JINGKHEIÑ 25 - Khasi CL Bible (BSI)

Ki paid Israel ha Peor

¹ Mynba ki Israel ki la shong dara ha ka Them Akasia, ki rangbah ki la sdang ban ïathiah shongkha bad ki kynthei Moab kiba don hangta.

² Kine ki kynthei ki la khot sngewbha ïa ki sha ki jingkhawai jingkñia ha kaba la mane ïa u blei ki Moab. Ki Israel ki la bam ïa ki jingbam bad mane ïa u blei Baal jong ki Peor.

³ Te U Trai u bitar lep ïa ki,

⁴ bad u ong ha u Moses, “Shim ïa ki nongïalam jong ki Israel baroh bad da kaba kohnguh ïa nga, pynïap ïa ki haba shai ka sngi te ngan ym bitar shuh ïa ki briew.”

⁵ U Moses u ong ha ki rangbah synshar, “Uwei pa uwei na phi un pynïap ïa uwei pa uwei u briew na ka jait jong phi uba la long u nongmane ïa u Baal ki Peor.”

⁶ Uwei u Israel u la ïalam ïa kawei ka kynthei Midian sha la ïingjaiñ, ha kaba ïohi jong u Moses bad ka kynhun baroh, katba ki dang ïa-ïam sngewsih ha ka jingkhang ka Ïingjaiñ ka Jingdon Ryngkat U Trai.

⁷ Haba u Phinehas, u khun jong u Eleasar bad u ksiew jong u Aaron uba long lyngdoh, u la ïohi ïa kane, u ïeng joit bad u mih na kata ka kynhun.

⁸ U la shim ïa u sum, u la bud ïa uta u shynrang bad kata ka kynthei shapoh ïingjaiñ, bad u dung ïap da u sum ïa ki baroh ar ngut. Da kumne la pynsangeh ïa ka jingïapthem kaba la pynjot ïa ki Israel,

⁹ hynrei kata ka la lah pynïap arphew saw hajar ngut ki briew.

¹⁰ U Trai u ong ha u Moses,

¹¹ “Namar kaei kaba u Phinehas u la leh, ngam bitar shuh ïa ki paid Israel. U kyntait ban shah ïa ka jingmane ïa uno uno u blei lait tang ïa nga, bad namar kata ngam shym la pynjot ïa ki wat haba nga la bitar.

¹² Kumta ïathuh ha u ba ngan pynlong ka jutang bad u ka ban neh pateng la pateng.

¹³ Ma u bad ki khun ki ksiew jong u kin bat ïa ka kam lyngdoh junom, namar ba um shym la shah ïa kiba ïakob bor bad nga bad ba u la wallam ka jingïohmap na ka bynta ka pop jong ki briew.”

¹⁴ Ka kyrteng uta u Israel uba la shah pynïap lang bad kata ka kynthei Midian ka long u Simri u khun jong u Salu, u khlieh jong ka longïing kaba na ka jait Simeon.

¹⁵ Ka kyrteng jong kata ka kynthei ka dei ka Kosbi. U Sur, u kpa jong ka u long u rangbah bahakhlieh jong kawei ka kynhun ki jait Midian.

¹⁶ U Trai u hukum ïa u Moses,

¹⁷ “Tur ïaleh ïa ki Midian bad pynjot thiaw ïa ki,

¹⁸ namar ka kam bymman ba ki la leh ïa phi haba ki la shukor ïa phi ha Peor, bad namar ka Kosbi kaba la shah pynïap ha ka por jong ka jingïapthem ha Peor.”