JINGKHEIÑ 5 - Khasi CL Bible (BSI)

Ki briew bymkhuid

¹ U Trai u ong ha u Moses,

² “Hukum ïa ki Israel ban beh noh na ka jaka shong dara ïa uno uno uba don ka jingpang sniehdoh bashyrkhei lane uba liat um ksuit, bad uwei pa uwei uba long u bymkhuid da kaba ktah ïa ka metïap.

³ Phah noh shabar ïa baroh kine ki briew bymkhuid kat kum ka jinglehniam, ba kumta kin ym pyntngit ïa ka jaka shong dara, ha kaba nga shong bad ki briew jong nga.”

⁴ Ki Israel ki la kohnguh bad ki la beh noh ïa ki baroh na ka jaka shong dara.

Ka bai buria ïa ki jingleh palat

⁵ U Trai u la ai ha u Moses

⁶ ïa kine ki jingbthah na ka bynta ki Israel. Haba uno uno na phi u lyndet ïa U Trai bad u leh bymdei ïano ïano,

⁷ u dei ban phla ïa la ka pop bad buria lut, bad ai tam sa shi bynta na ka san bynta ha uta u briew uba la shah leh bymdei.

⁸ Hynrei lada uta u briew u ïap noh bad um don shuh u ba-ha-ïing ha-sem uba dei ban ïoh ïa kata ka bai buria, dei ban ai ïa ka sha U Trai na ka bynta u lyngdoh. Kane ka jingburia kan long nalor u langbrot da uba dei ban pyndep ïa ka jinglehniam ka jingpynkhuid ïa uta u briew uba leh bymdei.

⁹ Shuh shuh, man la ka jingainguh kaba kyrpang ba ki Israel ki ai sha U Trai ka dei ka jong uta u lyngdoh ha uba ki ai ïa ka.

¹⁰ Uwei pa uwei u lyngdoh un bat ïa ki jingainguh baroh ïa kiba la wanrah ha u.

Kaba ïadei bad ki tnga kiba tharai sniew

¹¹ U Trai u hukum ïa u Moses

^12-14 ban ai ha ki Israel ïa kine ki jingbthah. Ka lah ban jia ba u briew u tharai sniew ba ka tnga jong u ka la leh lyndet ïa u bad ka la pyntngit ïa lade da kaba ïathiah shongkha bad uwei pat u briew. Hynrei u tnga um da thikna bha, namar ka tnga jong u ka lah ban buhrieh — ym don ruh mano mano ba sakhi ïa kata, bad ym shym la lap ruh ba ka la leh ïa kata ka kam. Lane lada ka jia ba u briew u shu suba sniew ïa la ka tnga, wat la kam shym la leh lyndet ïa u.

¹⁵ Ha kano kano na kine ar, uta u briew un leit ïalam ïa la ka tnga sha u lyngdoh. Un rah ruh ïa ka jingainguh shi kilo u 'purew barli, hynrei um dei ban theh umphniang Olib ne buh jingiwbih halor jong u, namar ka dei ka jingainguh na u briew uba suba sniew, ïa kaba la buh khnang ban tip ïa ka jingshisha.

¹⁶ U lyngdoh un ïalam ïa kata ka kynthei sha khmat bad un pynïeng ïa ka ha khmat ka duwan.

¹⁷ Un theh khyndiat ka um khuid ha ka pliang khyndew, un shim khyndiat ka khyndew kaba ha madan ka Ïingjaiñ ka Jingdon Ryngkat U Trai bad un buh ïa kata hapoh ka um ba kan kthang.

¹⁸ Nangta un pynpra ïa u shñiuh jong kata ka kynthei bad un buh ha ki kti jong ka ha kata ka jingainguh kaba da u 'purew. U lyngdoh pat un bat ha la ki kti ïa kata ka pliang ha kaba don kata ka um kthang kaba wallam ïa ka jingtim.

¹⁹ Nangta u lyngdoh un pynsmai ïa ka da kaba ong, “Lada pham shym la klim, yn ym pynmynsaw ïa pha da ka jingtim ba kane ka um ka wallam.

²⁰ Hynrei lada pha la klim,

²¹ to U Trai un ñiew ïa ka kyrteng jong pha kaba la tim hapdeng ki briew jong pha. To un pynstai ïa ka longkynthei jong pha bad pynsieb ïa ka kpoh jong pha.

²² Ai ba kane ka um kan rung sha ka kpoh jong pha ban pynsieb ïa ka bad pynstai ïa ka longkynthei jong pha.” Bad kata ka kynthei kan ong, “Nga mynjur; ai ba U Trai un leh kumta.”

²³ Nangta u lyngdoh un thoh ïa kane ka jingtim bad sait ïa kata kaba u la thoh ha kata ka um kthang.

²⁴ Shuwa ba kata ka kynthei kan dih ïa kata ka um kthang kaba wallam ïa ka jingtim bad kaba lah ban pynsuh jur ïa ka,

²⁵ u lyngdoh un shim ïa kata ka jingainguh kaba da u 'purew na ki kti jong kata ka briew, un ai ïa ka jingainguh ha khmat U Trai, bad un wanrah ïa ka sha ka duwan.

²⁶ Nangta un shim shi kham na kata ka jingainguh bad thang ïa ka ha ka duwan. Khatduh eh, un phah ïa kata ka kynthei ban dih ïa kata ka um.

²⁷ Lada ka la klim, kata ka um kan pynsuh jur ïa ka; ka kpoh jong ka kan sieb bad ka longkynthei jong ka kan stai. Ka kyrteng jong ka kan long kaba la tim hapdeng ki briew jong ka.

²⁸ Hynrei lada kata ka kynthei ka dei kaba ri khuid ïa lade, yn ym jia ei ei ïa ka, bad kan dang ïoh khun.

^29-30 Kane ka long ka aiñ haba u briew u bishni bad u kylla suba sniew ba ka tnga jong u ka la klim ïa u. Ka kynthei kan hap ïeng ha khmat ka duwan, bad u lyngdoh un pyndep ïa kane ka jinglehniam.

³¹ U shynrang un ym shah kynnoh pop, hynrei ka kynthei, lada ka la leh pop, kan shah pynshitom.