JINGKHEIÑ 16 - Khasi CL Bible (BSI)

Ka jingïaleh pyrshah u Korah, u Dathan bad u Abiram

^1-2 U Korah u khun jong u Ishar na ka jait Lebi jong u Kohath, u la ïaleh pyrshah ïa ka jingïalam jong u Moses. La wan ïasoh lem bad u da lai ngut ki dkhot na ka jait Reuben — u Dathan bad u Abiram, ki khun shynrang jong u Eliab, bad u On u khun jong u Peleth — bad da ki arspah sanphew ngut kiwei pat ki rangbah Israel, ki nongïalam kiba pawkhmat ba la jied da ka kynhun.

³ Ki la ïalumlang ha khmat u Moses bad u Aaron bad ki ong ha ki, “Phi la leh shaba palat! Baroh ki dkhot jong ka kynhun ki long ki jong U Trai, bad U Trai u don lem bad ngi baroh. Balei te Moses me buh ïa lade uba halor jong ka kynhun jong U Trai?”

⁴ Haba u Moses u ïohsngew ïa kane, u la dem khrup ha khyndew bad u duwai.

⁵ Nangta u la ong ha u Korah bad ki nongbud jong u, “Lashai mynstep U Trai un pyn-i ha ngi ïa uta uba long u jong u; un sa shah ïa uta uba long u jong u, kata, uta keiñ ïa uba u la jied, ban leit sha u ha ka duwan.

^6-7 Lashai mynstep, ma phi bad ki nongbud jong phi phin shim ïa ki khiew buh ding, phin buh hangta ïa u rnga ding uba rhem bad ka jingiwbih, bad leit rah ïa ki sha ka duwan. Ngin sa peit hangta ïa uno na ngi U Trai u la jied. Dei ma phi hi ki Lebi kiba la leh shaba palat!”

⁸ U Moses u la bteng ban kren ha u Korah, “Da sngap bha, phi ki Lebi!

⁹ Phi tharai ba ka long kaei kaei kaba rit ba U Blei ki Israel u la pynkyrpang ïa phi na ka kynhun, ba phi lah ban leit sha u, ban leh ïa ka kamram jong phi ha ka Ïingjaiñ U Trai, bad ban ai jingshakri ïa ka kynhun bad ban shakri ïa ki?

¹⁰ U la ai ïa phi bad ïa kiwei pat ki Lebi ban ïoh ïa kane ka burom — bad mynta pat phi pyrshang ban ïoh sa ïa ka kam lyngdoh ruh!

¹¹ Haba phi ujor pyrshah ïa u Aaron, ka mut shisha pyrshah ïa U Trai ba ma phi bad ki nongbud jong phi, phi ïaleh pyrshah.”

¹² Nangta u Moses u phah khot ïa u Dathan bad u Abiram, hynrei ki ong, “Ngim wan!

¹³ Hato kam pat biang tang ba phi la ïalam noh ïa ngi na ka ri Ijipt kaba seisoh ban pynïap ïa ngi hangne ha ri khlaw? Phi kwah sa ban da long kynrad halor jong ngi?

¹⁴ Da shisha, phim shym la ïalam ïa ngi sha kata ka ri kaba tuid da ka dud bad ka ngap lane ai ha ngi ïa ki lyngkha bad ki bri sohwaiñ kum ka jingïohkynti jong ngi, bad mynta phi pyrshang ban shukor ïa ngi. Ngim wan!”

¹⁵ U Moses u la bitar lep, bad u ong ha U Trai, “Wat pdiang ïa kano kano ka jingainguh ba kine ki briew ki wallam. Ngam shym la leh bymdei ïa uwei ruh na ki; ngam shym la shim ruh wat tang kawei na ki kada jong ki.”

¹⁶ U Moses u ong ha u Korah, “Lashai ka sngi, ma me bad ki nongbud jong me baroh arspah sanphew ngut phi dei ban wan sha ka Ïingjaiñ ka Jingdon Ryngkat U Trai; u Aaron ruh un don lang hangta.

