JINGKHEIÑ 17 - Khasi CL Bible (BSI)

U diengduh jong u Aaron

¹ U Trai u ong ha u Moses,

² “Ong ïa ki paid Israel ban wan ai ha me khat-ar tylli ki diengduh, uwei uwei u diengduh na u nongïalam jong kawei kawei ka jait. Thoh ïa ka kyrteng uta u briew ha u diengduh jong u,

³ bad nangta thoh ïa ka kyrteng u Aaron ha u diengduh na ka bynta ka jait Lebi. Dei ban don uwei u diengduh ïa u nongïalam jong kawei pa kawei ka jait.

⁴ Nangta rah ïa ki shapoh ka Ïingjaiñ ka Jingdon Ryngkat jong nga bad buh ïa ki ha khmat ka Synduk ka Jutang, ha kaba nga ïashem bad me.

⁵ Te u diengduh jong uta u briew ïa uba nga la jied un khie lung. Da kumta ngan pynsngap jar ïa ki jingïaikren khñium jong kine ki Israel pyrshah ïa me.”

⁶ Kumta u Moses u la kren ha ki Israel, bad uwei pa uwei na ki nongïalam jong ki, ki la ai ha u mar uwei u diengduh, uwei na ka bynta kawei kawei ka jait, baroh ki long khat-ar tylli, bad ïa u diengduh jong u Aaron la buh lem bad ki.

⁷ Nangta u Moses u buh ïa kita ki diengduh baroh hapoh ka Ïingjaiñ ha khmat ka Synduk ka Jutang jong U Trai.

⁸ Ha ka sngi kaba bud, haba u Moses u leit shapoh ka Ïingjaiñ, u la ïohi ba u diengduh jong u Aaron, uba ïeng na ka bynta ka jait Lebi, u la khie lung. U la shylluit, phuh syntiew, bad sei ki soh almond kiba ih!

⁹ U Moses u la shim ïa kita ki diengduh baroh bad u la pyn-i ïa ki ha ki Israel. Ki la ïohi ïa kaba la jia, bad uwei pa uwei u nongïalam u la shim noh ïa la u jong u diengduh.

¹⁰ U Trai u ong ha u Moses, “Buh biang ïa u diengduh jong u Aaron ha khmat ka Synduk ka Jutang. Dei ban buh ïa u kum ka jingmaham ïa ki Israel kiba ïaleh pyrshah ba kin ïap lymda ki sangeh noh ïa ki jingkren khñium jong ki.”

¹¹ U Moses u leh kumba U Trai u la hukum.

¹² Ki paid Israel ki ong ha u Moses, “Te kata ka dei kaba kut ïa ngi!

¹³ Lada mano mano ban wan wat tang hajan ka Ïingjaiñ ruh un ïap, te ngi baroh ngi long hi kum kiba la ïap.”