JINGKHEIÑ 24 - Khasi CL Bible (BSI)

¹ Haduh mynta u Balaam u la tip ba U Trai u kwah ïa u ba un kyrkhu ïa ki paid Israel, kumta um shym leit wad shuh ïa ki dak ki shin kumba u la leh mynshuwa. U la phai la ki khmat shaphang ka ri shyiap,

² bad u ïohi ïa ki paid Israel ba ki sher dara shi jait shi jait. U mynsiem U Blei u wan rung ha u,

³ bad u la kren ïa kane ka jingïathuhlypa: “Ka khubor u Balaam u khun jong u Beor, Ki ktien jong u briew uba lah ban ïohi shai,

⁴ Uba lah ban ïohsngew aïu U Blei u kren, Da ki khmat kiba peit nga ïohi ha ka jingïohi rngai Ka jingïohipaw na U Blei Badonbor.

⁵ Ki ïingjaiñ jong ki Israel ki long kiba itynnat, Kum ki dieng Tlai kiba ïeng laiñ.

⁶ Lane kum ki kper harud ka wah, Kum ki Alos ba U Trai u la thung, Lane kum ki dieng Kedar harud ki um.

⁷ Kin ïoh kyrhai u slap Bad kin thung ïa la u symbai ha ki lyngkha ba ïoh um bha. U syiem jong ki un kham khraw ïa u Agag, Bad ka bor synshar jong u kan ïar kylleng sawdong.

⁸ U Blei u la wan ïalam ïa ki na Ijipt; U ïaleh namar jong ki la kum u masi prut. Ki bam duh ïa ki nongshun jong ki, Ki pynlwet ïa ki shyieng jong ki, ki pynkheiñ ïa ki khnam jong ki.

⁹ Kane ka jaitbynriew ka long kum u sing uba khlaiñ; Haba u thiah, ym don ba nud ban kyrsiew ïa u. Uta uba kyrkhu ïa ki Israel un ïoh jingkyrkhu, Bad uta uba tim ïa ki Israel un ïoh ka jingtim.”

¹⁰ U Balak u kham tyngeh ïa la ki sla kti da ka jingbitar bad u ong ha u Balaam, “Nga la khot ïa me ban tim ïa ki nongshun jong nga, hynrei la lai sien me la kyrkhu pynban ïa ki.

¹¹ Khie leit noh mynta sha la ïing! Nga la kular ban ai bainong ïa me, hynrei U Trai u la khang ïa me ban ïoh ïa kata ka bainong.”

¹² U Balaam u jubab, “Nga la ïathuh ha kito ki nonglamktien ba phi la phah sha nga,

¹³ ba wat lada phi ai lut ha nga ïa ka ksiar ka rupa kaba don ha ka ïingsyiem jong phi, ngan ym ïaid palat ïa ka hukum U Trai da kaba leh ïa kaei kaei da la ka mon. Ngan kren tang ïa kaei kaba U Trai u ong ha nga ban kren.”

Ki jingïathuhlypa kiba khatduh jong u Balaam

¹⁴ U Balaam u ong ha u Balak, “Mynta ngan leit phai pat sha la ki briew, hynrei shuwa ba ngan mih, nga maham lypa ïa phi aïu ki Israel kin leh ïa ki briew jong phi hadien habud.”

¹⁵ Nangta u la kren ïa kane ka jingïathuhlypa: “Ka khubor u Balaam u khun jong u Beor, Ki ktien jong u briew uba lah ban ïohi shai kdar,

¹⁶ Uba lah ban ïohsngew aïu U Blei u ong, Bad uba ïohpdiang ïa ka jingtip kaba wan na U Bahakhlieh Tam Eh. Da ki khmat kiba peit nga ïohi ha ka jingïohi rngai Ka jingïohipaw na U Blei Badonbor Baroh.

¹⁷ Nga khmih sha ka lawei, Bad nga ïohi ïa ka jaitbynriew Israel. U syiem, uba kum u khlur phyrnai, un mih ha kata ka jaitbynriew. Kum u 'lur dih duma un wan mih na Israel. Un shoh ïa ki nongïalam ki Moab, Bad un pyndem ïa ki briew jong u Seth.

¹⁸ Un jop ïa ki nongshun jong u ha Edom, Bad un pynlong ïa ka ri jong ki ka jingïohkynti jong u, Katba ki Israel kin ïai jop.

¹⁹ Ka jaitbynriew Israel kan ïuhroit ïa ki, Bad pynduh jait ïa kiba dang im baroh kiba dang sah.”

²⁰ Nangta ha ka jingïohipaw jong u, u Balaam u la ïohi ïa ki Amalek, bad u la kren ïa kane ka jingïathuhlypa: “U Amalek u long ka jaitbynriew kaba khlaiñbor tam na baroh, Hynrei ha kaba kut un jah noh jar.”

²¹ Ha ka jingïohipaw jong u, u ïohi ïa ki Ken, bad u la kren ïa kane ka jingïathuhlypa: “Ka jaka kaba phi shong ka long kaba skhem, Kaba shngain kum ka skum ba la shna shajrong halor ka synrang;

²² Hynrei phi ki Ken phin sa shah pynjot thiaw Ynda u Assyria u ringmraw ïa phi.”

²³ U Balaam u la kren ïa kane ka jingïathuhlypa: “Kiei kine ki briew kiba ïalumlang shaphang shatei?

²⁴ Ki nonghiarthma kin wan da ki lieng na Sypros; Kin jop ïa u Assyria bad u Eber, Hynrei ma ki ruh kin jah noh jar.”

²⁵ Nangta u Balaam u la ïeng joit bad leit phai noh sha la ïing, bad u Balak ruh u la leit phai ha la ka lynti.