JINGKHEIÑ 4 - Khasi CL Bible (BSI)

Ki kamram jong ki Lebi na ka jait u Kohath

¹ U Trai u la ong ha u Moses

² ban shim jingkheiñ ïa ki Lebi kiba na ka jait u Kohath shi kur shi kur, bad shi ïing shi ïing,

³ bad thoh kyrteng ïa ki rangbah baroh kiba hapdeng laiphew bad sanphew snem ka rta kiba bit ban shakri ha ka Ïingjaiñ ka Jingdon Ryngkat U Trai.

⁴ Ka jingshakri jong ki ka ïadei bad kiei kiei kiba kyntang tam.

⁵ U Trai u la ai ha u Moses ïa kine ki jingbthah harum. Haba la dei ka por ban kynriah jaka shawei, u Aaron bad ki khun shynrang jong u kin rung shapoh ka Ïingjaiñ, kin weng noh ïa ka pyrda kaba ha khmat ka Synduk ka Jutang, bad kin tap ïa kata ka Synduk da ka.

⁶ Kin tap nalor jong ka da ka snieh kaba bha, halor kata pat kin siang da ka jaiñ kaba jngum, bad kin bsuh ïa ki dieng jingbah jong ka.

⁷ Halor ka miej ba la buh ïa u kpu ba la lah ainguh sha U Trai, kin siang kawei ka jaiñ kaba jngum, bad kin buh hangta ïa ki pliang, ki pliang buh jingiwbih, ki pliang jingainguh, bad ki khuri jingainguh dih. U kpu ainguh u dei ban don halor jong ka.

⁸ Kin siang halor jong ki da ka jaiñ rong saw, halor kata pat kin tap da ka snieh babha, bad kin bsuh ïa ki dieng jingbah jong ka.

⁹ Kin shim ka jaiñ kaba jngum bad da kata kin tap ïa u diengpynïeng sharak, ryngkat bad ki sharak, ki nap, ki pliang rah jingrah, bad ïa ki khulpi umphniang Olib baroh.

¹⁰ Kin song ïa ka ryngkat bad ki tiar jong ka baroh ha ka jingtap kaba da ka snieh babha bad kin buh ïa ka halor ka jingbah.

¹¹ “Nangta pat, kin siang ïa ka jaiñ kaba jngum halor ka duwan ksiar, kin tap halor kata da ka snieh babha, bad kin bsuh ruh ïa ki dieng jingbah.

¹² Kin shim ïa ki khiew ki pliang baroh ïa kiba la ju pyndonkam ha ka jinglehniam ha ka Jaka Kyntang, kin song ïa ki ha ka jaiñ kaba jngum, kin tap ïa ki da ka snieh babha, bad kin buh ïa ki halor ka jingbah.

¹³ Kin khat noh ïa u dpei na ka duwan bad kin siang da ka jaiñ kaba sawbthuh halor jong ka.

¹⁴ Kin buh hangta ïa ki tiar ki tar baroh ïa kiba la ju pyndonkam ha ka jinglehniam ha kata ka duwan: ki pliang ding, ki proh, ki siang, bad ki dabor. Kin tap ruh da ka snieh babha halor jong ka bad kin bsuh ïa ki dieng jingbah.

¹⁵ Haba la dei ka por ban kynriah jaka shawei, ki kur u Kohath kin wan ïabah ïa kita ki tiar kiba kyntang hadien ba u Aaron bad ki khun shynrang jong u ki la tap lut ïa ki bad ïa ki tiar pyndait jong ki baroh. Ki kur u Kohath kim bit ban ktah ïa kita ki tiar kiba kyntang, ïoh ki ïap. “Kine ki dei ki jingkitkhlieh ba ki kur u Kohath ki dei ban leh man ka por ba hap pynkynriah ïa ka Ïingjaiñ.

¹⁶ “U Eleasar u khun jong u Aaron u lyngdoh un kitkhlieh ïa ka Ïingjaiñ baroh kawei bad ïa ka umphniang ïa ki sharak, ka jingiwbih, ki jingainguh bam, ka umphniang pynsleh, bad ïa baroh kiba ha ka Ïingjaiñ ïa kiba la pynkyntang sha U Trai.”

¹⁷ U Trai u ong ha u Moses bad u Aaron,

¹⁸ “Wat ai ba kita kiba na ka kur u Kohath

¹⁹ kin shah pynïap napdeng ki Lebi; hynrei leh kumne khnang ba kin im bad ba kin ym ïap haba ki wan hajan kita ki tiar kiba kyntang tam. U Aaron bad ki khun shynrang jong u kin leit rung bad ai bynta ïa uwei pa uwei u briew ban trei, bad ban ïathuh ruh ha u ïa kaei kaba u dei ban kit.

