JINGKHEIÑ 36 - Khasi CL Bible (BSI)

Ka jingïoh bynta ki kynthei kiba la shongkurim

¹ Ki khlieh jong ki longïing longsem ha ka kur u Gilead, u khun jong u Makhir u ksiew jong u Manasseh u khun jong u Joseph, ki la leit sha u Moses bad kiwei pat ki nongïalam.

² Ki ong, “U Trai u la hukum ïa phi ban ïasam ïa ka ri ha ki paid Israel da kaba kynting sbai. U la hukum ruh ïa phi ban ai ïa ka bri ka khyndew jong u para kur jong ngi u Selophehad ha ki khun kynthei jong u.

³ Hynrei kynmaw, lada ki ïashongkurim bad ki shynrang kiba na kawei pat ka jait, ka bri ka khyndew jong ki kan long noh ka jong kata ka jait, bad ka bynta kaba dei ka jong ngi kan nang duna.

⁴ Ha ka snem jong ka Jingpynïoh pat, ynda haba baroh ka bri ka khyndew ïa kaba la die la pynïoh pat sha ki trai khyndew, ïa ka jingïohkynti jong ki khun kynthei jong u Selophehad yn kynthup lang junom ha kata ka jait kaba ki ïashongkurim bad kan long ka jingduh ïa ka jait jong ngi.”

⁵ Kumta u Moses u la ai ha ki paid Israel ïa kane ka hukum na U Trai. U ong, “Kaei kaba ka jait Manasseh ka ong ka long kaba dei,

⁶ bad kumta U Trai u ong ba ki khun kynthei u Selophehad ki lah ban ïashongkurim bad uno uno uba ki mon, hynrei tang hapoh ka jait jong ki hi.

⁷ Ka bri ka khyndew jong uwei pa uwei u Israel kan sah ha ka jait jong u.

⁸ Man ka kynthei kaba ïohpateng ïa ka bri ka khyndew ha kano kano ka jait Israel ka dei ban ïashongkurim bad u briew uba na kata ka jait. Ha kane ka rukom ki Israel baroh kin ïohpateng ïa ka bri ka khyndew jong ki kpa tymmen jong u,

⁹ bad kata ka bri ka khyndew kan ym leit na kawei ka jait sha kawei pat. Kawei pa kawei ka jait kan ïai bat ïa la ka bri ka khyndew.”

^10-11 Kumta ka Mahlah, Tirsah, Hoglah, Milkah, bad Noah, ki khun kynthei u Selophehad ki la leh kumba U Trai u la hukum ïa u Moses, bad ki la ïashongkurim bad la ki bakha.

¹² Ki la ïashongkurim hapoh ki kur kiba na ka jait u Manasseh u khun jong u Joseph, bad ka bri ka khyndew jong ki ka ïaisah bad ka jait u kpa jong ki.

¹³ Kine ki long ki aiñ bad jingbuhbeit ryntih kiba U Trai u la ai ha ki Israel lyngba u Moses ha ki pyntha ka Moab sha shiliang ka wah Jordan na Jerikho.