JINGKHEIÑ 32 - Khasi CL Bible (BSI)

Ki jait kiba shaphang mihngi jong ka Jordan

¹ Ki jait Reuben bad ki jait Gad ki la don shibun ki jingri. Haba ki la ïohi ba ka ri Jaser bad ka ri Gilead ka long kaba bit eh na ka bynta ki jingri,

² ki la leit sha u Moses, u Eleasar, bad kiwei pat ki nongïalam jong u paidlang, bad ki ong,

^3-4 “Kane ka thain ba U Trai u la ïarap ïa ki Israel ban ïohkynti — ki shnong Ataroth, Dibon, Jaser, Nimrah, Heshbon, Elealeh, Sibmah, Nebo bad Beon — ka long ka jaka kaba bha na ka bynta ki jingri, bad ngi don shibun bah ki jingri.

⁵ Sngewbha ai ha ngi ïa kane ka jaka kum ka jingïohkynti jong ngi, bad to wat ai ïa ngi ban jam sha shiliang ka Jordan bad ban shong ban sah hangta.”

⁶ U Moses u jubab, “Phi ïakwah ban shong ban sah hangne katba kiwei pat ki Israel kin leit sha ka thma?

⁷ Kumno phi nud ban pyrshang ban pynnoh mynsiem ïa ki Israel na kaba jam sha shiliang ka Jordan ban leit sha kata ka ri ba U Trai u la ai ha ki?

⁸ Kata ka dei kaei ba ki kpa jong phi ki la leh haba nga la phah ïa ki na Kadesh Barnea ban leit swar ïa ka ri.

⁹ Ki la leit haduh ka Them Eshkol bad ki la ïohi ïa ka ri, hynrei ynda ki la wan phai ki la pynnoh mynsiem ïa ki briew na kaba leit rung sha ka ri ïa kaba U Trai u la ai ha ki.

¹⁰ U Trai u la bitar ha kata ka sngi, bad u la kular,

¹¹ ‘Nga smai ba namar kim shym la kohnguh ïa nga, uwei ruh na ki rangbah uba arphew snem lane kham heh uba la wan na Ijipt un ym ïohrung sha ka ri kaba nga la kular ha u Abraham, u Isaak, bad u Jakob.’

¹² Kane ka kynthup ïa uwei pa uwei baroh, lait noh u Kaleb u khun jong u Jephunneh uba na ka jait Kenis bad u Joshua u khun jong u Nun; ki la ïailong kiba kohnguh ïa U Trai.

¹³ U Trai u la bitar ïa u paidlang bad kumta u la pynlong ïa ki ban ïaidwir ha ka ri khlaw sawphew snem haduh ba kata ka pateng baroh kaba la pynsngewsih ïa U Trai ka la ïap lut.

¹⁴ Bad mynta phi la shim ïa ka jaka jong ki kpa tymmen jong phi, ka pateng bynriew bathymmai jong ki riewbymman kaba kloi ban pynwan biang ïa ka jingbitar kaba shyrkhei jong U Trai halor ki Israel sa shisien pat!

¹⁵ Lada phi ki briew na ka jait Reuben bad ka jait Gad phi kyntait ban bud ïa u mynta, sa shisien un iehnoh ïa kine ki briew baroh ha ka ri khlaw, bad phin kitkhlieh ïa ka jingpynjot thiaw ïa ki.”

¹⁶ Ki la wan hajan u Moses bad ki ong, “Nyngkong eh, shah ngin shna ki jingker maw hangne ïa ki langbrot jong ngi bad tei ïa ki shnong kiba la ker da ki kut baskhem na ka bynta kiba shaniah ha ngi.

¹⁷ Nangta ngin khreh ban leit bad la kiwei pat ki Israel sha ka thma bad ngin ïalam ban tur ïaleh haduh ba ngin da pynïoh pynsah ïa ki ha ka ri ka ban long ka jong ki. Ha kajuh ka por, kiba hap hapoh ka jingsumar sukher jong ngi ki lah ban sah hangne ha ki shnong kiba la ker da ki kut baskhem, khlem jingma na ki briew jong kane ka ri.

¹⁸ Ngin ym leit phai sha la ki longïing jong ngi tad haduh ba kiwei pat ki Israel baroh ki la shim kynti ïa ka ri kaba la ai ha ki.

¹⁹ Ngin ym shim kynti ïa kano kano ka jingdon jingem hapdeng jong ki ha kawei pat ka liang jong ka Jordan, namar ngi la ïohpdiang ïa la ka bhah hangne ha ka phang mihngi jong ka Jordan.”