²⁰ Hynrei lada kita kiba na ka kur Kohath ki rung shapoh ka Ïingjaiñ bad ki ïohi liak ïa ki lyngdoh ba ki tap ki song ïa kita ki tiar kiba kyntang, kin ïap.”

Ki kamram jong ki Lebi na ka jait u Gershon

²¹ U Trai u ong ha u Moses,

²² “Shim jingkheiñ ïa ki Lebi kiba na ka jait u Gershon shi kur shi kur, bad shi ïing shi ïing,

²³ bad thoh kyrteng ïa ki rangbah baroh kiba hapdeng laiphew bad sanphew snem ka rta kiba bit ban shakri ha ka Ïingjaiñ.

²⁴ Kin kitkhlieh ban bah ïa kine ki tiar ki tar harum:

²⁵ Ka Ïingjaiñ, ka jingsop bashapoh bad shabar jong ka, ka jingsop snieh babha halor jong ka, ka pyrda jong ka jingkhang,

²⁶ ki pyrda bad ki tyllai jong ka phyllaw kaba don sawdong ka Ïingjaiñ bad ka duwan, ki pyrda jong ka jingkhang ka phyllaw, bad ki tiar ki tar baroh ïa kiba la pyndonkam ha kaba pynïeng pyndait ïa ki. Kin pyndep ïa baroh ki kam kiba donkam na ka bynta kine kiei kiei.”

²⁷ U Moses bad u Aaron kin khmih ba ki kur u Gershon kin pyndep ïa baroh ki kamram bad ban bah ïa baroh kaba u Aaron bad ki khun shynrang jong u ki ai ha ki.

²⁸ Kine ki long ki jingkitkhlieh jong ka kur u Gershon ha ka Ïingjaiñ; kin pyndep ïa ki kat kum ka jingpynbeit u Ithamar u khun jong u Aaron u lyngdoh.

Ki kamram jong ki Lebi na ka jait u Merari

²⁹ U Trai u ong ha u Moses ban shim jingkheiñ ïa ki Lebi kiba na ka jait u Merari shi kur shi kur, bad shi ïing shi ïing,

³⁰ bad ban thoh kyrteng ïa ki rangbah baroh kiba hapdeng laiphew bad sanphew snem ka rta, kiba bit ban shakri ha ka Ïingjaiñ ka Jingdon Ryngkat U Trai.

³¹ Kin kitkhlieh ban bah ïa ki tiar pynïeng Ïingjaiñ, ki diengkhap, ki rishot, bad ki thliew tnaw jong ka Ïingjaiñ,

³² bad ïa ki rishot, ki thliew tnaw, ki snar, bad ki tyllai jong ka phyllaw sawdong kata ka Ïingjaiñ, ryngkat bad ki tiar ki tar baroh ïa kiba la pyndonkam ha kaba pynïeng pyndait ïa ki. Uwei pa uwei u briew u kitkhlieh ban bah ïa ki tiar ki tar bakyrpang.

³³ Kine ki long ki jingkitkhlieh jong ka kur u Merari kiba shakri ha ka Ïingjaiñ; kin pyndep ïa ki kat kum ka jingpynbeit u Ithamar u khun jong u Aaron u lyngdoh.

Ka jingkheiñ ïa ki Lebi

^34-48 Kumba U Trai u la hukum, u Moses, u Aaron, bad ki nongïalam jong uta u paidlang, ki shim jingkheiñ ïa ki Lebi na ki lai kur: Kohath, Gershon, bad Merari. Ki la leh ïa kane shi kur shi kur, bad shi ïing shi ïing, bad ki thoh kyrteng ïa ki rangbah baroh kiba hapdeng laiphew bad sanphew snem ka rta, kiba bit ban shakri ha ka Ïingjaiñ jong ka Jingdon ryngkat U Trai kumne harum: Ka jait Kohath ka don ar hajar hynñiewspah sanphew ngut. Ka jait Gershon ka don ar hajar hynriewspah laiphew ngut. Ka jait Merari ka don lai hajar arspah ngut. Baroh lang ki don phra hajar sanspah phraphew ngut.

⁴⁹ Ïa uwei pa uwei u rangbah la thoh kyrteng kumba U Trai u la hukum ïa u Moses; bad ha ka hukum U Trai kaba la ai lyngba u Moses, ïa uwei pa uwei u rangbah la ai ka jingkitkhlieh ïa ka kam ban shakri ne ban bah.