JINGKHEIÑ 35 - Khasi CL Bible (BSI)

Ki shnong ba la ai ïa ki Lebi

¹ Ha ki pyntha ka Moab sha shiliang ka wah Jordan na ka Jerikho, U Trai u ong ha u Moses,

² “Ïathuh ïa ki Israel ba na ka jingïohkynti ba ki la ïohpdiang, ki dei ban ai ïa ki Lebi katto katne ki shnong ba kin shong kin sah lem bad ka jaka phlang sawdong kita ki shnong.

³ Kine ki shnong kin long ki jong ki Lebi, bad kin shong kin sah hangta. Ka jaka phlang kan long na ka bynta ki masi bad kiwei pat ki jingri jong ki baroh.

⁴ Ka jaka phlang ka dei ban ïar sawspah sanphew mitar shabar na ki kynroh jong ka nongbah ha kawei kawei ka liang,

⁵ kumta ba kan don ka jaka pdeng kaba heh khyndaispah mitar ha kawei kawei ka liang bad ka nongbah kan don hapdeng.

⁶ Phi dei ban ai ïa ki Lebi hynriew tylli ki shnong jakarieh sha kiba uno uno na phi u lah ban phet rieh lada u kum pynïap ïano ïano da kaba shu jia ryngkhat.

⁷ Nalor kita, ai ïa ki sa sawphew ar tylli kiwei pat ki shnong bad ka jaka phlang jong ki, kaba pynlong ka jingdon baroh sawphew phra tylli.

⁸ Ïa ka jingbun ki shnong jong ki Lebi ha kawei kawei ka jait dei ban pynshong nongrim kat kum ka jingheh jong ka hima jong ka.”

Ki shnong jakarieh

⁹ U Trai u ong ïa u Moses

¹⁰ ban ong ha ki paid Israel: “Ynda phi jam ïa ka wah Jordan bad rung sha ka ri Kanaan,

¹¹ phin jied ki shnong jakarieh sha kiba uno uno na phi u lah ban phet rieh lada u pynïap ïano ïano da ka jingjia ryngkhat.

¹² Hangta phin lait na ki ba-ha-ïing ha-sem jong uba ïap kiba wad pynhiarkput. Ym dei ban pynïap ïa uno uno uba shah kynnoh pynïap briew khlem ka jingbishar batip paidbah.

¹³ Jied hynriew tylli ki shnong,

¹⁴ lai tylli na sha mihngi jong ka Jordan, bad lai tylli pat ha ka ri Kanaan.

¹⁵ Kine kin long ki shnong jakarieh ïa ki Israel bad ïa ki nongwei kiba shong shipor ne kiba shongduh hapdeng jong ki. Uno uno uba pynïap ïano ïano da kaba jia ryngkhat u lah ban phet rieh sha kawei na ki.

^16-18 “Lada, kumno re kumno, uwei na phi u pyndonkam da ka atiar nar lane maw lane dieng ban pynïap ïano ïano, uta u long uba rem ha ka jingpynïap bad u dei ban shah pynïap.

¹⁹ U kur uba jan jong u briew uba la ïap u don ka jingkitkhlieh ban pynïap ïa uta u nongpynïap briew. Haba u ïakynduh ïa u, u dei ban pynïap ïa u.

²⁰ “Lada phi isih ïano ïano bad phi pynïap ïa u da kaba khynñiat shapoh lane kawang da kaei kaei ïa u,

²¹ lane da kaba kura ïa u da ka kti, phi long uba rem ha ka jingpynïap bad phi dei ban shah pynïap. U kur uba jan jong uta uba ïap u don ka jingkitkhlieh ban pynïap ïa u nongpynïap briew. Haba u ïakynduh ïa phi, u dei ban pynïap ïa phi.

²² “Hynrei tharai, da kaba jia ryngkhat phi pynïap ïano ïano ïa uba phim shym isih, la ka long da kaba khynñiat shapoh lane kawang da kaei kaei ïa u.

²³ Lane tharai, lada khlem da peit phi kawang ïa u maw uba pynïap ïano ïano ïa uba phi khlem da thmu ban pynmynsaw, bad u bym dei u nongshun jong phi.

²⁴ Ha kum kine ki khep, u paidbah un rai pynksan ïa phi bad ym ïa u kur jong uba ïap uba wad pynhiarkput.

²⁵ Phi kit pop tang na ka bynta ka jingpynïap bad u paidbah u dei ban pyllait im ïa phi na u kur jong uba ïap, bad ki dei ban pynphai ïa phi sha ka shnong jakarieh sha kaba phi la phet rieh. Phi dei ban shong ban sah hangta haduh ba un da ïap uta u briew uba long Rangbah Lyngdoh ha kata ka por.

²⁶ Lada phi mih na ka shnong jakarieh sha kaba phi la phet rieh,

²⁷ bad lada u kur jong uba ïap u lap ïa phi bad u pynïap ïa phi, kata ka jingpynhiarkput kam dei ka jingpynïap briew.

²⁸ Uno uno na phi uba pynïap briew khlem da mut khnang u dei ban sah ha ka shnong jakarieh haduh ka jingïap u Rangbah Lyngdoh, hynrei hadien kata u lah ban leit phai sha la ïing.

²⁹ Kine ki jingpynbeit ryntih ki treikam ïa phi bad ïa ki khun ki ksiew jong phi hangno hangno haba phi shong phi sah.

³⁰ “Ïa u briew uba shah kynnoh pynïap briew lah ban rai pynrem bad pynïap tang halor ka jingphla jong ki ar ngut ne kham bun ngut ki sakhi; ka sakhi tang ka jong uwei u briew kam biang ban kyrshan ïa ka jingkynnoh pynïap briew.

³¹ Ïa u nongpynïap briew dei ban pynïap. Um lah ban lait na kane ka jingpynshitom da kaba siew tyngka.

³² Lada u la phet sha ka shnong jakarieh, wat shah ba un siew ei ei khnang ba un ïoh leit phai sha la ïing ha shuwa ka jingïap jong u Rangbah Lyngdoh.

³³ Lada phi leh kumta, phi pynjakhlia ïa ka ri ha kaba phi shong phi sah. Ka jingpynïap briew ka pynjakhlia ïa ka ri, bad ym lah ban pyndep ïa ka jinglehniam ka jingpynkhuid ïa kata ka ri ha kaba u briew u shah pynïap, lait tang da ka jingpynïap ïa u nongpynïap briew.

³⁴ Wat pynjakhlia ïa ka ri ha kaba phi shong phi sah, namar nga long U Trai bad nga shong hapdeng ki paid Israel.”