JINGKHEIÑ 18 - Khasi CL Bible (BSI)

Ki kamram ki lyngdoh bad ki Lebi

¹ U Trai u ong ha u Aaron, “Ma me, ki khun shynrang jong me, bad ki Lebi ruh, phin hap shah ïa kiei kiei kiba mih na kano kano ka jingleh palat ha ka jingshakri ha ka Ïingjaiñ ka Jingdon Ryngkat jong nga, hynrei tang ma me bad ki khun shynrang jong me kin shah ïa kiei kiba mih ha ka jingshakri ha ka jinglong lyngdoh.

² Wan ïalam ïa la ki ba-ha-ïing ha-sem, kiba na ka jait Lebi, ban ïatreilang bad ïarap ïa me katba me bad ki khun shynrang jong me phi dang ïashakri ha ka Ïingjaiñ.

³ Ki dei ban pynbiang ïa ki kamram jong ki sha me bad ïa la ki jingkitkhlieh na ka bynta ka Ïingjaiñ, hynrei kim bit ban pyndei ïa ki tiar kiba khuid ha ka Jaka Kyntang, lane ïa ka duwan. Lada ki leh kumta, ïa ki bad ïa me yn pynïap noh.

⁴ Ki dei ban ïarap ïa me bad pyndep ïa la ki kamram kiba ïadei bad ka jingshakri ha ka Ïingjaiñ, hynrei uno uno u bym bit bym biang um lah ban ïarap ïa me.

⁵ Tang ma me bad ki khun shynrang jong me ki dei ban pyndep ïa ki jingkitkhlieh na ka bynta ka Jaka Kyntang bad ka duwan, khnang ba ngan ym khie bitar shuh ïa ki paid Israel.

⁶ Dei ma nga uta uba la jied ïa ki ba-ha-ïing ha-sem jong me, ki Lebi, napdeng ki Israel kum ka jingai sngewbha ïa me. Ki, ki long kiba la pynkyrpang sha nga, khnang ba ki lah ban pyndep ïa la ki kamram ha ka Ïingjaiñ.

⁷ Hynrei tang ma me bad ki khun shynrang jong me phin pyndep ïa ka jingkitkhlieh ka jinglong lyngdoh kaba ïadei bad ka duwan bad kaei kaba don ha ka Jaka kaba Kyntang Tam. Kine kiei kiei ki long ki jingkitkhlieh jong me, naba nga la ai ha me ïa ka kam lyngdoh kum ka jingai sngewbha. Uno uno uwei pat u briew u bym bit bym biang uba wan hajan kita ki tiar kiba kyntang un shah pynïap.”

Ka bhah jong ki lyngdoh

⁸ U Trai u ong ha u Aaron, “Da kynmaw ba nga la ai ha me ïa ki jingainguh kiba kyrpang kiba la ai ïa nga ki bym dei kiba la thang kum ki jingkñia. Nga la ai ïa ki ha me bad ha ki khun ki ksiew jong me kum ka bynta ba la ai ha me junom la junom.

⁹ Kine harum ki long ki jong me na ki jingainguh kiba kyntang tam ïa ki bym shym la thang ha ka duwan: ki jingainguh bam, ki jingkñia namar ka pop, bad ki jingainguh namar ka jingpalat. Baroh kaba la wanrah ha nga kum ka jingainguh bakyntang ka long ka jong me bad jong ki khun shynrang jong me.

¹⁰ Me dei ban bam ïa kine kiei kiei ha ka jaka kyntang, bad tang ki shynrang kiba lah ban bam ïa ki; ñiew ïa ki, kiba khuid.

¹¹ “Nalor kine, kiwei pat ki jingai kiba kyrpang ba ki Israel ki wanrah sha nga ki dei ki jong me. Nga ai ïa ki ha me, ha ki khun shynrang bad ki khun kynthei jong me, ha ki por ki ban wan baroh. Uwei pa uwei na ka longïing jong me uba khuid kat kum ka jinglehniam u lah ban bam ïa ki.

¹² “Nga ai ha me ïa ki soh nyngkong kiba kynsai tam baroh na ka umphniang Olib, ka waiñ bad u kew ba ki Israel ki ai ïa nga man la ka snem.

¹³ Baroh ki long ki jong me. Uwei pa uwei na ka ïing jong me uba khuid kat kum ka jinglehniam u lah ban bam ïa ki.

¹⁴ “Kaei kaei baroh ha Israel ïa kaba la pynkyntang khnang khlem kyndon ha nga ka long ka jong me.

¹⁵ “Uno uno ïa uba la kha nyngkong, la u dei u briew ne u jingri, ba ki Israel ki wanrah sha nga u long u jong me. Hynrei me dei ban pdiang ïa ka jingsiew ban thied pat ïa uwei pa uwei u khun ba la kha nyngkong, bad uwei pa uwei u jingri ba la kha nyngkong, ïa uba la ñiew ba u long u bymkhuid.

