam u Nahshon u khun jong u Amminadab. Ha ka sngi kaba ar ka jait Issakhar ha ka jingïalam u Nethanel u khun jong u Suar. Ha ka sngi kaba lai ka jait Sebulun ha ka jingïalam u Eliab u khun jong u Helon. Ha ka sngi kaba saw ka jait Reuben ha ka jingïalam u Elisur u khun jong u Shedeur. Ha ka sngi kaba san ka jait Simeon ha ka jingïalam u Shelumiel u khun jong u Surishaddai. Ha ka sngi kaba hynriew ka jait Gad ha ka jingïalam u Eliasaph u khun jong u Deuel. Ha ka sngi kaba hynñiew ka jait Ephraim ha ka jingïalam u Elishama u khun jong u Ammihud. Ha ka sngi kaba phra ka jait Manasseh ha ka jingïalam u Gamaliel u khun jong u Pedahsur. Ha ka sngi kaba khyndai ka jait Benjamin ha ka jingïalam u Abidan u khun jong u Gideoni. Ha ka sngi kaba shiphew ka jait Dan ha ka jingïalam u Ahieser u khun jong u Ammishaddai. Ha ka sngi kaba khatwei ka jait Asher ha ka jingïalam u Pagiel u khun jong u Okhran. Ha ka sngi kaba khat-ar ka jait Naphtali ha ka jingïalam u Ahira u khun jong u Enan. Ki jingainguh ba uwei pa uwei u wanrah ki long kumjuh: kawei ka pliang rupa kaba khia 1.5 kilo bad kawei ka dabor rupa kaba khia phraspah gram kat kum ka jingthew ba buh ryntih; ïa ki baroh ar la pyndap da u 'purew ba la khleh umphniang na ka bynta ka jingainguh bam; kawei ka pliang ksiar kaba khia shispah shiphew gram, ba la pyndap da ka jingiwbih; uwei u masi lyngraw, uwei u langbrot, bad uwei u khunlangbrot uba shisnem ka rta na ka bynta ka jingainguh thang; uwei u 'langsohmoh na ka bynta ka jingkñia namar ka pop; bad ar tylli ki masi shynrang, san tylli ki langbrot shynrang, san tylli ki 'langsohmoh, bad san tylli ki khunlangbrot kiba shisnem ka rta na ka bynta ka jingainguh ïasyllok.

^84-88 Ki jingkheiñlang ïa baroh ki jingainguh ba la wallam da ki khat-ar ngut ki nongïalam na ka bynta ka jingpynkyntang ïa ka duwan ki long kumne harum: — khat-ar tylli ki pliang rupa, khat-ar tylli ki dabor rupa kiba ka jingkhia ka long 27.6 kilo — khat-ar tylli ki pliang ksiar kiba khia 1.32 kilo, ba la pyndap da ka jingiwbih — khat-ar tylli ki masi lyngraw, khat-ar tylli ki langbrot shynrang, bad khat-ar tylli ki khunlangbrot shynrang kiba shisnem ka rta, lem bad ki jingainguh bam kiba ju ainguh lem bad ki, na ka bynta ki jingainguh thang — khat-ar tylli ki blang na ka bynta ka jingkñia namar ka pop — arphew saw tylli ki masi shynrang, hynriewphew tylli ki langbrot shynrang, hynriewphew tylli ki 'langsohmoh, bad hynriewphew tylli ki khunlangbrot shynrang kiba shisnem ka rta na ka bynta ki jingainguh ïasyllok.

⁸⁹ Haba u Moses u leit rung shapoh ka Ïingjaiñ ban ïakren bad U Trai, u la ïohsngew ba U Trai u kren ïa u najrong ka jingtap ha ka Synduk ka Jutang, napdeng ki ar tylli ki kherub.