JINGKHEIÑ 26 - Khasi CL Bible (BSI)

Ka jingkheiñbriew kaba ar

¹ Hadien ka jingïapthem, U Trai u ong ha u Moses bad u Eleasar u khun jong u Aaron,

² “Shim jingkheiñ ïa ki longïing longsem jong ka kynhun Israel baroh, ïa ki rangbah baroh kiba arphew snem shaneng kiba bit ban leit sha ka thma.”

^3-4 U Moses bad u Eleasar ki la kohnguh bad ki la khot lang ïa ki rangbah baroh kiba hapoh kata ka thup rta. Ki la ïalang ha ki pyntha ka ri Moab sha shiliang ka wah Jordan na ka Jerikho. Kine ki long ki Israel kiba la wan na Ijipt:

⁵ Ka jait Reuben (u Reuben u dei u khun nyngkong jong u Jakob): Ki kur u Hanokh, u Pallu,

⁶ u Hesron, bad u Karmi.

⁷ Ki rangbah na kine ki kur ki long baroh sawphew lai hajar hynñiewspah laiphew ngut.

⁸ Kiba hiarpateng na u Pallu ki long u Eliab

⁹ bad ki khun shynrang jong u: u Nemuel, u Dathan, bad u Abiram. (Kine ki long u Dathan bad u Abiram ïa kiba la jied da u paidbah. Ki la ïaleh pyrshah ïa u Moses bad u Aaron bad ki la ïasnohkti lang bad ki nongbud u Korah mynba ki la ïaleh pyrshah ïa U Trai.

¹⁰ Ka khyndew ka la ang bad nguid ïa ki, bad ki la ïap ryngkat bad u Korah bad ki nongbud jong u haba ka ding ka la pynjot thiaw ïa arspah sanphew ngut ki rangbah; ki la kylla long ka jingmaham ïa uta u paidbah.

¹¹ Hynrei ïa ki khun shynrang u Korah ym shym la pynïap.)

¹² Ka jait Simeon: ki kur u Nemuel, u Jamin, u Jakhin,

¹³ u Serah, bad u Shaul.

¹⁴ Ki rangbah na kine ki kur ki long baroh arphew ar hajar arspah ngut.

¹⁵ Ka jait Gad: Ki kur u Sephon, u Haggi, u Shuni,

¹⁶ u Osni, u Eri,

¹⁷ u Arod, bad u Areli.

¹⁸ Ki rangbah na kine ki kur ki long baroh sawphew hajar sanspah ngut.

^19-21 Ka jait Judah: Ki kur u Shelah, u Peres, u Serah, u Hesron, bad u Hamul. (Ar ngut na ki khun shynrang jong u Judah, u Er bad u Onan, ki la ïap ha ka ri Kanaan.)

²² Ki rangbah na kine ki kur ki long baroh hynñiewphew hynriew hajar sanspah ngut.

²³ Ka jait Issakhar: Ki kur u Tola, u Puah,

²⁴ u Jashub, bad u Shimron.

²⁵ Ki rangbah na kine ki kur ki long baroh hynriewphew saw hajar laispah ngut.

²⁶ Ka jait Sebulun: Ki kur u Sered, u Elon, bad u Jahleel.

²⁷ Ki rangbah na kine ki kur ki long baroh hynriewphew hajar sanspah ngut.

²⁸ Ki jait na u Joseph uba long u kpa jong ki ar ngut ki khun shynrang, u Manasseh bad u Ephraim.

²⁹ Ka jait Manasseh: u Makhir u khun jong u Manasseh, u dei u kpa jong u Gilead, bad kine ki kur ki hiarpateng na u Gilead:

³⁰ Ki kur u Leser, u Helek,

³¹ u Asriel, u Shekhem,

³² u Shemida, bad u Hepher.

³³ U Selophehad u khun jong u Hepher um don khun shynrang, u don tang ki khun kynthei; ki kyrteng jong ki, ki long ka Mahlah, ka Noah, ka Hoglah, ka Milkah, bad ka Tirsah.

³⁴ Ki rangbah na kine ki kur ki long baroh sanphew ar hajar hynñiewspah ngut.

