JINGKHEIÑ 6 - Khasi CL Bible (BSI)

Ka Aiñ ïa ki Nasir

¹ U Trai u hukum ïa u Moses

² ban ai ïa kine ki jingbthah ïa ki paid Israel. Uno uno napdeng jong phi, u shynrang ne ka kynthei, kiba smai kyrpang ban long ki Nasir bad kiba pynkyntang ïa lade sha U Trai,

³ ki dei ban kyndiah na ka waiñ bad ka kyiad. Phim dei ban dih ïa kano kano ka jingdih ba la shna na ki sohwaiñ, lane ban bam sohwaiñ, la uba dang shu kheit ne uba la thad rkhiang.

⁴ Katba phi dang long u Nasir, phim dei ban bam ïa kano kano kaba mih na u dieng sohwaiñ, wat la ka long tang ki symbai ne ki snep sohwaiñ.

⁵ Katba phi dang don hapoh ka jingsmai ki Nasir, phim bit ban khap ne khi ïa la u shñiuh. La teh ïa phi da kata ka jingsmai haduh ba kut ka por ba phi la pynkyntang ïa lade sha U Trai, bad phin ieh ïa u shñiuh bad u tmain jong phi ba kin san.

^6-7 U shñiuh jong phi u long ka dak ka jingpynkyntang jong phi sha U Blei, bad kumta phim dei ban pyntngit ïa lade da kaba leit sha jan ka metïap, wat la ka dei ka jong u kpa ne ka kmie jong phi, ne ka jong u hynmen ne ka para jong phi.

⁸ Katba u dang long u Nasir, u long uba la pynkyntang sha U Trai.

⁹ Lada ïa u shñiuh uba la pynkyntang jong u Nasir la pyntngit noh namar ba u leit don hajan u briew uba ïap kyndit, u dei ban ap hynñiew sngi, bad nangta un khi noh ïa la ka khlieh bad ïa u tmain; bad kumta un kylla long uba khuid kat kum ka jinglehniam.

¹⁰ Ha ka sngi kaba phra un wallam ar tylli ki paro ne ki lyngdkhur sha u lyngdoh ha ka jingkhang ka Ïingjaiñ ka Jingdon Ryngkat U Trai.

¹¹ U lyngdoh un ainguh ïa kawei na ki kum ka jingkñia namar ka pop, bad ïa kawei pat kum ka jingainguh thang, khnang ban pyndep ïa ka jinglehniam ka jingpynkhuid ïa u namar ba u la ktah ïa ka metïap. Ha kata kajuh ka sngi, un pynkyntang biang ïa la u shñiuh,

¹² bad ïa la ka por sha U Trai kum u Nasir. Ïa ka por kaba mynshuwa yn ym ñiew lang shuh, namar ba u shñiuh jong u uba la pynkyntang u la bit tngit noh. Kum ka jingainguh ban buria pat, u dei ban wallam uwei u khunlangbrot uba shisnem ka rta.

¹³ Haba u Nasir u la pyndep ïa la ka jingsmai, u dei ban leh ïa kane ka jinglehniam. Un leit sha ka jingkhang ka Ïingjaiñ,

¹⁴ bad ai sha U Trai lai tylli ki jingri ki bym don kano kano ka jingduna: uwei u khunlangbrot uba shisnem ka rta na ka bynta ka jingainguh thang, kawei ka khunlangbrot kaba shisnem ka rta na ka bynta ka jingkñia namar ka pop, bad uwei u langbrot na ka bynta ka jingainguh jingïasyllok.

¹⁵ U dei ruh ban ai shi shang u kpu khlem thiat: ki kpu kiba rben kiba da u 'purew ba la khleh bad ka umphniang Olib bad ki kpu kiba stang ba la kyllan da ka umphniang Olib; bad nalor kine, un ai ruh ïa ki jingainguh da u kew bad ka waiñ.

¹⁶ U lyngdoh un wallam ïa kine baroh ha U Trai bad un ai ka jingkñia namar ka pop bad ka jingainguh thang.

¹⁷ Un kñia ïa u langbrot kum ka jingainguh jingïasyllok bad un ai ïa ka bad u kpu uba ha kata ka shang; un wanrah ruh ïa ki jingainguh da u kew bad ka waiñ.

¹⁸ Ha ka jingkhang jong ka Ïingjaiñ, u Nasir un khi noh ïa la u shñiuh bad buh ïa u ha ka ding ha kaba la thang ïa ka jingainguh jingïasyllok.

¹⁹ Nangta, haba la dep shet ïa ka tyrpeng uta u langbrot, u lyngdoh un shim ïa ka lem bad uwei u kpu uba rben bad uwei uba stang na kata ka shang, bad buh ïa ki ha ki kti jong u Nasir.

²⁰ Nangta pat, u lyngdoh un ai ïa ki kum ki jingai kiba kyrpang sha U Trai; kine ki long ki jingainguh kiba kyntang na ka bynta u lyngdoh, nalor ka shadem bad ka lbong jong uta u langbrot, kiba long ki jong u lyngdoh kat kum ka aiñ. Hadien kata, u Nasir u lah ban dih waiñ.

²¹ Kine ki long ki jingbuhbeit ryntih ïa ki Nasir; hynrei lada u Nasir u kular ban ai ka jingainguh palat ïa kaei ba ka jingsmai jong u ka dawa, u dei ban pyndep thik ïa kata ka kular ba u la khlei.

Ka jingkyrkhu ki Lyngdoh

²² U Trai u hukum ïa u Moses

²³ ban ong ha u Aaron bad ki khun shynrang jong u ban pyndonkam ïa kine ki ktien harum ha kaba kyrkhu ïa ki Israel:

²⁴ To U Trai un kyrkhu kyrdoh bad sumar sukher ïa phi;

²⁵ To U Trai un lehsbun bad leh-isynei ïa phi;

²⁶ To U Trai un khmih ïa phi da ka jingsngewbha bad ai ha phi ka jingsuk.

²⁷ Bad U Trai u ong, “Lada ki pynbna ïa ka kyrteng jong nga kum ka jingkyrkhu halor ki Israel, ngan kyrkhu ïa ki.”