¹⁶ Ïa ki khunlung dei ban thied pat ynda ki la dap shi bnai ha ka jingbuhdor bym kylla kaba long san tylli ki sbai rupa, kat kum ka jingthew ba dei rukom.

¹⁷ Hynrei ïa kiba la kha nyngkong na ki masi, ki langbrot bad ki blang ym dei ban thied pat; ki long kiba la pynkyrpang sha nga, bad dei ban kñia ïa ki. Synreit ïa ka snam jong ki ha ka duwan bad thang ïa ka khleiñ jong ki kum ka jingainguh bam, ka jingiw kaba pynsngewbha ïa nga.

¹⁸ Ka doh na ki, kum ka shadem bad ka kjat-dien kamon kiba long ki jingainguh bakyrpang, ki long ka bynta jong me.

¹⁹ “Nga ai ha me, ha ki khun shynrang bad kynthei jong me, ha ki por ki ban wan baroh ïa ki jingai bakyrpang baroh ba ki Israel ki ai ha nga. Kane ka long ka jutang bym lah pynkheiñ kaba nga la pynlong bad me lem bad ki khun ki ksiew jong me.”

²⁰ U Trai u ong ha u Aaron, “Men ym ïoh ka jingdon jingem kum ka jingïohpateng bad ym don kano kano ka bynta na ka ri Israel ban ai ha me. Tang ïa nga U Trai, me donkam.”

Ka bhah jong ki Lebi

²¹ U Trai u ong, “Nga la ai ha ki Lebi ïa ka bynta kaba shiphew baroh ba ki Israel ki wanrah sha nga. Kane ka long ka jingsiew ïa ka jingshakri jong ki ha kaba sumar ïa ka Ïingjaiñ ka Jingdon Ryngkat jong nga.

²² Kiwei pat ki Israel kim dei shuh ban wan sha jan ka Ïingjaiñ ïoh ki wallam ha lade ïa ka jingshah pynshitom da ka jingïap.

²³ Naduh mynta dei tang ki Lebi ki ban sumar ïa ka Ïingjaiñ bad kin kitkhlieh nadong shadong ïa ka. Kane ka long ka hukum kaba ïaineh bad kaba teh ïa ki khun ki ksiew jong phi pateng la pateng.

²⁴ Ki Lebi kin ym don ka jingdon jingem baneh ha Israel, namar nga la ai ha ki kum ka bynta jong ki ïa ka kaba shiphew ba ki Israel ki wanrah sha nga kum ka jingai kaba kyrpang. Dei namar kata ba nga la ïathuh ïa ki ba kin ym don ka jingdon jingem baneh ha Israel.”

Kaba shiphew jong ki Lebi

²⁵ U Trai u la hukum ïa u Moses

²⁶ ban ong ha ki Lebi, “Haba phi ïohpdiang na ki Israel ïa ka bynta kaba shiphew ba U Trai u ai ha phi kum ka jingïohkynti jong phi, phi dei ban wanrah ïa kaba shiphew na kata kum ka jingnoh synñiang kaba kyrpang sha U Trai.

²⁷ Yn ñiew ïa kane ka jingnoh synñiang kaba kyrpang ba ka ïaryngkat dor bad ka jingainguh ba u nongrep u wanrah da u kew thymmai bad ka waiñ thymmai.

²⁸ Ha kane ka rukom phi ruh phin wanrah kumjuh ïa ka jingnoh synñiang kaba kyrpang sha U Trai na baroh kaba shiphew ba phi ïohpdiang na ki Israel. Phin ai ïa kane ka jingnoh synñiang kaba kyrpang na ka bynta U Trai ha u Aaron u lyngdoh.

²⁹ Ai ïa ka na kaba bha tam kaba phi la ïohpdiang.

³⁰ Haba phi la ai ïa kaba bha tam, phi lah ban bat ïa kaba dang sah, kumba u nongrep u bat ïa kaba dang sah hadien ba u la wanrah ïa la ka jingainguh.

³¹ Ma phi bad ki ba-ha-ïing ha-sem jong phi, phi lah ban bam ïa kata kaba dang sah ha kano kano ka jaka, namar ka long ka bainong ïa ka jingshakri jong phi ha ka Ïingjaiñ.

³² Haba phi la wanrah ïa kaba bha tam sha U Trai, phim long kiba shah rem haba phi bam ïa ka. Hynrei da sumar ban ym pyntngit ïa ki jingai kiba khuid jong ki Israel da kaba bam ïa kino kino ki jingai shuwa kaba ai ïa kaba bha tam. Lada phi leh kumta, yn pynïap ïa phi.”