JINGKHEIÑ 2 - Khasi CL Bible (BSI)

Ka jingpynbeit ryntih ïa ki jait Israel ha ka jaka sher dara

¹ U Trai u ai ha u Moses bad u Aaron ïa kine ki jingbthah.

² Haba ki Israel ki pynïeng dara, uwei pa uwei u briew un shong hapoh ka lama jong ka kynhun jong u bad hapoh ka lama kur jong u. Dei ban pynïeng ïa ka dara baroh sawdong ka Ïingjaiñ.

^3-9 Ha ka phang mihngi, kito kiba hapoh ka lama jong ka kynhun u Judah kin sher dara hapoh la ki kynhun, hapoh ki nongïalam jong ki, kumne harum: Ka jait Judah ha ka jingïalam u Nahshon u khun jong u Amminadab ka don hynñiewphew saw hajar hynriewspah ngut. Ka jait Issakhar ha ka jingïalam u Nethanel u khun jong u Suar ka don sanphew saw hajar sawspah ngut. Ka jait Sebulun ha ka jingïalam u Eliab u khun jong u Helon ka don sanphew hynñiew hajar sawspah ngut. Baroh lang ki don shi lakh phraphew hynriew hajar sawspah ngut. Ka kynhun jong u Judah kan ïaid nyngkong.

^10-16 Ha ka liang kaba shaphang shathie, kito kiba hapoh ka lama jong ka kynhun u Reuben kin sher dara ha ki kynhun jong ki, hapoh ki nongïalam jong ki, kumne harum: Ka jait Reuben ha ka jingïalam u Elisur u khun jong u Shedeur ka don sawphew hynriew hajar sanspah ngut. Ka jait Simeon ha ka jingïalam u Shelumiel u khun jong u Surishaddai ka don sanphew khyndai hajar laispah ngut. Ka jait Gad ha ka jingïalam u Eliasaph u khun jong u Deuel ka don sawphew san hajar hynriewspah sanphew ngut. Baroh lang ki don shi lakh sanphew wei hajar sawspah sanphew ngut. Ka kynhun jong u Reuben kan long kaba ar ban ïaid.

¹⁷ Nangta, hapdeng ki ar ki kynhun kiba sha khmat bad ki ar kynhun kiba khatduh kin ïaid ki Lebi da kaba bah ïa ka Ïingjaiñ. Kawei pa kawei ka kynhun kan ïaid ha kajuh ka rukom kumba ki sher dara, kawei kawei ha la ka jaka hapoh la ka jong ka lama.

^18-24 Ha ka phang sepngi, kito kiba hapoh ka lama jong ka kynhun u Ephraim kin sher dara ha la ki kynhun jong ki, hapoh ki nongïalam jong ki, kumne harum. Ka jait Ephraim ha ka jingïalam u Elishama u khun jong u Ammihud ka don sawphew hajar sanspah ngut. Ka jait Manasseh ha ka jingïalam u Gamaliel u khun jong u Pedahsur ka don laiphew ar hajar arspah ngut. Ka jait Benjamin ha ka jingïalam u Abidan u khun jong u Gideoni ka don laiphew san hajar sawspah ngut. Baroh lang ki don shi lakh phra hajar shispah ngut. Ka kynhun u Ephraim kan long kaba lai ban ïaid.

^25-31 Ha ka phang kaba shatei, kito kiba hapoh ka lama jong ka kynhun jong u Dan kin sher dara ha ki kynhun jong ki, hapoh ki nongïalam jong ki, kumne harum: Ka jait Dan ha ka jingïalam u Ahieser u khun jong u Ammishaddai ka don hynriewphew ar hajar hynñiewspah ngut. Ka jait Asher ha ka jingïalam u Pagiel u khun jong u Okhran ka don sawphew wei hajar sanspah ngut. Ka jait Naphtali ha ka jingïalam u Ahira u khun jong u Enan ka don sanphew lai hajar sawspah ngut. Baroh lang ki don shi lakh sanphew hynñiew hajar hynriewspah ngut. Ka kynhun jong u Dan kan ïaid khatduh.

³² Ka jingdon ki paid Israel kiba la shim kyrteng ha ki bynta, kynhun kynhun, ka long baroh hynriew lakh lai hajar sanspah sanphew ngut.

³³ Kumba U Trai u la hukum ïa u Moses, ïa ki Lebi ym shym la shim kyrteng bad kiwei pat ki Israel.

³⁴ Kumta ki paid Israel ki la leh ïa baroh kaba U Trai u la hukum ïa u Moses. Ki la sher dara, uwei uwei hapoh la ka jong ka lama bad ki la ïaid shaphrang, uwei uwei bad la ka jong ka kur.