JINGKHEIÑ 13 - Khasi CL Bible (BSI)

Ki nongsyntiat

¹ U Trai u ong ha u Moses,

² “Jied uwei uwei u nongïalam na kawei kawei ka jait jong ki khat-ar jait bad phah ïa ki kum ki nongsyntiat ban swar ïa ka ri Kanaan, kaba ngan ai ha ki Israel.”

^3-15 U Moses u la kohnguh bad u phah ïa ki na ka ri khlaw jong ka Paran kumne harum: Na ka jait Reuben la jied ïa u Shammua u khun jong u Sakkur. Na ka jait Simeon la jied ïa u Shaphat u khun jong u Hori. Na ka jait Judah la jied ïa u Kaleb u khun jong u Jephunneh. Na ka jait Issakhar la jied ïa u Igal u khun jong u Joseph. Na ka jait Ephraim la jied ïa u Hoshea u khun jong u Nun. Na ka jait Benjamin la jied ïa u Palti u khun jong u Raphu. Na ka jait Sebulun la jied ïa u Gaddiel u khun jong u Sodi. Na ka jait Manasseh la jied ïa u Gaddi u khun jong u Susi. Na ka jait Dan la jied ïa u Ammiel u khun jong u Gemalli. Na ka jait Asher la jied ïa u Sethur u khun jong u Mikhael. Na ka jait Naphtali la jied ïa u Nahbi u khun jong u Bophsi. Na ka jait Gad la jied ïa u Geuel u khun jong u Makhi.

¹⁶ Kine ki dei ki nongsyntiat kiba u Moses u la phah ban leit swar ïa ka ri. U pynkylla ïa ka kyrteng u Hoshea u khun jong u Nun, sha u Joshua.

¹⁷ Haba u Moses u la phah ïa ki, u ong ruh ha ki, “Leit shaphang shatei nangne sha ka bynta kaba shaphang shathie jong ka ri Kanaan bad leit kiew pat nangta shaduh ri lum.

¹⁸ Leit khmih kata ka ri ka long kaba kumno, ki briew kiba shong hangta ki bun katno bad khlaiñ haduh katno.

¹⁹ Khmih la kata ka jaka ka long kaba bha ne kaba sniew, bad la ki briew ki shong ha ki shnong ki thaw ne hapoh ki kut kiba skhem.

²⁰ Khmih la ka khyndew ka long ne em kaba seisoh, bad la ka jaka ka don khlaw don btap ne em. Da kynmaw ban wanrah khyndiat u soh uba long hangta.” (Ka dei ka aïom ha kaba u sohwaiñ u la sdang ih.)

²¹ Kumta kita ki rangbah ki leit shaphang shatei bad ki la swar ïa kata ka ri naduh ri khlaw Sin kaba shaphang shathie haduh Rehob, hajan ka lynti khim Hamath ha ka phang bashatei.

²² Nyngkong ki la leit sha ka bynta kaba shathie jong kata ka ri bad ki poi haduh Hebron, ha kaba shong ba sah ki kur ki jait u Ahiman, u Sheshai, bad u Talmai, kiba hiarpateng na kawei ka jait ki ramhah ïa kaba la khot Anakim. (Ïa ka Hebron la tei hynñiew snem shuwa ïa ka Soan ha Ijipt.)

²³ Nangta ki wan poi sha ka Them Eshkol, bad hangta ki pom kawei ka tnat ha kaba don shirynjup ki sohwaiñ, kaba khia haduh katta katta ba ar ngut ki rangbah ki tawah ïa ka ban bah ha u dieng. Ki wanrah ruh khyndiat u soh Pomkranet bad u soh Dumbur.

²⁴ (Ïa kata ka jaka la khot ka Them Eshkol namar ba ki Israel ki pom nangta ïa ka rynjup sohwaiñ.)

²⁵ Hadien ba ki la swar ïa kata ka jaka sawphew sngi, ki nongsyntiat ki la wan phai

²⁶ sha u Moses, u Aaron, bad u paid Israel baroh ha Kadesh kaba ha ri khlaw jong ka Paran. Ki la ïathuh ïa kaei kaba ki la ïohi bad ki pyn-i ha ki ïa uta u soh uba ki la wanrah.

²⁷ Ki la ong ha u Moses, “Ngi la swar ïa ka ri bad ngi shem ba ka long kaba tuid da ka dud bad ka ngap; hangne khyndiat u soh jong ka.

²⁸ Hynrei ki briew kiba shong hangta ki long kiba khlaiñ bad ki shnong jong ki, ki long kiba heh bad kiba la ker da ki kut kiba skhem bha. Kaba kham sngewshyrkhei, ngi la ïohi hangta ïa ki khun ki ksiew jong ki ramhah.

²⁹ Ki Amalek ki shong shaphang shathie jong ka ri; ki Hit, ki Jebus, bad ki Amor ki shong ha ri lum; bad ki Kanaan ki shong ha ki rud ka duriaw Mediterranian bad ha ki rud ka wah Jordan.”

³⁰ U Kaleb u la pynsngap jar ïa ki paidbah kiba khñium pyrshah ïa u Moses, bad u ong, “Ngi dei ban tur ïaleh noh mynta bad kam kynti ïa kata ka ri; ngi biang ka bor ban jop ïa ka.”

³¹ Hynrei ki rangbah kiba la leit ryngkat bad u Kaleb ki ong, “Em, ngim khlaiñ haduh katta katta ban tur ïaleh ïa ki, ki briew hangta ki kham khlaiñ ban ïa ngi.”

³² Kumta ki pynphriang ha ki Israel ïa ka khubor lamler shaphang kata ka ri kaba ki la swar. Ki ong, “Kata ka ri kam shym pynmih jingbam kaba biang ban bsa ïa ki briew kiba shong hangta. Baroh ki briew kiba ngi ïohi hangta ki long kiba jrong,

³³ bad ngi la ïohi ruh hangta ïa ki ramhah kiba hiarpateng na u Anak. Ngi la sngew ïa lade tang kum ki puit, bad kumta hi ngi la paw ha ki.”