JINGKHEIÑ 19 - Khasi CL Bible (BSI)

U dpei na ka masi kaba rong saw

¹ U Trai u la hukum ïa u Moses bad u Aaron

² ban ai ïa kine ki jingbuhbeit ryntih ha ki Israel. “Wallam ha u Moses bad u Aaron kawei ka masi lud rong saw ka bym don kano kano ka jingduna bad ïa kaba ym pat shym la pyntreikam,

³ bad kin ai ïa ka ha u Eleasar u lyngdoh. Dei ban ïalam ïa ka shabar ka jaka sher dara bad dei ban pynïap ïa ka hangta ha khmat jong u.

⁴ Nangta u Eleasar un shim khyndiat na ka snam jong ka bad un synreit ïa ka hynñiew sien da la ka shynriah'ti sha ka phang jong ka Ïingjaiñ.

⁵ Dei ban thang ïa kata ka masi lem bad ka snieh, ka doh, ka snam, bad ki snier jong ka ha khmat jong u lyngdoh.

⁶ Nangta, un shim katto katne ka dieng Kedar, u tnat Hissop, bad u tyllai uba rong saw bad un bret ïa ki ha ka ding.

⁷ Hadien kata, un sait ïa la ki jaiñ bad theh um ïa lade, bad nangta u lah ban rung sha ka jaka shong dara; hynrei u ïailong u bymkhuid haduh janmiet.

⁸ Uta uba thang ïa kata ka masi ruh u dei ban sait ïa la ki jaiñ bad theh um ïa lade, hynrei u ruh u ïailong u bymkhuid haduh janmiet.

⁹ Nangta uno uno u briew u bymkhuid kat kum ka jinglehniam un khat ïa u dpei jong kata ka masi bad buh ïa ki ha ka jaka kaba khuid kat kum ka jinglehniam shabar ka jaka sher dara, ha kaba dei ban buh kyrpang ïa ka hangta na ka bynta ka kynhun Israel ban pyndonkam ha kaba pynkhreh ïa ka um na ka bynta ka jingweng ïa ka jingbymkhuid kat kum ka jinglehniam. Ïa kane ka jinglehniam dei ban leh ban weng ïa ka pop.

¹⁰ Uta uba khat ïa u dpei u dei ban da sait ïa la ki jaiñ, hynrei u ïailong u bymkhuid haduh janmiet. Kane ka rukom pynïaid ryntih ka long kaba dei ha ki por ki ban wan baroh na ka bynta ki Israel bad ki nongwei kiba shong basah hapdeng jong ki.

Haba ktah ïa ka metïap

¹¹ “Kito kiba ktah ïa ka metïap ki long ki bymkhuid kat kum ka jinglehniam haduh hynñiew sngi.

¹² Ki dei ban pynkhuid ïa lade da ka um ka jingpynkhuid ha ka sngi kaba lai bad ha ka sngi kaba hynñiew, te kin sa long kiba khuid. Hynrei lada kim pynkhuid ïa lade ha ka sngi kaba lai bad ha ka sngi kaba hynñiew, kin ym long kiba khuid.

¹³ Kito kiba ktah ïa ka metïap bad ki bym pynkhuid ïa lade ki sah hi ki bymkhuid, namar ba ym shym la synreit ïa ka um ka jingpynkhuid ha ki. Kita ki pyntngit ïa ka Ïingjaiñ jong U Trai, bad yn ym ñiew shuh ïa ki kum ki briew jong U Blei.

¹⁴ “Haba u briew u ïap hapoh ka ïingjaiñ, mano mano ba don hapoh ka ïingjaiñ ha ka por ba ïap lane ba rung hapoh jong ka u long u bymkhuid haduh hynñiew sngi.

¹⁵ Uwei pa uwei u khra bad u khiew hapoh ka ïingjaiñ u bym don jingtap u long u bymkhuid.

¹⁶ Lada uno uno u ktah ïa u briew uba la shah pynïap lane uba ïap hi shabar lane lada uno uno u ktah ïa ka shyieng briew lane ïa ka jingtep, ki long ki bymkhuid haduh hynñiew sngi.

¹⁷ “Ban weng ïa ka jingbymkhuid, shim khyndiat u dpei na kata ka masi rong saw ïa kaba la thang ban weng noh ïa ka pop bad buh ïa ka ha u khiew, bad theh hangta ïa ka um ba dang shu wan tong.

¹⁸ Ha ka bynta kaba nyngkong u briew uba khuid kat kum ka jinglehniam un shim ïa u tnat Hissop, un wieh ïa u ha kata ka um, bad un synreit ha kata ka ïingjaiñ, ha ki jingbuh jingsat baroh, bad ha ki briew kiba don hangta. Ha ka bynta kaba ar, uta uba khuid kat kum ka jinglehniam un synreit ïa kata ka um ha kita kiba la ktah ïa ka shyieng briew, lane ïa ka metïap, lane ïa ka jingtep.

¹⁹ Ha ka sngi kaba lai bad ha ka sngi kaba hynñiew, u briew uba khuid kat kum ka jinglehniam un synreit ïa ka um ha kita ki briew ki bymkhuid. Ha ka sngi kaba hynñiew u dei ban pynkhuid ïa kito, kiba, hadien ba ki la sait ïa la ki jaiñ bad sum ïa lade, ki kylla long kiba khuid ha ka por sep sngi kat kum ka jinglehniam.

²⁰ “Kito kiba long bymkhuid kat kum ka jinglehniam bad ki bym pynkhuid ïa lade ki ïailong ki bymkhuid, namar ba ym shym la synreit ïa ka um ka jingpynkhuid halor jong ki. Ki pyntngit ïa ka Ïingjaiñ U Trai bad yn ym ñiew shuh ïa ki kum ki briew jong U Blei.

²¹ Phi dei ban sumar ïa kane ka jingpynbeit ryntih ha ki por ki ban wan baroh. Uta u briew uba synreit ïa ka um ka jingpynkhuid u dei ruh ban sait ïa la ki jaiñ; uno uno uba ktah ïa kata ka um u ïailong u bymkhuid haduh janmiet.

²² Kaei kaei baroh ba u briew u bymkhuid u ktah ka long ka bymkhuid, bad uno uno uwei pat uba ktah ïa kata u long u bymkhuid haduh janmiet.”