³⁵ Ka jait Ephraim: ki kur u Shuthelah, u Bekher, bad u Tahan.

³⁶ Ka kur u Eran ka hiarpateng na u Shuthelah.

³⁷ Ki rangbah na kine ki kur ki long baroh laiphew ar hajar sanspah ngut. Kine ki long kita ki kur kiba hiarpateng na u Joseph.

³⁸ Ka jait Benjamin: Ki kur u Bela, u Ashbel, u Ahiram,

³⁹ u Shephupham, bad u Hupham.

⁴⁰ Ki kur u Ard bad u Naaman ki hiarpateng na u Bela.

⁴¹ Ki rangbah na kine ki kur ki long baroh sawphew san hajar hynriewspah ngut.

⁴² Ka jait Dan: Ka kur u Shuham.

⁴³ Ki rangbah baroh na kane ka kur ki long hynriewphew saw hajar sawspah ngut.

⁴⁴ Ka jait Asher: ki kur u Imnah, u Ishbi, bad u Beraïah.

⁴⁵ Ki kur u Heber bad u Malkhiel ki hiarpateng na u Beria.

⁴⁶ U Asher u don kawei ka khun kynthei kaba kyrteng ka Serah.

⁴⁷ Ki rangbah na kine ki kur ki long baroh sanphew lai hajar sawspah ngut.

⁴⁸ Ka jait Naphtali: Ki kur u Jahseel, u Guni,

⁴⁹ u Jeser, bad u Shillem.

⁵⁰ Ki rangbah baroh na kine ki kur ki long sawphew san hajar sawspah ngut.

⁵¹ Baroh ki rangbah Israel ki long hynriew lakh shihajar hynñiewspah laiphew ngut.

⁵² U Trai u ong ha u Moses,

⁵³ “Ïasam ïa kata ka ri hapdeng kita ki jait kat kum ka jingbun briew jong ki.

^54-56 Ïasam ïa ka da kaba kynting sbai. Ai ïa ka bynta kaba kham heh ha ka jait kaba kham bun paid, bad ïa ka bynta kaba kham rit ha ka jait kaba kham duna paid.”

⁵⁷ Ka jait Lebi ka kynthup ïa ki kur u Gershon, u Kohath, bad u Merari.

⁵⁸ Ki khun ki ksiew jong ki, ki kynthup ïa kiba na ki kur u Libni, u Hebron, u Mahli, U Mushi, bad u Korah. U Kohath u dei u kpa jong u Amram,

⁵⁹ uba shongkurim ïa ka Jokhebed ka khun u Lebi, ïa kaba la kha ha Ijipt. Ka la ïoh ar ngut ki khun shynrang na u Amram: u Aaron bad u Moses, bad kawei ka khun kynthei, ka Miriam.

⁶⁰ U Aaron u don saw ngut ki khun shynrang: u Nadab, u Abihu, u Eleasar, bad u Ithamar.

⁶¹ U Nadab, bad u Abihu ki la ïap mynba ki ainguh ïa ka ding bymkhuid ha U Trai.

⁶² Ki shynrang Lebi kiba la dap shi bnai lane kham heh ki long baroh arphew lai hajar ngut. Ïa kine la ñiew kyrpang na kiba sah jong ki Israel, namar ba ym shym la ai bynta ïa ki ha Israel.

⁶³ Ïa kine ki kur baroh la ñiew kyrteng da u Moses bad u Eleasar mynba ki shim ïa ka jingkheiñbriew ïa ki Israel ha ki pyntha ka ri Moab ha shiliang ka wah Jordan na ka Jerikho.

⁶⁴ Ym shym la sah wat tang uwei ruh u briew na kito kiba u Moses bad u Aaron ki la thoh kyrteng ha ka jingkheiñbriew kaba nyngkong ha ka ri shyiap Sinai.

⁶⁵ U Trai u la ong ba baroh na ki kin ïap ha ka ri khlaw, bad lait noh u Kaleb u khun jong u Jephunneh bad u Joshua u khun jong u Nun, baroh ki la ïap shisha.