¹⁷ Uwei pa uwei na phi un rah ïa la u khiew buh ding, un buh hangta ïa ka jingiwbih, bad nangta un wanrah ïa ka sha ka duwan.”

¹⁸ Kumta uwei pa uwei na ki u la shim ïa la u khiew buh ding, u buh hangta ïa u rnga ding uba rhem bad ka jingiwbih, bad u ïeng ha ka jingkhang ka Ïingjaiñ lem bad u Moses bad u Aaron.

¹⁹ Nangta u Korah u lumlang ïa ka kynhun baroh kawei, bad ki la ïeng da kaba phai pyrshah ïa u Moses bad u Aaron ha ka jingkhang ka Ïingjaiñ. Kynsan kynsan ka jingshai batyngshaiñ jong ka jingdon U Trai ka paw ha ka kynhun baroh kawei,

²⁰ bad U Trai u la ong ha u Moses bad u Aaron,

²¹ “Ïeng sharud na kine ki briew bad ngan pynjot thiaw ïa ki kumne kumne.”

²² Hynrei u Moses bad u Aaron ki dem khrup ha khyndew bad ki ong, “A Blei, me, me long ka thymmei jong ka jingim baroh. Haba uwei na ngi u leh pop, hato men shu bitar lep ïa ka kynhun baroh kawei?”

²³ U Trai u ong ha u Moses,

²⁴ “Ong ïa ki briew ban kynriah sha jngai na ki ïingjaiñ jong u Korah, u Dathan, bad u Abiram.”

²⁵ Nangta u Moses lem bad ki nongïalam jong ki Israel, ki la leit sha u Dathan bad u Abiram.

²⁶ U ong ha uta u paidbah, “Kynriah na ki ïingjaiñ jong kine ki riewbymman bad wat ktah ïa kaei kaei kaba dei ka jong ki, ïoh phi shah pynjot lang bad ki namar ki pop jong ki.”

²⁷ Kumta ki la kynriah noh na ki ïingjaiñ jong u Korah, u Dathan, bad u Abiram. U Dathan bad u Abiram ki la mih shabar bad ïeng ha ka jingkhang jong ki dara jong ki lem bad ki tnga bad ki khun ki kti jong ki.

²⁸ U Moses u ong ha uta u paidbah, “Da kane phin tip ba dei U Trai uba la phah ïa nga ban leh ïa kine kiei kiei baroh, bad ba ym dei da ka mon jong nga ba nga la leh ïa ki.

²⁹ Lada kine ki briew ki ïap kumba ïap ki parabriew khlem da hap ha kano kano ka jingpynshitom na U Blei, te shisha U Trai um shym la phah ïa nga.

³⁰ Hynrei lada U Trai u leh ïa kaei kaei kaba ym pat ju ïohsngew, bad ba ka khyndew ka ang bad nguid ïa ki bad ïa baroh kat kaba ki don, ba kumta ki hap sha ka pyrthei kiba ïap, te phin sa tip ba kine ki briew ki la kyntait ïa U Trai.”

³¹ Mar ïadep kren ïa kine ki ktien, ka khyndew ha kaba u Dathan bad u Abiram ki ïeng ka la kad arliang

³² bad ka la nguid ïa ki bad ïa ki ba-ha-ïing ha-sem jong ki, lem bad ïa ki nongbud jong u Korah baroh bad ïa ki jingdon jingem jong ki.

³³ Da kumta ki la hap sha ka pyrthei kiba ïap ryngkat bad ki jingdon jingem jong ki. Ka khyndew ka tap ïa ki, bad ki la jah jar.

³⁴ Baroh ki Israel kiba don hangta ki la phet ïap haba ki ïohsngew ïa ka jinglynñiar jong ki. Ki la ïa-pyrta, “Phet, Ka khyndew ka lah ban nguid ïa ngi ruh!”

