JINGKHEIÑ 14 - Khasi CL Bible (BSI)

U paidbah u khñium

¹ Baroh shi miet ki paidbah ki la kyang ha ka jingnoh mynsiem.

² Ki la khñium pyrshah ïa u Moses bad u Aaron, bad ki ong, “Kan jin da la kham bha ban ïap ha Ijipt lane wat hangne ha ka ri khlaw!

³ Balei keiñ U Trai u ïalam ïa ngi sha kata ka ri? Ngin shah pynïap ha ka thma, bad ki tnga jong ngi lem bad ki khun ki kti kin shah kem. Hato kam long kaba kham bha ba ngin ïaleit phai pat sha Ijipt?”

⁴ Kumta ki ïa-ong para ma ki, “To ngin jied uwei u nongïalam, bad ngin ïaleit phai pat sha Ijipt!”

⁵ Nangta u Moses bad u Aaron ki la dem ngon ha madan ha khmat uta u paidbah baroh.

⁶ Bad u Joshua u khun jong u Nun bad u Kaleb u khun jong u Jephunneh, ar ngut na kita ki nongsyntiat, ki la kad ïa la ki jaiñ da ka jingsngewsih,

⁷ bad ki la ong ha uta u paidbah, “Kata ka ri kaba ngi la leit swar ka long kaba bha shikatdei eh.

⁸ Lada U Trai u la sngewbha ïa ngi, un ïalam ïa ngi shata bad ai ha ngi ïa kata ka ri kaba tuid da ka dud bad ka ngap.

⁹ Wat ïaleh pyrshah ïa U Trai bad wat sheptieng ïa ki briew kiba shong hangta. Ngin jop da kaba suk ïa ki. U Trai u don lem bad ngi bad u la jop ïa ki blei kiba ïada ïa ki; kumta te wat sheptieng.”

¹⁰ Ka kynhun baroh kawei ka la byrngem ban lynthem maw ïa ki, hynrei kynsan ki paidbah ki la ïohi ïa ka jingshai batyngshaiñ jong ka jingdon ryngkat U Trai ba ka paw halor ka Ïingjaiñ.

U Moses u duwai na ka bynta u paidbah

¹¹ U Trai u ong ha u Moses, “Sa katno kine ki briew kin kyntait ïa nga? Sa katno ruh kin kyntait ban shaniah ha nga, wat la nga la leh bun ki kambah hapdeng jong ki?

¹² Ngan phah ka jingïapthem bad pynjot thiaw ïa ki, hynrei ïa me ngan pynlong u kpa ka jaitbynriew kaba kham khraw bad kham khlaiñ ban ïa ki!”

¹³ Hynrei u Moses u ong ha U Trai, “Me la wallam ïa kine ki briew na Ijipt da ka bor jong me. Haba ki Ijipt ki ïohsngew ïa kaei kaba me la leh ïa kine ki briew,

¹⁴ kin sa ïathuh ïa kata ha ki briew kiba shong ha kane ka ri. Kine ki briew ki la lah ïohsngew ba me, A Trai, me don lem bad ngi, bad ba me paw ha kaba ïohi shai haba u lyoh jong me u sangeh halor jong ngi bad ba me leit ha shuwa jong ngi ha u rishot lyoh mynsngi bad u rishot ding mynmiet.

¹⁵ Te mynta, lada me pynïap lut ïa ki briew jong me baroh, ki jaitbynriew kiba la tip ïa ka nam jong me kin ïa-ong

¹⁶ ba me pynïap ïa la ki briew ha ka ri khlaw namar ba mem lah ban ïalam ïa ki sha kata ka ri ïa kaba me la kular ban ai ha ki.

¹⁷ Kumta mynta, ko Trai, nga kyrpad ïa me, to pyn-i ha ngi ïa la ka bor bad leh kumba me la kular haba me ong,

¹⁸ ‘Nga, U Trai nga long uba suki ban bitar, bad nga pyn-i ïa ka jingieit bakhraw bad ka jingïaineh bad map ïa ka pop bad ïa ka jingïaleh pyrshah. Nalorkata, ngam pep ban pynshitom ïa ki khun bad ki ksiew haduh kaba lai bad kaba saw pateng namar ki pop jong ki kmie ki kpa jong ki.’

¹⁹ Te mynta, A Trai, kat kum ka jingkhraw ka jingieit baïaineh jong me, to map, nga kyrpad na ka bynta ka pop jong kine ki briew kumba me la map ïa ki naduh ba ki la mih na Ijipt.”

²⁰ U Trai u jubab, “Ngan map ïa ki kumba me la kyrpad.

²¹ Hynrei nga kular skhem ba kumba nga long uba im bad kumba ka jingdon jong nga ka dap ïa ka pyrthei baroh,

²² yn ym don uwei ruh na kine ki briew ki ban im ban ïohrung sha kata ka ri. Ki la ïohi ïa ka jingshai batyngshaiñ na ka jingdon ryngkat jong nga, bad ïa ki kambah ba nga la leh ha Ijipt bad ha ka ri khlaw, hynrei ki la tynjuh ïa ka jingïaishah jong nga la bunsien bad ki la kyntait ban kohnguh ïa nga.

