JINGKHEIÑ 20 - Khasi CL Bible (BSI)

Ki jingjia ha Kadesh

¹ Ha u bnai uba nyngkong, u paid Israel baroh u wan poi ha ka ri khlaw Sin bad u shong dara ha Kadesh. Hangta ka Miriam ka la ïap bad la tep ïa ka.

² Ym shym don um ha kata ka jaka ha kaba ki la sher dara, kumta u paidbah u ïalumlang sawdong ïa u Moses bad u Aaron,

³ bad u ïakren khñium: “Kan jin da la kham bha lada ngi la ïap ha khmat ka Ïingjaiñ U Trai lem bad kiwei pat ki para Israel.

⁴ Balei te ba phi wan ïalam ïa ngi sha kane ka ri khlaw? Hato ba ngin ïap hangne bad la ki jingri?

⁵ Balei ba phi wan ïalam ïa ngi na Ijipt sha ka jaka kaba sniew kum kane ha kaba u jingthung ei ei ruh um mih? Kane ka dei ka jaka ha kaba u kew ruh um long, u soh Dumbur ruh um long, u sohwaiñ ruh um long, bad u soh Pomkranet ruh um long. Wat ka umdih ruh kam don!”

⁶ U Moses bad u Aaron ki kynriah noh na uta u paidbah bad ki la ïeng ha ka jingkhang ka Ïingjaiñ. Ki dem khrup ha khyndew, bad ka jingshai kaba tyngshaiñ jong ka jingdon ryngkat U Trai ka la paw ha ki.

⁷ U Trai u ong ha u Moses,

⁸ “Shim ïa u diengduh uba don ha khmat ka Synduk ka Jutang, bad nangta ma me bad u Aaron men lumlang ïa u paidbah baroh. Hangta ha khmat jong ki baroh kren ha utai u mawsiang, bad ka um kan mihnoh na u. Ha kane ka rukom men pynmih um na uta u mawsiang na ka bynta jong u paidbah, khnang ba ma ki lem bad ki jingri jong ki kin ïoh dih.”

⁹ U Moses u la leit shim ïa uta diengduh kumba U Trai u la hukum.

¹⁰ U Moses bad u Aaron ki la lumlang ïa u paidbah baroh ha khmat u mawsiang, bad u Moses u ong, “Sngap mynta, phi ki nongïaleh pyrshah! Hato ngi hap pynmih um na une u mawsiang na ka bynta jong phi?”

¹¹ Nangta u Moses u rah shajrong ïa u diengduh bad u la tied ar sien ïa uta u mawsiang; te ka um kaba heh ka la mih, bad baroh ki briew lem bad ki jingri ki la ïadih.

¹² Hynrei U Trai u la sneng tyngeh ïa u Moses bad u Aaron. U ong “Namar ba phim don ka jingngeit kaba skhem ban pynpaw ïa ka bor bakhuid jong nga ha khmat ki paid Israel, phin ym ïoh ban ïalam ïa ki sha ka ri kaba nga la kular ban ai ha ki.”

¹³ Kane ka jia ha Meribah, ha kaba ki Israel ki la ïakhñium pyrshah ïa U Trai, bad ha kaba u la pynpaw ïa lade ba u long uba khuid.

U syiem Edom u khang ïa ki Israel ban ïaid Lynti na ka ri jong u

¹⁴ U Moses u la phah ïa ki nonglamktien na Kadesh sha u syiem Edom. Ki ong, “Kane ka khubor ka wan na ki para kur jong phi, kiba na ka jait Israel. Phi tip ïa ki jingeh kiba ngi la shah,

¹⁵ kumno ba ki kpa tymmen jong ngi ki la leit sha Ijipt, ha kaba ngi la shong la sah hangta bun bun snem. Ki nong Ijipt ki la lehbeiñ ïa ki kpa tymmen jong ngi bad ïa ngi ruh,

¹⁶ bad ngi la lynñiar sha U Trai ban ïoh jingïarap. U la ïohsngew ïa ka jinglynñiar jong ngi bad u la phah ïa u angel, uba la ïalam noh ïa ngi na Ijipt. Mynta ngi don ha Kadesh, ka shnong kaba ha khappud ka hima jong phi.

¹⁷ Sngewbha shah ïa ngi ban ïaid lynti na ka hima jong phi. Ma ngi lem bad ki jingri jong ngi, ngin ym sakma na ka lynti ïaid lane leit sha ki lyngkha ne ki bri sohwaiñ jong phi, bad ngin ym dih um na ki pukri jong phi. Ngin ïaid na lynti bah haduh ba ngin da ïaid lait na ka hima jong phi.”

¹⁸ Hynrei ki Edom ki ong, “Ngim shah ïa phi ban ïaid lyngba ïa ka ri jong ngi! Lada phi pyrshang, ngin mih bad tur ïaleh ïa phi.”

¹⁹ Ki paid Israel ki ong, “Ngin ïaid beit na lynti bah, bad lada ma ngi lane ki jingri jong ngi, ngi dih ïa ka um jong phi, ngin da siewdor ïa ka — baroh kaba ngi kwah ka long ban shu ïaid lyngba.”

²⁰ Hynrei ki Edom ki ban ktien biang, “Ngim shah!” Bad ki la wan mih bad ka kynhun ïapom kaba khlaiñ ban tur ïaleh ïa ki paid Israel.

²¹ Namar ba ki Edom kim shym la shah ïa ki Israel ban ïaid lyngba ïa ka hima jong ki, ki Israel ki la phai noh bad ïaid na kawei pat ka lynti.

Ka jingïap u Aaron

²² U paid Israel baroh u la mihnoh na Kadesh bad u la wan poi ha u lum Hor,

²³ uba ha khappud ka hima Edom. Hangta U Trai u ong ha u Moses bad u Aaron,

²⁴ “U Aaron un ym ïohrung ha kata ka ri ba nga la kular ban ai ha ki Israel; un sa ïap noh, namar baroh ar ngut phi la ïaleh pyrshah ïa ka hukum jong nga ha Meribah.

²⁵ Ïalam ïa u Aaron bad u Eleasar u khun jong u sha kliar u Lum Hor,

²⁶ bad hangta law noh ïa ki jaiñkup lyngdoh na u Aaron bad pynkup ïa ki ha u Eleasar. U Aaron un ïap hangta.”

²⁷ U Moses u la leh kumba U Trai u la hukum. Ki la ïaleit kiew ïa u Lum Hor haba ïohi uta u paidlang baroh,

²⁸ bad u Moses u la law noh ïa ki jaiñkup lyngdoh na u Aaron bad u pynkup ïa ki ha u Eleasar. Hangta ha kliar lum u Aaron u la ïap, bad u Moses bad u Eleasar ki wan hiar noh.

²⁹ U paidlang baroh u la tip ba u Aaron u la ïap, bad ki la ïambriew na ka bynta jong u haduh u laiphew sngi.