JINGKHEIÑ 23 - Khasi CL Bible (BSI)

¹ U ong ha u Balak, “Tei ïa nga hangne hynñiew tylli ki duwan, bad wallam ïa nga hynñiew tylli ki masi kyrtong bad hynñiew tylli ki langbrot shynrang.”

² U Balak u leh kumba la bthah, te ma u bad u Balaam ki la kñia uwei u masi kyrtong bad uwei u langbrot ha kawei kawei ka duwan.

³ Nangta u Balaam u ong ha u Balak, “Ïeng hangne harud ka jingainguh thang jong phi, katba nga pat ngan leit peit la U Trai un ïakynduh ne em ïa nga. Ngan sa ïathuh ha phi kat ïa kaba u pynpaw ha nga.” Kumta u la leit marwei sha kliar jong uwei u lum,

⁴ bad U Blei u ïakynduh ïa u. U Balaam u ong ha u, “Nga la tei hynñiew tylli ki duwan bad nga la kñia uwei u masi kyrtong bad uwei u langbrot ha kawei kawei na ki.”

⁵ U Trai u ïathuh ha u Balaam kumno ban kren bad u la phah pat ïa u sha u Balak, ban ai ha u ïa ka khubor.

⁶ Kumta u la leit phai pat bad u la shem ïa u Balak ba u dang ïeng harud ka jingainguh thang jong u lem bad ki nongïalam jong ki Moab.

⁷ U Balaam u la kren ïa kane ka jingïathuhlypa: “U Balak u syiem Moab u la wan ïalam ïa nga Na Syria, na ki lum mihngi. ‘Ale kren lem na ka bynta jong nga,’ u ong. ‘Buh ka jingtim halor ki paid Israel.’

⁸ Kumno nga lah ban tim ïa kaei kaba U Blei um shym la tim, Lane kren shaphang ka jingjot haba U Trai um shym kren?

⁹ Na kliar ki mawsiang bakynjang nga lah ban ïohi ïa ki, nga lah ban khmih ïa ki nalor ki lumrit. Ki dei ka jaitbynriew kaba im kyrpang; ki tip ba ki long kiba la kyrkhu kyrpang ïa ki hapdeng kiwei pat ki jaitbynriew.

¹⁰ Ki khun ki ksiew u Israel ki long kum u pui pui — Ki la ïabun palat, ym lah ñiew shuh ïa ki. Shah ba ngan pynkut ïa la ki sngi kum uwei na ki briew jong U Blei, Shah ba ngan ïap ha ka jingsuk kum u riewhok.”

¹¹ Te u Balak u ong ha u Balaam, “Phi leh lei ïa nga kumne? Nga la wan ïalam ïa phi hangne ban tim ïa ki nongshun jong nga, hynrei phi la kyrkhu pynban ïa ki.”

¹² U jubab, “Nga lah ban kren tang ïa kaei kaba U Trai u ong ïa nga ban kren.”

Ka jingïathuhlypa kaba ar jong u Balaam

¹³ Nangta u Balak u ong ha u Balaam, “Ale bad nga sha kawei pat ka jaka na kaba phi lah ban ïohi tang katto katne ki Israel. Tim ïa ki na ka bynta jong nga nangta.”

¹⁴ U la ïalam ïa u sha ka madan Sophim kaba ha khlieh u Lum Pisgah. Hangta ruh u la tei hynñiew tylli ki duwan bad u la kñia uwei u masi kyrtong bad uwei u langbrot ha kawei pa kawei na ki.

¹⁵ U Balaam u ong ha u Balak, “Ïeng hangne harud ka jingainguh thang jong phi, katba nga nang leit ïakynduh ïa U Blei hangtai.”

¹⁶ U Trai u ïakynduh ïa u Balaam, u la ïathuh ha u kumno ban kren, bad u la phah ïa u pat sha u Balak ban ai ïa ka khubor jong u.

¹⁷ Kumta u la leit phai pat bad u la lap ïa u Balak ba u dang ïeng harud ka jingainguh thang jong u lem bad ki nongïalam ka Moab. U Balak u la kylli aïu U Trai u la ong,

¹⁸ bad u Balaam u kren ïa kane ka jingïathuhlypa: “Ale, ko Balak u khun jong u Sippor, Bad sngap aïu nga don ban ong.

¹⁹ U Blei um long kum ki briew, kiba kren lamler; Um long kum u briew uba kylla la ka jingmut. Kat kaba u kular, u pyndep; U kren, bad la pyndep ïa kata.

²⁰ Ïa nga la bthah ban kyrkhu, Bad haba U Blei u kyrkhu, ngam lah ban pynkylla da kumwei pat.

²¹ Nga ïohi lypa ïa ka lawei jong ki Israel, Kan ym don ka jingkordit ne jinglanot ïa ki. U Trai U Blei jong ki u don ryngkat bad ki, Ki pynbna ba ma u, u long u syiem jong ki.

²² U Blei u la wan ïalam ïa ki na Ijipt; U ïaleh na ka bynta jong ki la kum u masi prut.

²³ Ym don myntor, ym don jingleh byrtong, Kaba lah ban pyndonkam pyrshah ïa ka jaitbynriew Israel. Mynta ki briew kin ïakren shaphang ki Israel, ‘Khmih aïu U Blei u la leh!’

²⁴ Ka jaitbynriew Israel ka long kum u sing uba khrawbor; U bym shongthait tad haduh ba u la lah patar bad bam lut khoit, Haduh ba un da dep dih ïa ka snam jong kito kiba u la pynïap.”

²⁵ Te u Balak u ong ha u Balaam, “Phi kyntait ban tim ïa ki Israel, hynrei to shu keiñ noh na kaba kyrkhu ïa ki.”

²⁶ U Balaam u jubab, “Hato ngam shym la ïathuh ha phi ba nga dei ban leh baroh kumba U Trai u la hukum ïa nga?”

Ka jingïathuhlypa kaba lai jong u Balaam

²⁷ U Balak u ong, “Ale bad nga, bad ngan ïalam ïa phi sha kawei pat ka jaka. Lehse U Blei un shah ïa phi ban tim ïa ki na ka bynta jong nga nangta.”

²⁸ Kumta u la ïalam ïa u Balaam sha khlieh u Lum Peor uba phai shaphang ri shyiap.

²⁹ U Balaam u ong ha u, “Tei ïa nga hangne hynñiew tylli ki duwan bad wallam ïa nga hynñiew tylli ki masi kyrtong bad hynñiew tylli ki langbrot shynrang.”

³⁰ U Balaam u leh kumta, bad u kñia uwei u masi kyrtong bad uwei u langbrot ha kawei pa kawei ka duwan.