JINGKHEIÑ 12 - Khasi CL Bible (BSI)

La pynshitom ïa ka Miriam

¹ U Moses u la shongkurim ïa ka kynthei nong Kush bad ka Miriam bad u Aaron ki wad dong ïa u na ka bynta kata.

² Ki ong, “Hato U Trai u la kren tang lyngba u Moses? Hato um shym la kren lyngba jong ngi ruh?” U Trai u la ïohsngew aïu ki ong.

³ (U Moses u long u briew uba sngewrit; uba kham sngewrit ban ïa uno uno u briew ha ka pyrthei.)

⁴ Kynsan kynsan U Trai u ong ha u Moses, u Aaron, bad ka Miriam, “Nga kwah ïa phi baroh lai ngut ban wan sha ka Ïingjaiñ ka Jingdon Ryngkat jong nga.”

⁵ Ki la leit, bad U Trai u wan hiar ha u rishot lyoh, u la ïeng ha ka jingkhang jong ka Ïingjaiñ bad u pyrta “Aaron! Miriam!” Baroh ar ngut ki wan sha khmat,

⁶ bad U Trai u ong, “Mynta sngap aïu ngan ong! Haba don ki nongïathuhlypa hapdeng jong phi, nga pynpaw ïa lade ha ki ha ka jingïohipaw bad nga kren ha ki ha ki jingphohsniew.

⁷ Ka pher haba nga ïakren bad u shakri jong nga, u Moses. Nga la buh ïa u ban peit ïa baroh ki briew jong nga, ki Israel.

⁸ Kumta nga ïakren bad u markhmat, da kaba shai, bad ym ha ki jingkyntip; u la ïohi wat ïa ka dur jong nga. Kumno keiñ phi nud ban kren pyrshah ïa u Moses u shakri jong nga?”

⁹ U Trai u la bitar ïa ki; bad kumta katba u dang leit noh,

¹⁰ bad u lyoh u kynriah noh na ka Ïingjaiñ, hangta hi ka sniehdoh jong ka Miriam ka la tap da ka jingpang 'ñiangthohlieh bad ka la kylla lieh kum ka ïor. Haba u Aaron u peit ïa ka bad u ïohi ba ka la ngat ïa kata ka jingpang,

¹¹ u la ong ha u Moses, “Sngewbha, ko kynrad, wat pynlong ïa ngi ban shah pynshitom namar ka jingleh pop ha ka jingbieit.

¹² Wat ai ba kan long kum u khunlung ba la kha ïap, uba la shah bam noh shiteng ka met jong u.”

¹³ Kumta u Moses u la kyang ha U Trai, “A Blei, to pynkhiah ïa ka!”

¹⁴ U Trai u la jubab, “Lada u kpa jong ka u bynthiew halor ka khmat jong ka, ka dei ban shah ïa ka jingjahburom hynñiew sngi. Kumta ieh kan shah khang shabar ka jaka sher dara shi taïew, bad hadien kata lah ban pynrung pat ïa ka.”

¹⁵ Kumta ka Miriam ka shah khang shabar ka jaka sher dara hynñiew sngi, bad kita ki briew kim shym la mihnoh tad ynda la wan ïalam pat ïa ka shapoh.

¹⁶ Nangta ki mihnoh na Haseroth bad ki pynïeng dara ha ka ri khlaw jong ka Paran.