JINGKHEIÑ 30 - Khasi CL Bible (BSI)

Ki Aiñ shaphang ki jingkular

¹ U Moses u ai ïa kine ki jingbthah ha ki nongïalam na ki jait Israel.

² Haba u briew u kular ban ai ei ei sha U Trai, lane u smai ban kyndiah na kaei re kaei, um dei ban pynkheiñ ïa la ka kular, hynrei u dei ban pyndep lut ïa baroh kaba u la ong ban pyndep.

³ Haba ka theisamla kaba dang sah bad la u kpa ka kular ban ai ei ei sha U Trai, lane ka kular ban kyndiah na kano kano,

⁴ ka dei ban leh lut kumba ka la kular lymda u kpa jong ka u pynpaw ka jingsngew pyrshah haba u ïohsngew ïa kata.

⁵ Hynrei lada u kpa jong ka, u khang ïa ka ban pyndep ïa ka kular haba u ïohsngew ïa kata, kam donkam ban bat ïa kata ka kular. U Trai un map ïa ka, namar ba u kpa jong ka, u khang ba kan bat ïa kata.

⁶ Lada ka kynthei ka bym pat shongkurim ka pynlong ka jingkular, da kaba mut khnang ne khlem da pyrkhat ban kyndiah na kano kano bad nangta ka shongkurim,

⁷ ka dei ban pyndep lut ïa kata kaba ka la kular lymda u tnga jong ka u pynpaw ka jingsngew pyrshah haba u ïohsngew ïa kata.

⁸ Hynrei lada u tnga jong ka, u khang ïa ka ban pyndep ïa ka kular haba u ïohsngew ïa kata, kam donkam ban bat ïa kata. U Trai un map ïa ka.

⁹ Ka riewkynthei lane ka kynthei kaba la ïapyllait tnga ka dei ban pyndep ïa kawei pa kawei ka jingkular ba ka la ai ban kyndiah noh na kano kano.

¹⁰ Lada ka kynthei kaba la shongkurim ka kular ban kiar na kano kano,

¹¹ ka dei ban pyndep lut ïa kata kaba ka la kular lymda u tnga jong ka u pynpaw ka jingsngew pyrshah haba u ïohsngew ïa kata.

¹² Hynrei lada u tnga jong ka, u khang ïa ka ban pyndep ïa ka kular, kam donkam ban bat ïa kata. U Trai un map ïa ka, namar ba u tnga jong ka, u khang ïa ka na kaba bat ïa ka kular.

¹³ U tnga jong ka u don hok ban pynskhem ne ban pyndam ïa kano kano ka jingkular ba ka la pynlong.

¹⁴ Hynrei lada ha ka sngi ba u ïohsngew ïa ka jingkular, um shym pynpaw ka jingsngew pyrshah, ka dei ban pyndep lut ïa kaba ka la kular. U la pynskhem ïa ka jingkular da kaba um pyrshah ei ei ha kata ka sngi ba u ïohsngew ïa ka.

¹⁵ Hynrei lada u pyndam ïa kata hadien, un hap ban shah ïa ki jingpynshitom na ka jingbymlah ban pyndep ïa ka kular.

¹⁶ Kine ki dei ki aiñ ba U Trai u la ai ha u Moses kiba ïadei bad ki jingkular ba la pynlong da ka theisamla kaba dang sah ha ka ïing u kpa jong ka lane da ka kynthei kaba la shongkurim.