JINGKHEIÑ 34 - Khasi CL Bible (BSI)

Ki pud sawdong jong ka ri

¹ U Trai u ai ha u Moses

² ïa kine ki jingbthah harum na ka bynta ki paid Israel: “Ynda phi rung sha Kanaan, ka ri kaba nga ai ïa phi, ki pud jong ka hima jong phi kin long kumne harum.

³ U pud uba shaphang shathie un ïar naduh ka ri khlaw Sin ter ter ïa u pud ka Edom. Un sdang na shaphang mihngi ha ka tduh kaba shathie jong ka Duriaw Baïap.

⁴ Nangta un phai shathie shaphang ka lynti khim Akrabbim bad un ïaid lyngba ïa ka Sin haduh Kadesh Barnea. Nangta un phai shaphang shatei lam sepngi haduh Hasar Addar bad nangta pat shaduh Asmon,

⁵ ha kaba un phai sha ka them ha ka pud jong ka Ijipt bad un kut ha ka Mediterranian.

⁶ “U pud uba shaphang sepngi un long ka Duriaw Mediterranian.

⁷ “U pud bashaphang shatei un bud ïa u laiñ na ka Mediterranian sha u Lum Hor

⁸ bad nangta haduh ka khim Hamath. Un bteng haduh Sedad

⁹ bad sha Siphron, bad un kut ha Hasar Enan.

¹⁰ “U pud bashaphang mihngi un bud ïa u laiñ na Hasar Enan sha Shepham.

¹¹ Nangta un leit shaphang shathie sha Harbel, sha mihngi jong ka Ain, bad nangta sha ki lum harud ka Duriaw Galilaïa shaphang mihngi,

¹² nangta shathie shi lynter ka wah Jordan sha ka Duriaw Baïap. “Kine kin long ki pud sawdong jong ka ri jong phi.”

¹³ Kumta u Moses u ong ha ki Israel, “Kane ka dei ka ri ba phin ïohpdiang da kaba kynting sbai, ka ri ba U Trai u la ai ha ki khyndai jait bad ha kawei ka shiteng jait.

¹⁴ Ki jait Reuben bad Gad bad kaba shiteng ha ka phang mihngi jong ka jait Manasseh ki la ïoh ïa la ka jingïohkynti, kaba la ïasam kat kum ki longïing longsem jong ki,

¹⁵ ha ka liang kaba sha mihngi ka Jordan, marpyrshah ïa ka Jerikho.”

Ki nongïalam kiba kitkhlieh ha kaba ïasam ïa ka ri

¹⁶ U Trai u ong ha u Moses,

¹⁷ “U Eleasar u lyngdoh bad u Joshua u khun jong u Nun kin ïasam ïa ka ri na ka bynta u paidlang.

¹⁸ Shim ruh uwei u nongïalam na kawei kawei ka jait ban ïarap ïa ki ha kaba ïasam ïa ka.”

^19-28 Kine ki long ki rangbah kiba U Trai u la jied: Na ka jait Judah la jied ïa u Kaleb u khun jong u Jephunneh. Na ka jait Simeon la jied ïa u Shelumiel u khun jong u Ammihud. Na ka jait Benjamin la jied ïa u Elidad u khun jong u Khislon. Na ka jait Dan la jied ïa u Bukki u khun jong u Jogli. Na ka jait Manasseh la jied ïa u Hanniel u khun jong u Ephod. Na ka jait Ephraim la jied ïa u Kemuel u khun jong u Shiphtan. Na ka jait Sebulun la jied ïa u Elisaphan u khun jong u Parnakh. Na ka jait Issakhar la jied ïa u Paltiel u khun jong u Assan. Na ka jait Asher la jied ïa u Ahihud u khun jong u Shelomi. Na ka jait Naphtali la jied ïa u Pedahel u khun jong u Ammihud.

²⁹ Kine ki long ki rangbah kiba U Trai u la buh ba kin ïasam ïa ka jingïohkynti na ka bynta ki paid Israel ha ka ri Kanaan.