JINGKHEIÑ 31 - Khasi CL Bible (BSI)

Ka thma pyrshah ïa ki Midian

¹ U Trai u ong ha u Moses,

² “Pynshitom ïa ki Midian namar kaei kaba ki la leh ïa ki paid Israel. Hadien ba me la pyndep ïa kata, men sa ïap.”

³ Kumta u Moses u ong ha u paidbah, “Khreh ban ïaleh thma, ba phi lah ban tur ïaleh ïa ki Midian bad pynshitom ïa ki namar kaei kaba ki la leh ïa U Trai.

⁴ Na kawei kawei ka jait Israel phah shihajar ngut ki rangbah sha ka thma.”

⁵ Kumta na kawei kawei ka jait la jied shihajar ngut ki rangbah, baroh ki long khat-ar hajar ngut ki rangbah kiba la khreh ban ïaleh thma.

⁶ U Moses u la phah ïa ki sha ka thma ha ka jingïalam u Phinehas u khun jong u Eleasar u lyngdoh, uba khmih ïa ki tiar kiba kyntang bad ïa ki turoi ban ai dak ha ka thma.

⁷ Ki la tur ïaleh ïa ki Midian, kumba U Trai u la hukum ïa u Moses, bad ki la pynïap lut ïa ki rangbah baroh,

⁸ kiba kynthup ïa ki san ngut ki syiem Midian: u Ebi, u Rekem, u Sur, u Hur, bad u Reba. Ki la pynïap ruh ïa u Balaam u khun jong u Beor.

⁹ Ki Israel ki la kem ïa ki kynthei Midian bad ïa ki khun rit jong ki, ki la shim ïa ki masi bad ki jingri jong ki, bad ki la lute ïa ki spah jong ki baroh,

¹⁰ bad ki la thang ïa ki shnong bad ki jaka shong dara jong ki baroh.

¹¹ Ki la shim ïa ki jinglute baroh kiba ki la kurup, kynthup ruh ïa ki koidi bad ki jingri,

¹² bad ki la leit lam ïa ki sha u Moses bad u Eleasar, bad sha ka kynhun ki paid Israel kiba don ha ka jaka shong dara ha ki pyntha Moab sha shiliang ka Jordan na ka Jerikho.

Ka kynhun shipai ka wan phai

¹³ U Moses, u Eleasar, bad baroh ki nongïalam jong uta u paidlang ki la mih shabar ka jaka shong dara ban ïakynduh ïa ka kynhun shipai.

¹⁴ U Moses u la bitar ïa ki rangbah nongïalam jong ki kynhun shipai kiba la wan phai na ka thma.

¹⁵ U kylli ïa ki, “Balei ba phi dang pyllait im ïa ki kynthei baroh?

¹⁶ Kynmaw ba ki dei ki kynthei kiba la kohnguh ïa ki jingbthah jong u Balaam bad ha Peor ki la ïalam ïa ki briew ban klet ïa U Trai. Dei kata kaba la wallam ïa ka khlam ha ki briew jong U Trai.

¹⁷ Kumta pynïap mynta ïa uwei pa uwei u khynnah bad ruh ïa kawei pa kawei ka kynthei kaba la ïathiah shongkha,

¹⁸ hynrei pyllait im ïa ki khynnah kynthei bad ïa ki kynthei baroh kiba dang sotti na ka bynta ïa lade.

¹⁹ Mynta pat, baroh na phi kiba la pynïap ïano ïano lane kiba la ktah ïa ka metïap ki dei ban sah shabar ka jaka shong dara hynñiew sngi lynter. Ha ka sngi kaba lai bad ka sngi kaba hynñiew, pynkhuid ïa lade bad ïa ki kynthei kiba phi la kem.

²⁰ Phi dei ruh ban pynkhuid ïa kawei pa kawei ka jaiñphong, bad ïa kaei kaei baroh ïa kaba la shna da ka snieh mrad, da u shñiuh blang, ne da ka dieng.”

²¹ U Eleasar u lyngdoh u ong ha kita ki rangbah kiba la wan phai na ka thma, “Kine ki long ki jingbuhbeit ryntih kiba U Trai u la ai ha u Moses.

^22-23 Ïa kaei kaei baroh ka bym ing, kum ka ksiar, ka rupa, ka rnong, u nar, ka tin, ne ka sisa, dei ban pynkhuid ïa ka ha ka ding. Ïa kiwei pat dei ban pynkhuid da ka um ka jingpynkhuid.

²⁴ Ha ka sngi kaba hynñiew phi dei ban sait ïa la ki jaiñ; te phin sa long kiba khuid kat kum ka jinglehniam bad yn sa shah ïa phi ban rung sha ka jaka shong dara.”

