JINGKHEIÑ 22 - Khasi CL Bible (BSI)

U syiem Moab u phah khot ïa u Balaam

¹ Ki Israel ki la nang ïaid bad ki sher dara ha ki pyntha jong ka Moab sha mihngi jong ka Jordan bad marpyrshah ka Jerikho.

² Haba u syiem Moab, u Balak u khun jong u Sippor, u la ïohsngew ïa kaei ba ki Israel ki la leh ïa ki Amor, bad ïa ka jingbun paid ki Israel,

³ ma u lem bad ki briew jong u baroh ki la sheptieng.

⁴ Ki nong Moab ki ong ha ki nongïalam jong ki Midian, “Kane ka kynhun shen kan sa pynjot ïa kaei kaei baroh kaba don sawdong jong ngi, kum u masi uba bam phlang ha ka pyntha phlang.”

⁵ Kumta u syiem Balak u la phah ïa ki nonglamktien ban ïakynduh ïa u Balaam u khun jong u Beor, uba don ha Pethor hajan ka wah Ïuphratis ha ka ri jong ki Amaw. Ki wallam sha u ïa kane ka khubor na u Balak, “Nga kwah ïa phi ban tip ba kawei ka jaitbynriew baroh kawei ka la wan na Ijipt; kita ki briew ki la saphriang kylleng bad ki thmu ban knieh ïa ka ri jong ngi.

⁶ Ki kham bun paid ban ïa ngi; kumta sngewbha wan bad tim ïa ki na ka bynta jong nga. Ïoh lehse ngin lah ban jop ïa ki bad beh noh ïa ki na kane ka ri. Nga tip ba haba phi pynbna ka jingkyrkhu, ki briew ki ïoh ka jingkyrkhu, bad haba phi pynbna ka jingtim, la buh ïa ki hapoh ka jingtim.”

⁷ Kumta ki nongïalam jong ki Moab bad ki Midian ki rah bad ki ïa ka jingsiew na ka bynta ka jingtim, ki la leit sha u Balaam bad ki ai ha u ïa ka khubor na u Balak.

⁸ U Balaam u ong ha ki, “Sahmiet noh hangne, bad lashai ngan sa ïathuh ha phi ïa kaei ba U Trai u kren ha nga.” Kumta kita ki nongïalam jong ki Moab ki la sahmiet bad u Balaam.

⁹ U Blei u wan ha u Balaam, bad u ong, “Kiei kine ki briew kiba sahmiet bad me?”

¹⁰ U la jubab, “U syiem Balak ka ri Moab u la phah ïa ki ban ïathuh ha nga

¹¹ ba ka jaitbynriew kaba la wan na Ijipt ka la saphriang ha ka ri baroh kawei. U kwah ïa nga ban tim ïa ki na ka bynta jong u, khnang ba u lah ban ïaleh pyrshah bad beh noh ïa ki.”

¹² U Blei u ong ha u Balaam, “Wat leit bad ki, bad wat buh ka jingtim halor ki paid Israel, namar ki don ïa ka jingkyrkhu jong nga.”

¹³ Ha ka step kaba bud u Balaam u la leit sha ki nonglamktien jong u Balak bad u ong, “Khie leit phai sha la ïing; U Trai um shah ba ngan leit bad phi.”

¹⁴ Kumta ki la leit phai sha u Balak bad ki ïathuh ha u ba u Balaam um treh ban wan bad ki.

¹⁵ Nangta u Balak u la phah kham bun ki nongïalam kiba kham pawkhmat ban ïa kito kiba mynshuwa.

¹⁶ Ki la leit sha u Balaam bad ai ha u ïa kane ka khubor na u Balak: “Sngewbha wat shah ba kaei kaei kan khanglad ïa phi ban wan sha nga!

¹⁷ Ngan ai ïa phi da ka jingai burom kaba khraw bad leh ïa kano kano kaba phi ong. Sngewbha wan bad tim ïa kine ki briew na ka bynta jong nga.”

¹⁸ Hynrei u Balaam u jubab, “Wat lada u Balak u ai lut ka ksiar ka rupa kaba don ha ïingsyiem jong u, da lei lei ngam lah khlem da kohnguh ïa ka hukum U Trai U Blei jong nga wat ïa iba rit tam.

¹⁹ Hynrei sngewbha to ïasah miet mynta ruh, ba nga lah ban ïoh tip aïu pat U Trai un ong ha nga.”

²⁰ Ha kata ka miet U Blei u la wan ha u Balaam bad u ong, “Lada kine ki briew ki la wan khot ïa me ban leit bad ki, to khreh ban leit; hynrei leh tang ïa kata kaba nga ong ha me.”

