JINGKHEIÑ 3 - Khasi CL Bible (BSI)

Ki khun shynrang jong u Aaron

¹ Kine ki long kiba na ka longïing longsem jong u Aaron bad u Moses ha ka por ba U Trai u kren ha u Moses ha u Lum Sinai.

² U Aaron u don saw ngut ki khun shynrang: U Nadab uba heh duh, u Abihu, u Eleasar, bad u Ithamar.

³ La pynsleh bad la pynkyntang ïa ki kum ki lyngdoh,

⁴ hynrei u Nadab bad u Abihu ki la shah pynïap mynba ki ainguh da ka ding bymkhuid sha U Trai ha ka ri Shyiap Sinai. Kine kim don khun don kti, kumta u Eleasar bad u Ithamar ki la shakri kum ki lyngdoh katba u Aaron u dang im.

La thung ïa ki Lebi ban shakri ïa ki lyngdoh

⁵ U Trai u ong ha u Moses,

⁶ “Wan ïalam ïa kiba na ka jait Lebi bad thung ïa ki kum ki shakri ïa u Aaron u lyngdoh.

⁷ Kin trei ïa ka kam kat kaba donkam ha ka Ïingjaiñ ka Jingdon Ryngkat jong nga bad kin pyndep ïa ki kamram na ka bynta ki lyngdoh bad na ka bynta ka kynhun baroh kawei.

⁸ Ki dei ban sumar ïa baroh ki tiar ki tar ka Ïingjaiñ bad ban pyndep ïa ki kamram kiba ïadei bad ki Israel.

⁹ Ka kamram ba ki Lebi ki don ka long tang ban shakri ïa u Aaron bad ïa ki khun shynrang jong u.

¹⁰ Phin thung ïa u Aaron bad ïa ki khun shynrang jong u ban pyndep ïa ki kamram ka jinglong lyngdoh; uno uno uwei pat uba pyrshang ban leh kumta un shah pynïap.”

¹¹ U Trai u ong ha u Moses,

^12-13 “Ki Lebi mynta ki long ki jong nga. Mynba nga la pynïap ïa u khun nyngkong baroh jong ki nong Ijipt, nga la pynkyntang kum la u jong ïa u khun nyngkong na kawei pa kawei ka ïing Israel bad ïa uba la kha nyngkong na uwei pa uwei u mrad. Mynta, nga ïoh noh da ki Lebi kum la ki jong ha ka jaka ki khun shynrang ba la kha nyngkong jong ki Israel; ki kin long ki jong nga. Nga long U Trai.”

Ka jingkheiñ ïa ka jingdon ki Lebi

¹⁴ Hangta ha ka ri shyiap Sinai U Trai u hukum ïa u Moses

¹⁵ ban buh jingthoh ïa ki Lebi katno ngut ki don shi kur shi kur bad shi ïing shi ïing, da kaba thoh kyrteng ïa uwei pa uwei u shynrang uba la dap shi bnai ne kham heh,

¹⁶ bad u Moses u la leh kumta kumba U Trai u la hukum.

^17-20 U Lebi u don lai ngut ki khun shynrang, u Gershon, u Kohath, bad u Merari, kiba long ki kpa tymmen jong kita ki kur kiba don ïa ki kyrteng jong ki. U Gershon u don ar ngut ki khun shynrang: U Libni bad u Shimei; u Kohath u don saw ngut ki khun shynrang: u Amram, u Ishar, u Hebron, bad u Ussiel; bad u Merari u don ar ngut ki khun shynrang: u Mahli bad u Mushi. Kine ki long ki kpa tymmen jong kito ki ïing kiba don ïa ki kyrteng jong ki.

²¹ Na ka jait u Gershon ki mih ki longïing jong u Libni bad u Shimei; kine ki long ki jait Gershon.

²² Ki shynrang baroh kiba la dap shi bnai lane kham heh kiba la shah ñiew kyrteng ki long hynñiew hajar sanspah ngut.

²³ Ki kur u Gershon ki dei ban shong dara shaphang sepngi shadien ka Ïingjaiñ,

²⁴ lem bad u Eliasaph u khun jong u Lael kum u rangbah kur.

²⁵ Kine kin kitkhlieh ïa ka Ïingjaiñ, ïa ka jingsop kaba shapoh bad kaba shalor jong ka, ïa ka pyrda jong ka jingkhang,

²⁶ ïa ki pyrda jong ka phyllaw kaba long baroh sawdong ïa ka Ïingjaiñ bad ïa ka duwan, bad ïa ka pyrda ïa ka jingkhang jong ka phyllaw. Kin kitkhlieh ïa ki kam baroh kiba ïadei bad kine ki tiar ki tar.

²⁷ Na ka jait u Kohath ki mih ki longïing jong u Amram, u Ishar, u Hebron, bad u Ussiel.

