JINGKHEIÑ 29 - Khasi CL Bible (BSI)

Ki jingainguh ha ka Jingkhawai Niam Snem Thymmai

¹ Ha ka sngi kaba nyngkong jong u bnai uba hynñiew phi dei ban ïalumlang ban mane Blei, bad wat trei kano kano ka kam. Ha kata ka sngi put ïa ki turoi.

² Wanrah ïa ka jingainguh thang sha U Trai, ka jingiw kaba pynsngewbha ïa u: uwei u masi lyngraw, uwei u langbrot, bad hynñiew tylli ki khunlangbrot shynrang kiba shisnem ka rta, ki bym don kano kano ka jingduna.

³ Ainguh ïa ka jingainguh bam da u 'purew ba la khleh bad ka umphniang Olib: lai kilo u 'purew lem bad u masi lyngraw, sa ar kilo u 'purew lem bad u langbrot,

⁴ bad sa shi kilo u 'purew lem bad uwei u khunlangbrot.

⁵ Kñia ruh uwei u 'langsohmoh kum ka jingkñia namar ka pop, bad ha kane ka rukom pyndep ïa ka jinglehniam ka jingpynkhuid ïa u paidbah.

⁶ Wanrah ïa kine nalor ka jingainguh thang kaba ju leh ha ka sngi nyngkong jong u bnai lem bad ka jingainguh bam jong ka, bad ïa ka jingainguh thang kaba man ka sngi lem bad ka jingainguh bam bad ka jingainguh waiñ jong ka. Kine ki jingainguh bam ki long ka jingiw kaba pynsngewbha ïa U Trai.

Ki jingainguh ha ka sngi ka jingpynïasuk

⁷ Ïalumlang ban mane Blei ha ka sngi kaba shiphew jong u bnai uba hynñiew; wat bam ei ei bad wat trei kano kano ka kam.

⁸ Wanrah ïa ka jingainguh thang sha U Trai, ka jingiw kaba pynsngewbha ïa u: uwei u masi lyngraw, uwei u langbrot bad hynñiew tylli ki khunlangbrot shynrang kiba shisnem ka rta, ki bym don kano kano ka jingduna.

⁹ Ai ïa ka jingainguh bam da u 'purew ba la khleh bad ka umphniang Olib: lai kilo u 'purew lem bad u masi lyngraw, ar kilo u 'purew lem bad u langbrot,

¹⁰ bad shi kilo u 'purew lem bad uwei u khunlangbrot.

¹¹ Ai ruh uwei u 'langsohmoh kum ka jingkñia namar ka pop nalor u 'langsohmoh ba la ai ha ka jinglehniam ka jingpynkhuid ïa u paidbah, bad ïa ka jingainguh thang kaba man ka sngi lem bad ka jingkñia ainguh bam bad ka jingainguh waiñ jong ka.

Ki jingainguh ha ka Jingkhawai Niam Ki Ïingtrep

¹² Ïalumlang ban mane Blei ha ka sngi kaba khatsan jong u bnai uba hynñiew. Rakhe ïa kane ka Jingkhawai Niam ha kaba ai burom ïa U Trai hynñiew sngi lynter, bad wat trei kano kano ka kam.

¹³ Ha kane ka sngi kaba nyngkong, ai ïa ka jingainguh bam ha U Trai, ka jingiw kaba pynsngewbha ïa u: khatlai tylli ki masi lyngraw, ar tylli ki langbrot shynrang, bad khatsaw tylli ki khunlangbrot shynrang kiba shisnem ka rta, baroh ki dei ban long ki bym don kano kano ka jingduna.

¹⁴ Ai ïa ka jingainguh bam da u 'purew ba la khleh bad ka umphniang Olib: lai kilo u 'purew lem bad uwei u masi lyngraw, ar kilo u 'purew lem bad uwei u langbrot,

¹⁵ bad shi kilo u 'purew lem bad uwei u khunlangbrot, lem ryngkat bad ïa ki jingainguh waiñ kiba donkam.