²¹ Kumta ha ka step kaba bud u Balaam u teh jin ïa la ka kada, bad u leit bad kita ki nongïalam jong ki Moab.

U Balaam bad ka kada jong u

²² U Blei u la bitar ba u Balaam u la leit, bad katba u Balaam u dang leit da kaba shong halor ka kada jong u, la synran ïa u da ar ngut ki shakri jong u; u angel U Trai u la ïeng ha ka surok ban khang lynti ïa u.

²³ Haba kata ka kada ka la ïohi ïa u angel ba u ïeng hangta ba u da bat ïa ka waitlam, ka phet noh na surok bad ka la phai sha ki lyngkha. U Balaam u sympat ïa kata ka kada bad u wan ïalam pat ïa ka sha surok.

²⁴ Nangta uta u angel u ïeng ha ka lynti kaba khim kaba don hapdeng ar tylli ki bri sohwaiñ ba la ker da ka kynroh maw baroh arliang.

²⁵ Haba kata ka kada ka la ïohi ïa u angel, ka la tur sha kata ka kynroh bad ka ban trait ïa ka kjat u Balaam ha ka. Sa shisien u Balaam u sympat ïa ka kada.

²⁶ Sa shisien pat u angel u leit sha khmat; u ïeng ha ka jaka kaba khim ha kaba ym don jaka ban ïaid na baroh arliang.

²⁷ Ha kane ka sien, haba ka kada ka la ïohi ïa u angel, ka la dem khop. U Balaam u la bitar lep bad u la sdang ban sympat ïa ka da la u diengduh.

²⁸ Te U Trai u la ai bor ïa kata ka kada ban kren, bad ka ong ha u Balaam, “Nga la leh aïu keiñ ïa phi ba phi da sympat ïa nga ha kine lai sien?”

²⁹ U Balaam u jubab, “Namar ba pha la pynlong u bieit ïa nga! Ba ngan da don waitlam, ngan jin da la pynïap ïa pha.”

³⁰ Ka kada ka phai ktien, “Hato ngam dei kajuh ka kada ha kaba phi la ju shong baroh shi rta haduh mynta? Hato nga la ju leh kumne ïa phi?” “Em,” u jubab.

³¹ Te U Trai u pynshai ïa ki khmat u Balaam ban ïohi ïa u angel uba ïeng hangta bad la ka waitlam; bad u Balaam u la dem khrup ha khyndew.

³² U angel u la kylli, “Balei me da sympat kumne ïa la ka kada ha kine lai sien? Nga la wan ban khang lynti ïa me namar mem shym la dei ban leit sha kane ka jingleit.

³³ Hynrei ka kada jong me ka la ïohi bad kiar ïa nga lai sien. Lada kam shym la leh kumta, ngan jin da la pynïap ïa me bad pyllait im ïa ka kada.”

³⁴ U Balaam u phai ktien, “Nga la leh pop. Ngam shym tip ba me ïeng hapdeng lynti ban khang ïa nga; hynrei mynta, lada kam dei ïa nga ban leit, ngan leit phai noh sha la ïing.”

³⁵ Hynrei u angel u ong, “Khie leit bad kine ki briew, hynrei kren tang ïa kaba nga ong ha me ban kren.” Kumta u Balaam u la leit ryngkat bad ki.

U Balak u pdiang sngewbha ïa u Balaam

³⁶ Haba u Balak u ïohsngew ba u Balaam u la wan, u leit ïakynduh ïa u ha Ar, ka nongbah kaba harud ka wah Arnon ha ka khappud Moab.

³⁷ U Balak u ong ha u, “Balei phim wan mynba nga la phah khot ïa phi ha kaba nyngkong? Phi tharai ngam lah ban ai bainong kaba biang ïa phi?”

³⁸ U Balaam u jubab, “Nga la wan em! Hynrei mynta nga donbor aïu? Nga lah ban kren tang ïa kaba U Blei u ong ha nga ban kren.”

³⁹ Kumta u Balaam u la leit ryngkat bad u Balak sha ka shnongrit Husoth,

⁴⁰ ha kaba u Balak u la pynïap ïa ki masi bad ki langbrot, bad u phah rah de katto katne ka doh sha u Balaam bad kita ki nongïalam kiba ïadon lem bad u.

Ka jingïathuhlypa kaba nyngkong jong u Balaam

⁴¹ Ha ka step kaba bud u Balak u la ïalam ïa u Balaam sha Bamoth Baal, na kaba u Balaam u lah ban ïohi shi bynta jong ki paid Israel.