JINGKHEIÑ 33 - Khasi CL Bible (BSI)

Ka jingïaid lynti na Ijipt sha Moab

¹ Kane ka jingïathuh harum ka ai ïa ki kyrteng jong ki jaka kiba ki Israel ki sher dara hadien ba ki la mihnoh na Ijipt ha ki jait jong ki hapoh ka jingïalam jong u Moses bad u Aaron.

² Ha ka hukum U Trai, u Moses u la thoh ïa ki kyrteng jong ka jaka ha man ba ki sher dara.

³ Ki paid Israel ki la mihnoh na Ijipt ha ka sngi kaba khatsan jong u bnai uba nyngkong jong ka snem, ka sngi hadien ka Jingkhawai Niam Ka Jinglait kaba nyngkong. Hapoh ka jingïada jong U Trai ki la mihnoh na ka nongbah Rameses ha kaba ïohi shai ki nong Ijipt

⁴ kiba dang ïatep ïa la ki khun shynrang kiba la kha nyngkong kiba U Trai u la pynïap. Da kaba leh ïa kane, U Trai u la pyn-i ba u long uba kham khrawbor ban ïa ki blei jong ka Ijipt.

⁵ Ki paid Israel ki la mihnoh na Rameses bad sher dara ha Sukkoth.

⁶ Ka jaka sher dara kaba bud ka la long ha Etham ha tduh jong ka ri shyiap.

⁷ Na kata ki la phai biang sha Pi Hahiroth kaba shaphang mihngi jong ka Baal Sephon, bad ki la sher dara hajan Migdol.

⁸ Ki la mihnoh na Pi Hahiroth bad ki la ïaid lyngba ïa ka Duriaw Basaw sha ka ri shyiap Shur; hadien ba ki la ïaid lai sngi, ki la sher dara ha Marah.

⁹ Na kata ki la leit noh sha Elim; ha kaba ki la sher dara, namar la don hangta khat-ar tylli ki umpohliew bad hynñiewphew tylli ki dieng Tlai.

¹⁰ Ki la mihnoh na Elim bad ki la sher dara hajan ka khmut duriaw Sues.

¹¹ Ka jaka sher dara jong ki kaba bud ka la long ha ka ri shyiap Sin.

¹² Nangta ki la sher dara ha Dophkah,

¹³ bad hadien kata ha Alush.

¹⁴ Kaba bud nangta ka long ha Rephidim, ha kaba ym don um ïa ki ban dih.

^15-37 Na Rephidim sha u lum Hor ki la sher dara ha kine ki jaka harum: Ka ri shyiap Sinai, ka Kibroth Hattaabah (lane “Ki jingtep jong ka jingrhah”), ka Haseroth, ka Rithmah, ka Rimmon Peres, ka Libnah, ka Rissah, ka Kehelathah, u Lum Shepher, ka Haradah, ka Makheloth, ka Tahath, ka Terah, ka Mithkah, ka Hashmonah, ka Maseroth, ka Bene Jaakan, ka Hor Haggidgad, ka Jotbathah, ka Abronah, ka Esiongeber, ka ri khlaw Sin (kaba dei, ka Kadesh), bad u Lum Hor, ha ka tduh jong ka ri Edom.

^38-39 Ha ka hukum U Trai, u Aaron u lyngdoh u la leit kiew ïa u Lum Hor. Ha ka rta kaba shispah arphew lai snem u la ïap hangta ha ka sngi kaba nyngkong jong u bnai uba san jong ka snem kaba sawphew hadien ba ki Israel ki la mihnoh na Ijipt.

⁴⁰ U syiem Arad ha ka bynta bashathie jong ka Kanaan u la ïohsngew ba ki Israel ki la ïawan.

^41-49 Na u Lum Hor sha ki pyntha Moab ki Israel ki la sher dara ha kine ki jaka harum: ka Salmonah, ka Punon, ka Oboth, ki jaka ba la iehnoh jong ka Abarim ha ka hima Moab, ka Dibon Gad, ka Almon Diblathaim, ki Lum Abarim hajan u Lum Nebo, bad ha ki pyntha ka Moab sha shiliang ka wah Jordan na Jerikho, hapdeng ka Beth Jeshimoth bad ka Them Akasia.

Ki jingbthah ha shuwa ban jam ïa ka Jordan

⁵⁰ Hangta ha ki pyntha ka Moab sha shiliang ka Jordan na Jerikho, U Trai u la ai ha u Moses

⁵¹ ïa kine ki jingbthah ïa ki Israel: “Ynda phi jam ïa ka Jordan sha ka ri Kanaan,

⁵² phi dei ban beh krad ïa ki nongshong shnong baroh jong ka ri. Pynjot thiaw ïa ki bleithaw maw bad bleithaw nar jong ki baroh bad ïa ki jaka mane blei jong ki baroh.

⁵³ Kam kynti ïa ri bad shongsah hangta, namar nga ai ïa ka ha phi.

⁵⁴ Ïasam ïa ka jaka hapdeng ki jait bad ki kur da kaba shu kynting sbai, da kaba ai ka jaka kaba heh sha ka kur kaba bun paid bad ka jaka kaba rit sha ka kur kaba duna paid.

⁵⁵ Hynrei lada phim beh noh ïa ki nongshong shnong jong ka ri, kito kiba dang sah kin pynjynjar ïa phi kum ki thngiat ha ki khmat jong phi bad kum ki shiah ha ka krung jong phi, bad kin ïaleh pyrshah ïa phi.

⁵⁶ Lada phim beh noh ïa ki, ngan pynjot ïa phi kumba nga la thmu ban pynjot ïa ki.”