JINGKHEIÑ 27 - Khasi CL Bible (BSI)

Ki khun kynthei u Selophehad

¹ Ka Mahlah, ka Noah, ka Hoglah, ka Milkah, bad ka Tirsah, ki long ki khun kynthei jong u Selophehad u khun jong u Hepher, u khun jong u Gilead, u khun jong u Makhir, u khun jong u Manasseh, u khun jong u Joseph.

² Ki la leit ban ïeng ha khmat u Moses, u Eleasar u lyngdoh, ki nongïalam, bad u paid Israel baroh ha ka jaka rung sha ka Ïingjaiñ ka Jingdon Ryngkat U Trai, bad ki ong,

³ “I pa jong ngi i la ïap ha ka ri khlaw khlem khun shynrang. Im shym ïadon lang bad ki nongbud jong u Korah kiba la ïaleh pyrshah ïa U Trai; i la ïap namar ka pop la jong.

⁴ Tang namar ba im don khun shynrang, balei keiñ ba ka kyrteng jong i kan jah na Israel? Ai bynta kum ka jingïohkynti jong ngi hapdeng ki kur ki jait jong i pa.”

⁵ U Moses u wanrah ïa ka kam jong ki ha khmat U Trai,

⁶ bad U Trai u ong ha u,

⁷ “Kaei kaba ki khun kynthei u Selophehad ki kyrpad ka long kaba dei; ai bynta lem na ka jingdon jingem jong ki kur ki jait u kpa jong ki. Ai ba ka jingïohkynti jong u kan hiarpateng ha ki.

⁸ Ïathuh ruh ha ki Israel ba haba u briew u bym don khun shynrang u ïap, ka khun kynthei jong u ka dei ban ïohpateng ïa ka nongkynti jong u.

⁹ Lada um don khun kynthei, ki hynmen ki para shynrang jong u kin ïohpateng ïa ka.

¹⁰ Lada um don hynmen ne para shynrang, ki hynmen ki para shynrang u kpa jong u kin ïohpateng ïa ka.

¹¹ Lada u kpa jong u um don hynmen ne para shynrang lane ki kñi, u kur uba ïajan eh bad u un ïohpateng ïa ka, bad un bat ïa ka kum la ka jong ka nongkynti. Ki Israel ki dei ban kohnguh ïa kane ka aiñ kumba nga, U Trai, nga la hukum ïa me.”

La thung ïa u Joshua kum u nongmih bujli ïa u Moses

¹² U Trai u ong ha u Moses, “Leit kiew sha u Lum Abarim bad khmih ïa kata ka ri kaba nga ai ha ki Israel.

¹³ Ynda me la ïohi ïa ka, men sa ïap noh, kumba u Aaron u hynmen jong me u la ïap,

¹⁴ namar baroh ar ngut phi la leh pyrshah ïa ka hukum jong nga ha ka ri khlaw Sin. Haba u paidbah baroh u ïakren khñium ïa nga ha Meribah, phi la kyntait ban pynpaw ïa ka burom kaba kyntang ka jong nga ha khmat jong ki.” (Ka Meribah ka dei ka umpohliew ha Kadesh ha ka ri khlaw Sin.)

¹⁵ U Moses u duwai,

¹⁶ “A Trai uba U Blei, uba long ka thymmei jong ka jingim baroh, nga kyrpad ïa me to thung ïa u briew uba lah ban ïalam ïa u paidbah,

¹⁷ bad uba lah ban ai hukum ïa ki ha ka madan thma, khnang ba u paidlang jong me un ym long kum ki langbrot kiba khlem nongsharai.”

¹⁸ Te U Trai u ong ha u Moses, “Shim ïa u Joshua u khun jong u Nun, u briew uba lah, bad buh ïa ki kti jong me halor ka khlieh jong u.

¹⁹ Pynïeng ïa u ha khmat u Eleasar u lyngdoh bad u paidlang baroh, bad hangta ha khmat jong ki baroh to pynbna ba ma u un long u nongmih bujli jong me.

²⁰ Ai ha u khyndiat ka iktiar jong me, khnang ba u paidbah un kohnguh ïa u.

²¹ Un hap shaniah ha u Eleasar u lyngdoh, ban wad ïa ka mon jong nga da kaba pyndonkam ïa u Urim bad u Thummim. Da kumne u Eleasar un kdew ïa u Joshua bad u paid Israel ha ki kam jong ki baroh.”

²² U Moses u la leh kumba U Trai u la hukum ïa u. U la pynïeng ïa u Joshua ha khmat u Eleasar u lyngdoh bad uta u paidlang baroh.

²³ Kumba u Trai u la hukum, u Moses u buh ïa la ki kti halor ka khlieh jong u Joshua, bad u la pynbna ba une un long u nongmih bujli jong u.