JINGKHEIÑ 21 - Khasi CL Bible (BSI)

Ka jingjop ïa ki nong Kanaan

¹ Haba u syiem ka Arad, u nong Kanaan uba shong shaphang shathie ka ri Kanaan, u la ïohsngew ba ki Israel ki wan ïaid lynti na shaphang Atharim, u la tur ïaleh ïa ki bad u la ïohkem katto katne ngut na ki.

² Nangta ki Israel ki la smai ha U Trai: “Lada me shah ïa ngi ban jop ïa kine ki briew, ngin pynkyntang lut khlem kyndon ïa ki bad ïa ki shnong jong ki sha me bad ngin pynjot thiaw ïa ki.”

³ U Trai u la shahshkor ïa ki bad u ïarap ïa ki ban jop ïa ki nong Kanaan. Kumta ki Israel ki la pynjot thiaw ïa ki bad ïa ki shnong jong ki, bad ki la khot kyrteng ïa kata ka jaka ka Hormah.

U bseiñ ba la shna da ka rnong

⁴ Ki paid Israel ki la mihnoh na u Lum Hor na ka lynti kaba poi sha ka khmut duriaw Akaba, ban ïaid sawdong ïa ka ri Edom. Hynrei ha lynti kim lah shah shuh bad ki la kren pyrshah ïa U Blei bad ïa u Moses.

⁵ Ki la khñium, “Balei phi wan ïalam ïa ngi na Ijipt ban ïap ha kane ka ri shyiap ha kaba ym don bam lane ka um? Ngim sngewlah shuh ban bam kum kane ka jingbam!”

⁶ Nangta U Trai u la phah da ki bseiñ ba-dap da ka bih hapdeng kita ki briew, bad bun ki Israel ki la shah puh bad ïap.

⁷ Uta u paidbah u ïawan sha u Moses bad u ong, “Ngi la leh pop haba ngi la kren pyrshah ïa U Trai bad ïa phi ruh. Mynta to duwai ha U Trai ba un shim noh ïa kine ki bseiñ.” Kumta u Moses u la duwai na ka bynta uta u paidbah.

⁸ Te U Trai u ong ïa u Moses ban shna u bseiñ rnong bad wah ïa u ha u dieng, kumta ba uno uno uba shah puh bseiñ u lah ban peit sha u bad un koit.

⁹ Kumta u Moses u shna ïa u 'seiñ rnong bad u wah ïa u ha u dieng. Kat uba shah puh bseiñ u peit sha uta u 'seiñ rnong bad u koit.

Na u Lum Hor sha ka Them ki Moab

¹⁰ Ki Israel ki la mihnoh bad ki la sher dara ha Oboth.

¹¹ Ynda ki la mihnoh na kata ka jaka, ki la sher dara ha ki nongrim ba la jot jong ka Abarim kaba ha ka ri khlaw, shaphang mihngi na ka ri Moab.

¹² Nangta pat ki leit sher dara ha Them Sered.

¹³ Nangta pat ki la mihnoh bad sher dara ha ka liang kaba shaphang shatei jong ka Wah Arnon, ha ka ri khlaw kaba ïar shaduh ki khappud ka ri Amor. (Ka wah Arnon ka la long ka pud hapdeng ka ri Moab bad ki Amor.)

¹⁴ Dei namar kata ba Ka Kitab jong ki Thma U Trai ka kren shaphang “... ka shnong Waheb ha ka thain Suphah, bad ki them jong ka wah Arnon,

¹⁵ bad ka sharing jong ki them kiba kot shaduh ka shnong Ar bad shaduh u pud ka ri Moab.”

¹⁶ Nangta ki leit sha ka jaka ba la khot “Ki Pukri,” ha kaba U Trai u la ong ha u Moses, “Lumlang ïa ki briew, bad ngan ai um ïa ki.”

¹⁷ Te ki Israel ki rwai ïa kane ka jingrwai: “Ko ki pukri, pynkyrsoi ïa ka um jong phi, Da ka jingrwai ngin pdiang sngewbha ïa ka.

