JINGKHEIÑ 15 - Khasi CL Bible (BSI)

Ki Aiñ shaphang ka jingkñia

¹ U Trai u la ai ha u Moses

² ïa kine ki jingbuhbeit ryntih na ka bynta ki paid Israel ba kin bud ha ka ri kaba u mut ban ai ha ki.

³ Ïa u masi, u langbrot, ka langbrot lane ka blang lah ban wanrah ha U Trai kum ka jingainguh thang lane kum ka jingkñia ha kaba pyndep ïa ka jingsmai lane kum ka jingainguh mon sngewbha lane kum ka jingainguh ha ki Jingkhawai Niam kiba man ka por; ka jingiw jong kine ki jingainguh bam ka pynsngewbha ïa U Trai.

^4-5 Uno uno uba wanrah ïa ka langbrot ne ka blang kum ka jingainguh thang ha U Trai u dei ban wallam lem bad kata ka jingri shi kilo u 'purew ba la khleh bad shi litar ka umphniang Olib kum ka jingainguh bam, lem bad shi litar ka waiñ.

⁶ Haba la wanrah ïa u langbrot, ar kilo u 'purew ba la khleh bad shi litar shiteng ka umphniang Olib dei ban ai kum ka jingainguh bam, lem bad shi litar shiteng ka waiñ.

⁷ Ka jingiw jong kine ki jingkñia ka long kaba pynsngewbha ïa U Trai.

⁸ Haba la wanrah ïa u masi kum ka jingainguh thang, lane kum ka jingkñia ha kaba pyndep ïa kano kano ka jingsmai skhem, lane kum ka jingainguh jingpynïasuk,

⁹ dei ban wanrah lai kilo u 'purew ba la khleh bad ar litar ka umphniang Olib kum ka jingainguh bam, lem bad ar litar ka waiñ.

¹⁰ Ka jingiw jong kane ka jingkñia ka long kaba pynsngewbha ïa U Trai.

¹¹ Kata ka dei ka rukom haba wanrah ïa uwei u masi, u langbrot, ka langbrot, ne u 'langsohmoh.

¹² Haba wanrah kham bun ki jingri, ïa ki jingainguh bynrap dei ban pynbun kat ban ïabiang.

¹³ Baroh ki traishnong Israel ki dei ban leh ïa kane haba ki wanrah ïa ka jingainguh bam, ka jingiw kaba pynsngewbha ïa U Trai.

¹⁴ Bad lada ha kano kano ka por ki nongwei ki wan ban shong ban sah bad phi, la ka long tang shipor lane baroh shi rta, bad ki ai ka jingainguh bam, ka jingiw kaba pynsngewbha ïa U Trai, ki dei ban bud ïa kijuh ki jingbuhbeit ryntih.

¹⁵ Pateng la pateng, kijuh ki jingbuhbeit ryntih ki teh ïa phi bad ïa ki nongwei kiba shong basah bad phi. Ma phi bad ma ki phi ïalong kumjuh ha khmat U Trai.

¹⁶ Kijuh ki aiñ bad kijuh ki jingbuhbeit ryntih ki long ïa phi bad ïa ki.

¹⁷ U Trai u la ai ha u Moses

¹⁸ ïa kine harum ki jingbuhbeit ryntih na ka bynta ki paid Israel ban bud ha ka ri kaba u mut ban ai ha ki.

¹⁹ Haba bam ïa kano kano ka jingbam kaba mih hangta, khyndiat na ka dei ban buh sharud kum ka jingai kaba kyrpang sha U Trai.

²⁰ Haba phi shet kpu, ïa uta uba phi shet nyngkong na u kew thymmai dei ban wanrah kum ka jingai kaba kyrpang sha U Trai. Ïa une dei ban wanrah kumjuh kumba phi wanrah jingainguh kyrpang na u kew ba phi shoh.

²¹ Pateng la pateng, ïa kane ka jingai kaba kyrpang dei ban ai sha U Trai na u kpu ba phi shet.

²² “Hynrei lehse don uba kum bakla khlem da mut khnang ha kaba sumar ïa kine ki jingbuhbeit ryntih kiba U Trai u la ai ha u Moses.