²⁸ Ki shynrang baroh kiba la dap shi bnai lane kham heh kiba la shah ñiew ki long phra hajar hynriewspah ngut.

²⁹ Kine ki kur u Kohath kin shong dara ha ka liang kaba shaphang shathie jong ka Ïingjaiñ,

³⁰ lem bad u Elisaphan u khun jong u Ussiel kum u rangbah kur.

³¹ Kine kin kitkhlieh ïa ka Synduk ka Jutang, ïa ka miej, ïa u diengpynïeng sharak, ïa ki duwan, ïa ki khiew ki pliang ba ki lyngdoh ki pyndonkam ha ka Jaka Kyntang, bad ïa ka pyrda ha ka jingkhang sha ka Jaka kaba Kyntang Tam. Kin kitkhlieh ïa ki kam baroh kiba ïadei bad kine tiar ki tar.

³² Uba rangbah duh na ki Lebi u dei u Eleasar u khun jong u Aaron uba long lyngdoh. U dei uba khmih ïa kito kiba pyndep ïa ki kamram ha ka Jaka Kyntang.

³³ Na ka jait u Merari ki mih ki longïing jong u Mahli bad u Mushi.

³⁴ Ki shynrang baroh kiba la dap shi bnai lane kham heh kiba la shah ñiew ki long hynriew hajar arspah ngut.

³⁵ Kine ki kur u Merari kin shong dara ha ka liang kaba shaphang shatei jong ka Ïingjaiñ, lem bad u Suriel u khun jong u Abihail kum u rangbah kur.

³⁶ Kine kin kitkhlieh ïa ki tiar pynïeng Ïingjaiñ, ïa ki diengkhap, ïa ki rijied, ïa ki thliew tnaw, bad ïa ki tiar pyndait jong ka baroh. Kin kitkhlieh ruh ïa ki kam baroh kiba ïadei bad kine ki tiar ki tar.

³⁷ Kin kitkhlieh ruh ïa ki rijied, ïa ki thliew tnaw, ïa ki snar, bad ïa ki tyllai jong ka phyllaw.

³⁸ U Moses bad u Aaron bad ki khun shynrang jong u ki dei ban shong dara ha khmat ka Ïingjaiñ shaphang mihngi. Kine kin kitkhlieh ïa ki kam niam baroh kiba dei ban pyndep ha ka Jaka Kyntang na ka bynta ki Israel. Uno uno uwei pat uba pyrshang ban leh kumta un shah pynïap.

³⁹ Ki shynrang baroh na ka jait Lebi kiba la dap shi bnai bad kham heh ïa kiba u Moses bad u Aaron ki la ñiew shi kur shi kur da ka hukum U Trai ki long arphew ar hajar ngut.

Ki Lebi ki shim ïa ka jaka ki khun shynrang ba la kha nyngkong

⁴⁰ U Trai u ong ha u Moses, “Buh jingthoh ïa ki shynrang ba la kha nyngkong baroh jong ki Israel naduh kiba shi bnai lane kham heh, bad ñiew ïa ki kyrteng jong ki.

⁴¹ Hynrei ha ka jaka jong ki, nga dawa ïa ki Lebi baroh ba kin long ki jong nga. Nga long U Trai! Nga dawa ruh ïa ki jingri jong ki Lebi ha ka jaka jong kito baroh kiba la kha nyngkong na ki jingri jong ki Israel.”

⁴² U Moses u kohnguh bad u buh jingthoh ïa ki khun shynrang baroh kiba la kha nyngkong ha Israel kumba U Trai u la hukum,

⁴³ kiba la dap shi bnai lane kham heh; baroh ki long arphew ar hajar arspah hynñiewphew lai ngut.

⁴⁴ U Trai u ong ha u Moses,

⁴⁵ “Pynkyntang mynta ïa ki Lebi kum ki jong nga ha ka jaka ki khun shynrang ba la kha nyngkong baroh napdeng ki paid Israel, bad pynkyntang ruh ïa ki jingri jong ki Lebi ha ka jaka kito kiba la kha nyngkong na ki jingri jong ki Israel.

⁴⁶ Namar ba ki khun shynrang ba la kha nyngkong napdeng ki Israel ki tam arspah hynñiewphew lai ngut ïa ki Lebi, phi dei ban pyllait pat ïa kine ki khun shynrang kiba tam,

⁴⁷ da kaba siewdor ïa uwei uwei san shekel ka rupa kat kum ka jingthew kaba buh ryntih,

⁴⁸ bad ai ïa kata ka rupa ha u Aaron bad ki khun shynrang jong u.”

⁴⁹ U Moses u la kohnguh bad u la shim

⁵⁰ shihajar laispah hynriewphew san shekel ka rupa,

⁵¹ bad u ai ïa ki ha u Aaron bad ki khun shynrang jong u.