JINGKHEIÑ 28 - Khasi CL Bible (BSI)

Ki jingainguh ba dei ban ai ha ka por ba la buh

¹ U Trai u hukum ïa u Moses

² ban hikai ïa ki Israel ban wanrah sha U Blei ha ki por ba la buh ïa ki jingainguh bam badonkam kiba pynsngewbha ïa u.

³ Kine ki long ki jingainguh bam kiba dei ban wanrah sha U Trai: na ka bynta ka jingainguh thang kaba man ka sngi, ar tylli ki khunlangbrot shynrang kiba shisnem ka rta ki bym don kano kano ka jingduna.

⁴ Ainguh ïa uwei mynstep bad uwei pat janmiet,

⁵ lem bad ka jingainguh bam kaba shi kilo u 'purew ba la khleh lang bad shi litar ka umphniang Olib kaba bha tam.

⁶ Kane ka long ka jingainguh kaba man ka sngi ba la thang lut, kaba la leh nyngkong ha u Lum Sinai kum ka jingainguh bam, ka jingiw kaba pynsngewbha ïa U Trai.

⁷ Kum ka jingainguh da ka waiñ lem bad u khunlangbrot uba nyngkong, theh shi litar ka waiñ ha ka duwan.

⁸ Ynda janmiet pat, ainguh ïa u langbrot uba ar ha kajuh ka rukom kumba la leh ïa ka jingainguh kaba mynstep, ryngkat bad ka jingainguh da ka waiñ. Kane ruh ka dei ka jingainguh bam, ka jingiw kaba pynsngewbha ïa U Trai.

Ka jingainguh Sabbaton

⁹ Ha ka sngi Sabbaton ainguh ar tylli ki khunlangbrot shynrang kiba shisnem ka rta bad ki bym don kano kano ka jingduna lem bad ar kilo u 'purew ba la khleh bad ka umphniang Olib kum ka jingainguh bam, bad ka jingainguh da ka waiñ.

¹⁰ Ïa kane ka jingainguh thang dei ban ainguh man la ka Sabbaton nalor ka jingainguh kaba man ka sngi lem bad ka jingainguh da ka waiñ.

Ka jingainguh ha ka sngi nyngkong jong u Bnai

¹¹ Man ba sdang u bnai, wanrah ka jingainguh thang sha U Trai: ar tylli ki masi lyngraw, uwei u langbrot, bad hynñiew tylli ki khunlangbrot shynrang kiba shisnem ka rta, ki bym don kano kano ka jingduna.

¹² Kum ka jingainguh bam, wanrah u 'purew ba la khleh bad ka umphniang Olib: lai kilo u 'purew lem bad uwei u masi lyngraw; ar kilo u 'purew lem bad u langbrot;

¹³ bad shi kilo u 'purew lem bad uwei u khunlangbrot. Kine ki jingainguh thang ki dei ki jingainguh bam, ka jingiw kaba pynsngewbha ïa U Trai.

¹⁴ Ka jingainguh waiñ kaba biang ka long ar litar ka waiñ lem bad uwei u masi lyngraw, shi litar shiteng ka waiñ lem bad u langbrot, bad shi litar ka waiñ lem bad uwei u khunlangbrot. Kane ka long ka jingbuh ryntih ïa ka jingainguh thang na ka bynta ka sngi nyngkong kaba man la u bnai baroh shisnem.

¹⁵ Nalor kane ka jingainguh thang kaba man ka sngi lem bad ka jingainguh waiñ jong ka, kñia ruh uwei u 'langsohmoh kum ka jingkñia namar ka pop.

Ki jingainguh ha ka Jingkhawai Niam U Kpu Bakhlem Thiat

¹⁶ Ïa ka Jingkhawai Niam Ka Jinglait ha kaba pyndonburom ïa U Trai dei ban pynlong ha ka sngi kaba khatsaw jong u bnai uba nyngkong.

¹⁷ Ha ka sngi kaba khatsan, ka sngi ha kaba ka Jingkhawai Niam kaba neh hynñiew sngi ka sdang; ha kata ka por dei ban bam tang ïa u kpu ba la shet khlem thiat.

¹⁸ Ha ka sngi kaba nyngkong jong ka Jingkhawai Niam, phi dei ban ïalumlang ban mane Blei, bad phim dei ban treikam ei ei ha kata ka sngi.

¹⁹ Wanrah ïa ka jingainguh thang kum ka jingainguh bam ha U Trai: ar tylli ki masi lyngraw, uwei u langbrot, bad hynñiew tylli ki khunlangbrot shynrang kiba shisnem ka rta, ki bym don kano kano ka jingduna.

²⁰ Wanrah ïa ka jingainguh bam kaba dei da u 'purew ba la khleh bad ka umphniang Olib: lai kilo u 'purew lem bad uwei u masi lyngraw, ar kilo u 'purew lem bad u langbrot,

²¹ bad shi kilo u 'purew lem bad uwei u khunlangbrot.

²² Kñia ruh uwei u 'langsohmoh kum ka jingkñia namar ka pop, bad ha kane ka rukom pyndep ïa ka jinglehniam ka jingpynkhuid ïa u paidbah.

²³ Ainguh ïa kine nalor ki jingainguh thang kiba man ka step.

²⁴ Ha kajuh ka rukom, ainguh ha U Trai ïa ka jingainguh bam hynñiew sngi lynter, ka jingiw kaba pynsngewbha ïa U Trai. Ainguh ïa kane nalor ka jingainguh bam bad ka jingainguh waiñ kaba man ka sngi.

²⁵ Ha ka sngi kaba hynñiew ïalumlang ban mane Blei, bad wat treikam ei ei.

Ki jingainguh ha ka Jingkhawai Niam ka Jingot

²⁶ Ha ka sngi kaba nyngkong jong ka Jingkhawai Niam ka Jingot, haba phi wanrah ïa ka jingainguh da u kew thymmai sha U Trai, phi dei ban ïalumlang ban mane Blei, bad phim dei ban treikam ei ei.

²⁷ Wanrah ïa ka jingainguh thang kum ka jingiw kaba pynsngewbha ïa U Trai: ar tylli ki masi lyngraw, uwei u langbrot, bad hynñiew tylli ki khunlangbrot shynrang kiba shisnem ka rta, ki bym don kano kano ka jingduna.

²⁸ Wanrah ïa ka jingainguh bam da u 'purew ba la khleh bad ka umphniang Olib: lai kilo u 'purew lem bad uwei u masi lyngraw, ar kilo u 'purew lem bad u langbrot,

²⁹ bad shi kilo u 'purew lem bad uwei u khunlangbrot.

³⁰ Kñia ruh uwei u 'langsohmoh kum ka jingkñia namar ka pop, bad ha kane ka rukom pyndep ïa ka jinglehniam ka jingpynkhuid ïa u paidbah.

³¹ Wanrah ïa kine bad ïa ka jingainguh waiñ nalor ka jingainguh thang bad ka jingainguh bam kaba man ka sngi.