²³ Bad lehse hadien habud ka kynhun kam lah ban leh lut ïa kaei kaei baroh kaba U Trai u la hukum lyngba u Moses.

²⁴ Lada kata ka jingbakla ka long namar ba ki paidbah kim tip, ki dei ban wanrah ïa u masi kum ka jingainguh thang, ka jingiw kaba pynsngewbha ïa U Trai, lem bad ka jingainguh bam bad ka jingainguh dih. Nalor kita, ki dei ban wanrah ïa u 'langsohmoh kum ka jingkñia namar ka pop.

²⁵ U lyngdoh un pyndep ïa ka jinglehniam ka jingpynkhuid ïa ka kynhun, bad yn sa map ïa ki, namar ka jingbakla ka long kaba khlem da mut khnang bad ba ki la wallam ruh ïa ka jingkñia namar ka pop kum ka jingainguh bam sha U Trai.

²⁶ Te yn map ïa ka kynhun Israel baroh bad ïa ki nongwei kiba shong basah hapdeng jong ki, namar iwei pa iwei ki la don bynta ha ka jingbakla.

²⁷ “Lada mano mano na phi, phi leh pop khlem da mut khnang, phi dei ban wanrah kawei ka blang kaba shisnem ka rta kum ka jingainguh namar ka pop.

²⁸ U lyngdoh un pyndep ïa ka jinglehniam ka jingpynkhuid ha ka duwan ban pynkhuid ïa phi na ka pop jong phi; bad yn sa map ïa phi.

²⁹ Kajuh ka jingbuhbeit ryntih ka long ïa baroh kiba leh pop khlem da mut khnang, la ki dei ki traishnong Israel ne ki nongwei bashong basah bad ki.

³⁰ “Hynrei mano mano ba leh pop khnang, la ki dei ki traishnong ne ki nongwei, ki long kiba la rem ba kim ñiewkor ïa U Trai, bad ki dei ban shah pynïap,

³¹ namar ki la kyntait ïa kaei ba U Trai u la ong bad ba ki la pynkheiñ khnang ïa kawei na ki hukum jong u. Kin kitkhlieh na ka bynta ka jingïap jong ki hi.”

U briew uba pynkheiñ ïa ka Sabbaton

³² Shisien, katba ki Israel ki dang don ha ka ri khlaw, la lap ïa uwei u briew uba dang lum diengïap ha ka Sabbaton.

³³ La leit lam ïa u ha u Moses, u Aaron, bad ka kynhun baroh kawei,

³⁴ bad la buh hapoh ka jingkhmih ki nongap, namar ym pat don ka jingpynshai yn leh kumno ïa u.

³⁵ Te U Trai u ong ha u Moses, “Ïa uta u briew dei ban pynïap; ka kynhun baroh kawei kan lynthem maw ïa u shabar ka jaka shong dara haduh ba un da ïap.”

³⁶ Kumta ka kynhun baroh kawei ka ïalam ïa u shabar ka jaka shong dara bad la lynthem maw ïa u haduh ba un da ïap, kumba U Trai u la hukum.

Ki jingbuhbeit ryntih shaphang ki ksai jyrthiaw

³⁷ U Trai u hukum ïa u Moses

³⁸ ban ong ha ki paid Israel, “Shna ki ksai jyrthiaw ha ki dong jaiñkup jong phi bad buh ïa u ksai uba jngum ha uwei uwei u jyrthiaw. Phi dei ban leh ïa kane shi lynter.

³⁹ Ki ksai jyrthiaw kin long kum ki jingpynkynmaw, bad man ka por ba phi ïohi ïa ki, phin kynmaw ïa ki hukum jong nga baroh bad kohnguh ïa ki; te kumta phin ym phai noh na nga bad bud ïa ki jingkwah mon bad ki jingkwah brai jong phi.

⁴⁰ Ki ksai jyrthiaw kin pynkynmaw ïa phi ban sumar ïa ki hukum jong nga baroh bad phin long ki jong nga nadong shadong.

⁴¹ Nga long U Trai U Blei jong phi; nga la wallam ïa phi na Ijipt ban long U Blei jong phi. Nga long U Trai.”