¹⁸ Ka pukri ba la tih da ki khun syiem Bad da ki nongïalam u paidbah, La tih da u diengsynshar syiem Bad da ki diengduh jong ki.” Na kata ka ri khlaw ki la mihnoh sha Mattanah,

¹⁹ bad nangta ki leit sha Nahaliel, bad na Nahaliel sha Bamoth,

²⁰ bad na Bamoth sha ka them ha ka ri Moab, harum ka kliar u Lum Pisgah na uba lah ban ïohi ïa kata ka ri shyiap.

Ka jingjop ïa u syiem Sihon bad u syiem Og

²¹ Te ki Israel ki la phah ïa ki nonglamktien sha u Sihon u syiem Amor ban ong:

²² “Shah ngin ïaid na ka ri jong phi. Ma ngi lem bad ki jingri ngin ym leit sakma na ka lynti lane leit sha ki lyngkha ne ki bri sohwaiñ jong phi; bad ngin ym dih um na ki pukri jong phi; ngin ïaid beit na lynti bah haduh ba ngin da lait na ka ri jong phi.”

²³ Hynrei u Sihon um shah ïa ki Israel ban ïaid lyngba ïa ka ri jong u. U la lum ïa ka kynhun ïapom jong u bad u la leit sha Jahas ha ka ri khlaw bad u la tur ïaleh ïa ki Israel.

²⁴ Hynrei ki Israel ki la pynïap bun ki nongshun ha ka thma bad ïohknieh ïa ka ri jong ki naduh ka wah Arnon na shaphang shatei haduh ka Jabbok, kata, haduh ki Ammon, namar ka khappud ki Ammon ka long kaba khlaiñ bha ka jingïada.

²⁵ Kumta ki paid Israel ki ïohknieh ïa ki nongbah jong ki Amor baroh, lem bad ïa ka Heshbon bad ïa ki shnongrit baroh sawdong jong ka, bad ki la shong la sah hangta.

²⁶ Ka Heshbon ka dei ka nongbah jong u Sihon u syiem Amor uba la ïaleh pyrshah ïa u syiem Moab uba mynshuwa bad uba la ïohknieh lut ïa ka ri jong u baroh haduh ka wah Arnon.

²⁷ Dei namar kata ba ki myllung ki rwai, “Wan sha Heshbon, sha ka nongbah u syiem Sihon! Ngi kwah ïohi ba yn tei pat bad pynïeng biang ïa ka.

²⁸ Shisien na kane ka nongbah Heshbon Ka kynhun ïapom jong u Sihon ka mih kum ka ding; Ka da pynjot ïa ka nongbah Ar ha Moab Bad ka bam duh ïa ki lum ka Arnon bashaneng.

²⁹ Katno ka long kaba kordit ïa phi ki Moab! Phi kiba mane ïa u Khemosh, phi la jot! U blei jong phi u pynphetwir ïa ki shynrang, Bad ïa ki kynthei u pynlong ki mraw jong u syiem Amor.

³⁰ Hynrei mynta ïa ki khun ki ksiew jong ki la shah pynjot, Shi lynter naduh Heshbon haduh Dibon, Naduh Nashim haduh Nophah, hajan ka Medeba.”

³¹ Kumta ki paid Israel ki la shong la sah ha ka ri ki Amor,

³² bad u Moses u phah ïa ki briew ban shem ka lynti babha tam kumno ban tur ïaleh ïa ka nongbah Jaser; ki Israel ki la ïohknieh ïa ka bad ki shnong kiba sawdong jong ka, bad ki la beh noh ïa ki Amor kiba shong hangta.

³³ Nangta ki Israel ki la phai bad leit na ka lynti sha Bashan, bad u syiem Og jong ka Bashan u la wan mih bad la ka kynhun ïapom ban tur ïaleh ïa ki ha Edrei.

³⁴ U Trai u ong ha u Moses, “Wat sheptieng ïa u. Ngan ai ha me ka jingjop halor jong u, ïa ki briew jong u baroh, bad ïa ka ri jong u. Leh ïa u kumba me la leh ïa u Sihon u syiem Amor uba synshar ha Heshbon.”

³⁵ Kumta ki Israel ki la pynïap ïa u Og, ïa ki khun shynrang jong u, bad ïa ki briew jong u baroh, khlem da pynsah uwei ruh, bad nangta ki kam kynti ïa ka ri jong u.