¹⁶ Ai ruh uwei u 'langsohmoh kum ka jingkñia namar ka pop. Ai ïa kine nalor ka jingainguh thang kaba man ka sngi lem bad ka jingainguh bam bad ka jingainguh waiñ jong ka.

¹⁷ Ha ka sngi kaba ar, kñia khat-ar tylli ki masi lyngraw, ar tylli ki langbrot shynrang, bad khatsaw tylli ki khunlangbrot shynrang kiba shisnem ka rta, ki bym don kano kano ka jingduna.

^18-19 Ai ïa ki lem bad kita kiwei pat ki jingainguh baroh kiba la pyndep ha ka sngi kaba nyngkong.

²⁰ Ha ka sngi kaba lai, ai khatwei tylli ki masi lyngraw, ar tylli ki langbrot shynrang, bad khatsaw tylli ki khunlangbrot shynrang kiba shisnem ka rta, ki bym don kano kano ka jingduna.

^21-22 Ai ïa ki lem bad kita kiwei pat ki jingainguh baroh kiba la pyndep ha ka sngi kaba nyngkong.

²³ Ha ka sngi kaba saw, ai shiphew tylli ki masi lyngraw, ar tylli ki langbrot shynrang, bad khatsaw tylli ki khunlangbrot shynrang kiba shisnem ka rta, ki bym don kano kano ka jingduna.

^24-25 Ai ïa ki lem bad kita kiwei pat ki jingainguh baroh kiba la pyndep ha ka sngi kaba nyngkong.

²⁶ Ha ka sngi kaba san, ai khyndai tylli ki masi lyngraw, ar tylli ki langbrot shynrang, bad khatsaw tylli ki khunlangbrot shynrang kiba shisnem ka rta, ki bym don kano kano ka jingduna.

^27-28 Ai ïa ki lem bad kita kiwei pat ki jingainguh baroh kiba la pyndep ha ka sngi kaba nyngkong.

²⁹ Ha ka sngi kaba hynriew, ai phra tylli ki masi lyngraw, ar tylli ki langbrot shynrang, bad khatsaw tylli ki khunlangbrot shynrang kiba shisnem ka rta, ki bym don kano kano ka jingduna.

^30-31 Ai ïa ki lem bad kita kiwei pat ki jingainguh baroh kiba la pyndep ha ka sngi kaba nyngkong.

³² Ha ka sngi kaba hynñiew, ai hynñiew tylli ki masi lyngraw, ar tylli ki langbrot shynrang, bad khatsaw tylli ki khunlangbrot shynrang kiba shisnem ka rta, ki bym don kano kano ka jingduna.

^33-34 Ai ïa ki lem bad kita kiwei pat ki jingainguh baroh kiba la pyndep ha ka sngi kaba nyngkong.

³⁵ Ha ka sngi kaba phra, ïalumlang ban mane Blei, bad wat trei kano kano ka kam.

³⁶ Ai ïa ka jingainguh thang kum ka jingainguh bam sha U Trai, ka jingiw kaba pynsngewbha ïa u: uwei u masi lyngraw, uwei u langbrot, bad hynñiew tylli ki khunlangbrot shynrang kiba shisnem ka rta, ki bym don kano kano ka jingduna.

^37-38 Ai ïa ki lem bad kita kiwei pat ki jingainguh baroh kiba la pyndep ha ka sngi kaba nyngkong.

³⁹ Kine ki long ki jingbuhbeit ryntih kiba ïadei bad ki jingainguh thang, ki jingainguh bam, ki jingainguh waiñ, bad ki jingainguh ïasyllok ba phi dei ban ai sha U Trai ha ki Jingkhawai Niam ba la buh. Kine ki long nalor kito ki jingainguh kiba phi ai ha kaba pyndep ïa ka jingkular lane kum ki jingainguh mon sngewbha.

⁴⁰ Kumta u Moses u la kren ha ki paid Israel ïa kaei kaei baroh ba U Trai u la hukum ïa u.