³⁵ Nangta U Trai u phah ïa ka ding kaba meh, bad ka bam duh khoit ïa kita ki arspah sanphew ngut ki briew kiba la wanrah ïa ki jingiwbih.

Ki khiew buh ding

³⁶ Nangta U Trai u ong ha u Moses,

³⁷ “Ong ïa u Eleasar u khun jong u Aaron uba long lyngdoh ban weng noh ïa ki khiew buh ding kiba da ka rnong na kiba sah jong ki briew kiba la shah thang bad ban bret ïa u rnga ding na kita ki khiew shaei shaei, namar kita ki khiew buh ding ki long kiba khuid.

³⁸ Ki kylla long kiba khuid haba la wanrah ïa ki ha ka duwan U Trai. Kumta, shim ïa ki khiew buh ding jong kita ki briew kiba la shah pynïap namar ki pop jong ki, shoh pynstang ïa ki ban shna jingtap ïa ka duwan. Kan long ka jingmaham ïa ki Israel.”

³⁹ Kumta u Eleasar u lyngdoh u la shim ïa ki khiew buh ding bad u phah shoh pynstang ïa ki ban shna jingtap ïa ka duwan.

⁴⁰ Kane ka la long ka jingmaham ïa ki Israel ba uno uno u bym shym la hiarpateng na u Aaron um bit ban wan sha ka duwan ban thang jingiwbih ha khmat U Trai, lym kumta un shah pynjot thiaw kum u Korah bad ki nongbud jong u. Ïa kane baroh la leh kumba U Trai u la hukum ïa u Eleasar da u Moses.

U Aaron u pyllait im ïa u paidbah

⁴¹ Ha ka sngi kaba bud, ka kynhun baroh ka la khñium pyrshah ïa u Moses bad u Aaron, bad ka ong, “Phi la pynïap katto katne ngut ki briew jong U Trai.”

⁴² Hadien ba ki la ïalumlang baroh ban pynpaw pyrshah ïa u Moses bad u Aaron, ki la phai shaphang ka Ïingjaiñ bad ki la ïohi ba u lyoh u la tap ïa ka bad ba ka jingshai batyngshaiñ jong ka jingdon ryngkat U Trai ka la paw.

⁴³ U Moses bad u Aaron ki la leit bad ïeng ha khmat jong ka Ïingjaiñ

⁴⁴ bad U Trai u ong ha u Moses,

⁴⁵ “Ïeng sharud na kine ki briew, bad ngan pynjot thiaw ïa ki hangto hi.” Baroh ar ngut ki la dem khrup ha khyndew,

⁴⁶ bad u Moses u ong ha u Aaron, “Shim ïa u khiew buh ding jong phi, buh hangta ïa u rnga uba rhem na ka duwan, bad buh khyndiat ka jingiwbih halor ki rnga. Nangta leit rah kloi kloi ïa ka sha u paidbah bad pyndep ïa ka jinglehniam ka jingpynkhuid na ka bynta jong ki. Pynkloi! Ka jingbitar U Trai ka la mih, bad ka khlam ruh ka la sdang.”

⁴⁷ U Aaron u la kohnguh, u la shim ïa la u khiew buh ding bad mareh sha pdeng ki briew ba la ïalumlang. Haba u ïohi ba ka khlam ka la lah sdang, u buh ïa ka jingiwbih ha uta u rnga ding bad u pyndep ïa ka jinglehniam ka jingpynkhuid na ka bynta uta u paidbah.

⁴⁸ Kane ka la pynsangeh ïa ka khlam bad u la shu ïeng hapdeng kiba im bad kiba ïap.

⁴⁹ Baroh kiba la ïapkhlam ki long khatsaw hajar hynñiewspah ngut, khlem da ñiew ïa kito kiba la ïap noh ha ka jingïaleh pyrshah u Korah.

⁵⁰ Ynda ka khlam ka la sangeh, u Aaron u leit phai sha u Moses ha ka jingkhang jong ka Ïingjaiñ.