Ka jingïasam ïa ka jinglute

²⁵ U Trai u ong ha u Moses,

²⁶ “Ma me bad u Eleasar, lem bad ki nongïalam jong u paidlang, phi dei ban ñiew ïa kaei kaei baroh kaba la kurup, kaba kynthup ïa ki koidi bad ki jingri.

²⁷ Ïasam ïa kata kaba la shim ha ki ar bynta, shi bynta na ka bynta ki shipai bad shi bynta na ka bynta kaba sah jong u paidlang.

²⁸ Na ka bynta kaba dei ka jong ki shipai, bat noh kum ka khajna ïa U Trai uwei na man ki sanspah ngut ki koidi bad katjuh ka jingmang na ki masi, ki kada, ki langbrot, bad ki blang.

²⁹ Ai ïa ki ha u Eleasar u lyngdoh kum ka jingainguh kaba kyrpang sha U Trai.

³⁰ Na ka bynta kaba la ai ïa kaba sah jong u paidlang, shim uwei na man ki sanphew ngut ki koidi bad katjuh ka jingmang na ki masi, ki kada, ki langbrot, bad ki blang. Ai ïa ki ha ki Lebi kiba khmih ïa ka Ïingjaiñ U Trai.”

³¹ U Moses bad u Eleasar ki la leh ïa kaei ba U Trai u la hukum.

^32-35 Kane harum ka long ka thup kyrteng jong kaei kaba la kurup da ki shipai, nalor kaei kaba ki la buh na ka bynta ïa lade: hynriew lakh hynñiewphew san hajar tylli ki langbrot bad ki blang, hynñiewphew ar hajar tylli ki masi, hynriewphew wei hajar tylli ki kada, bad laiphew ar hajar ngut ki theisotti.

^36-40 Ka bhah jong ki shipai, kaba shiteng na kata, ka long lai lakh laiphew hynñiew sanspah tylli ki langbrot bad ki blang, bad na kita, hynriewspah hynñiewphew san tylli ki long ka khajna ïa U Trai; laiphew hynriew hajar tylli ki jingri na ka bynta ki shipai, bad na kita, hynñiewphew ar tylli ki long ka khajna ïa U Trai; laiphew hajar sanspah tylli ki kada na ka bynta ki shipai, bad na kita, hynriewphew wei tylli ki long ka khajna sha U Trai; bad khathynriew hajar ngut ki theisotti, na ka bynta ki shipai, bad na kita, laiphew ar ngut ki long ka khajna sha U Trai.

⁴¹ Kumta u Moses u ai ha u Eleasar ïa ka khajna kum ka jingainguh kaba kyrpang sha U Trai, kumba U Trai u la hukum.

^42-46 Ka bhah jong u paidlang ka long kumjuh kum ka jong ki shipai: lai lakh laiphew hynñiew hajar sanspah tylli ki langbrot bad ki blang, laiphew hynriew hajar tylli ki masi, laiphew hajar sanspah tylli ki kada, bad khathynriew hajar ngut ki theisotti.

⁴⁷ Na kane ka bhah, u Moses u la shim uwei na man ki sanphew ngut ki koidi bad uwei na man ki sanphew tylli ki jingri, bad kumba U Trai u la hukum, u la ai ïa ki ha ki Lebi kiba khmih ïa ka Ïingjaiñ U Trai.

⁴⁸ Nangta ki nongïalam jong kata ka kynhun shipai ki la leit sha u Moses,

⁴⁹ bad ki ong, “Kynrad, ngi la ñiew ïa ki shipai kiba hapoh ka jingïalam jong ngi; ym don uwei ruh na ki uba jah.

⁵⁰ Kumta ngi wallam sha U Trai ïa ki jingdeng ksiar, ki syngkha, ki khadu, ki sati, ki sohshkor, bad ki kpieng kiba uwei pa uwei na ngi, ngi la shim. Ngi ai ïa ki sha U Trai kum ka jingburia ïa ka jingim jong ngi, ba kumta un ïada ïa ngi.”

⁵¹ U Moses bad u Eleasar ki la pdiang ïa ka ksiar, baroh kaba la long ha ka dur ki jingdeng.

⁵² Ka jingai baroh jong ki nongïalam ka khia kumba arspah kilo.

⁵³ Kito ki bym dei ki nongïalam te ki la bat ha lade ïa ka jinglute kaba ki la shim.

⁵⁴ Kumta u Moses bad u Eleasar ki la shim ïa ka ksiar sha ka Ïingjaiñ, ba kumta U Trai un ïada ïa ki paid Israel.