²⁰ U Moses u jubab, “Lada phi da mut shisha kumba phi ong, te hangne ha khmat U Trai to khreh ban leit sha ka thma.

²¹ Baroh ki rangïapom jong phi kin jam sha shiliang ka Jordan bad hapoh ka jingïalam jong U Trai ki dei ban tur ïaleh ïa ki nongshun jong ngi haduh ba U Trai un da jop thiaw ïa ki

²² bad shim kynti ïa ka ri. Hadien kata, phi lah ban wan phai, namar phi la pyndep ïa ka kamram jong phi sha U Trai bad sha kiwei pat ki para Israel. Te U Trai un pynskhem ba kane ka ri sha mihngi jong ka Jordan ka dei ka jong phi.

²³ Hynrei lada phim bat ïa la ka kular, nga maham ïa phi ba phi leh pop pyrshah ïa U Trai. Wat bakla ïa kane; phin shah pynshitom namar ka pop jong phi.

²⁴ Kumta tei ïa ki shnong jong phi bad ki jingker ïa ki langbrot jong phi, hynrei leh ïa kaei kaba phi la kular.”

²⁵ Ki rangbah na ka jait Gad bad ka jait Reuben ki ong, “Kynrad, ngin leh kumba phi hukum.

²⁶ Ki tnga bad ki khun ki kti jong ngi, bad ki jingri lem bad ki langbrot jong ngi, kin sah hangne ha ki shnong ka Gilead.

²⁷ Hynrei baroh na ngi, ngi la kloi ban leit sha ka thma hapoh ka hukum jong U Trai. Ngin jam sha shiliang ka Jordan bad ïaleh, kumba phi la ong.”

²⁸ Kumta u Moses u la ai ïa kine ki hukum ha u Eleasar, u Joshua, bad ha kiwei pat ki nongïalam jong ki Israel:

²⁹ “Lada ki rangbah na ka jait Gad bad ka jait Reuben ki jam sha shiliang ka Jordan kiba la kloi ban ïaleh thma ha ka hukum jong U Trai bad lada da ka jingïarap jong ki phi lah ban jop ïa ka ri, te ai ha ki ïa ka ri Gilead kum ka jingïohkynti jong ki.

³⁰ Hynrei lada kim jam sha shiliang ka Jordan bad leit bad phi sha ka thma, kin ïoh ïa la ka bhah jong ka jingïohkynti ha ka ri Kanaan, kumba phi ïoh.”

³¹ Ki rangbah na ka jait Gad bad ka jait Reuben ki jubab, “Kynrad, ngin leh kumba U Trai u la hukum.

³² Hapoh ka hukum jong U ngin jam sha ka ri Kanaan bad leit sha ka thma, khnang ba ngi lah ban bat ïa ka jingïohkynti jong ngi hangne ha ka phang mihngi jong ka Jordan.”

³³ Kumta u Moses u la ai ha ki jait Gad bad Reuben, bad ha ka shiteng na ka jait Manasseh ïa ka hima jong u Syiem Sihon jong ki Amor bad ïa ka hima u syiem Og jong ka Bashan, kynthup ïa ki shnong bad ki jaka sawdong jong ki.

³⁴ Ka jait Gad ka tei biang ïa ki shnong ba la ker da ki kut: Dibon, Ataroth, Aroer,

³⁵ Atroth Shophan, Jaser, Jogbehah,

³⁶ Beth Nimrah, bad Beth Haran.

³⁷ Ka jait Reuben ka tei biang ïa ka Heshbon, ka Elealeh, ka Kiriathaim,

³⁸ Ka Nebo, ka Baal Meon (ïa kane ka kyrteng la pynkylla,) bad ka Sibmah. Ki la ai kyrteng thymmai ïa ki shnong kiba ki la tei biang.

³⁹ Ka kur u Makhir u khun jong u Manasseh ka la hiarthma ïa ka ri Gilead, bad ka la ïohknieh ïa ka, bad beh krad ïa ki Amor kiba don hangta.

⁴⁰ Kumta u Moses u la ai ïa ka Gilead ha ka kur jong u Makhir, bad ki la shong la sah hangta.

⁴¹ U Jair uba na ka jait Manasseh u la tur ïaleh bad ïohknieh katto katne ki shnong bad u la khot kyrteng ïa ki “Ki shnong u Jair.”

⁴² U Nobah u la tur ïaleh bad ïohknieh ïa ka Kenath bad ki shnong jong ka, bad u la khot kyrteng thymmai ïa ka, ka Nobah, kaba dei ka kyrteng jong u hi.