²³ Kin ym ïohrung da lei lei ruh sha kata ka ri kaba nga la kular ha ki kpa tymmen jong ki. Yn ym don uwei ruh na kito kiba la kyntait ïa nga u ban ïohrung sha ka.

²⁴ Hynrei u Kaleb u shakri jong nga u don ka jinglong bapher bad u la ïaineh ha nga, ngan wallam ïa u sha kata ka ri kaba u la swar, bad ki khun ki ksiew jong u kin ïohkynti ïa kata ka ri

²⁵ ha kaba ki Amalek bad ki Kanaan ki shong mynta ha ki them jong ka. Phai noh lashai ka sngi bad leit sha kata ka ri khlaw ha ki phang jong ka khmut duriaw Akaba.”

U Trai u pynshitom ïa ki paidbah namar ba ki khñium

²⁶ U Trai u ong ha u Moses bad u Aaron,

²⁷ “Slem sa katno ba kine ki riewbymman kin khñium pyrshah ïa nga? Nga la ïohsngew shibun ïa kine ki jingkhñium!

²⁸ Mynta, ai ha ki ïa kane ka jubab: ‘Nga smai ba kumba nga long uba im, ngan leh kumba phi la pan. Nga U Trai, nga la kren.

²⁹ Phin ïap bad ïa ki metïap jong phi yn pynphriang ha kylleng kane ka ri khlaw. Namar ba phi la khñium pyrshah ïa nga, yn ym don uwei ruh na phi uba la palat arphew snem ka rta u ban ïohrung sha kata ka ri.

³⁰ Nga la kular ba ngan shah ïa phi ban shong hangta, hynrei yn ym don uwei ruh na phi u ban ïoh ïa kata, lait tang u Kaleb bad u Joshua.

³¹ Phi ong ba ki khun ki kti jong phi kin shah kem, hynrei ngan wallam ïa ki sha kata ka ri ïa kaba phi, phi la kyntait, bad kan long ka jaka shong jaka sah jong ki.

³² Phi, phin ïap ha kane ka ri khlaw.

³³ Ki khun ki kti jong phi kin ïaid sakma ha kane ka ri khlaw sawphew snem, kin shitom namar kata ka jingbymïaineh jong phi, tad haduh ba uba khatduh eh napdeng jong phi un ïap.

³⁴ Phin shah jynjar sawphew snem namar ka pop jong phi, kawei kawei ka snem na ka bynta kawei pa kawei ka sngi na kita ki sawphew sngi ba phi la pynlut ha kaba swar ïa ka ri. Te phin sa sngewthuh ka long kumno haba nga ïeng pyrshah ïa phi!

³⁵ Nga smai ba ngan leh ïa kane ha phi u paidlang bymman uba la ïalumlang ban ïaleh pyrshah ïa nga. Hangne ha ka ri khlaw uwei pa uwei na phi un ïap. Nga, U Trai, nga la kren.’ ”

³⁶ Ki rangbah kiba u Moses u la phah swar ïa ka ri, ki la wanrah ïa ka kaiphod balamler kaba la pynlong ïa u paidbah ban khñium pyrshah ïa U Trai.

³⁷ Kumta U Trai u la shoh ïa ki da ka jingpang, bad ki la ïap.

³⁸ Na ki khat-ar ngut ki nongsyntiat, tang u Joshua bad u Kaleb ki la lait im.

Ka jingpyrshang kaba nyngkong ban hiarthma ïa ka ri

³⁹ Haba u Moses u la ïathuh ha ki Israel ïa kaba U Trai u la kren, ki ïamkthang.

⁴⁰ Dang step phyrngab ha ka step kaba bud, ki la ïamih ban leit hiarthma ïa ka ri lum, ki da ong, “Mynta te ngi la kloi ban leit sha kata ka jaka ïa kaba U Trai u la ïathuh ha ngi. Ngi phla ba ngi la leh pop.”

⁴¹ Hynrei u Moses u ong, “Te balei phi dang ïaleh pyrshah ïa U Trai mynta? Phin ym jop!

⁴² Wat leit. U Trai um don lem bad phi, bad ki nongshun jong phi kin jop ïa phi.

⁴³ Haba phi ïakhun ïa ki Amalek bad ki Kanaan, phin ïap ha ka thma; U Trai un ym don lem bad phi, namar phi la kyntait ban bud ïa u.”

⁴⁴ Hynrei ki dang nud hi ban leit kiew sha kata ka ri lum, wat la ka Synduk ka Jutang U Trai lymne u Moses kim shim mih na ka jaka shong dara.

⁴⁵ Te ki Amalek bad ki Kanaan kiba shong hangta ki wan tur ïaleh bad ki la jop ïa ki, bad ki beh krad ïa ki haduh Hormah.