JINGKHEIÑ 11 - Khasi CL Bible (BSI)

Ka jaka ba la khot ka Taberah

¹ Ki paidbah ki la sdang ban ujor ha U Trai shaphang ki jingjynjar jong ki. Haba U Trai u la ïohsngew ïa ki, u la bitar lep bad u phah da ka ding ha kita ki paidbah. Kata ka ding ka klang hapdeng jong ki bad ka la pynjot ïa kawei ka dong jong ka jaka shong dara.

² Kita ki paidbah ki la kyang ha u Moses ban ïarap; u la duwai ha U Trai, bad ka ding ka la lip noh.

³ Kumta ïa kata ka jaka la khot ka Taberah, namar dei hangta ba ka ding U Trai ka la klang hapdeng jong ki.

U Moses u jied hynñiewphew ngut ki nongïalam

⁴ Don ki nongwei kiba ïaleit lang bad ki Israel. Kine ki don ka jingkwah palat ban bam doh, bad wat ki Israel hi ki la sdang ban ud: “A, ba ma ngi ruh ngin da ïoh khyndiat ka doh!

⁵ Ha Ijipt ngi ju ïabam ki dohkha baroh kiba ngi kwah, bad ngim siew ei ei. Kynmaw ïa ki sohkhia, ki pathaw bam-im, ki jyllang, ki piat, bad ki rynsun ba ngi ju ïoh ban bam?

⁶ Hynrei mynta te ka bor met ruh ngim don shuh. Ym don ei ei ban bam — thylli lait sa tang kane ka manna na kawei ka sngi sha kawei pat!”

⁷ (Ka manna ka long kum ki symbai kiba rit bad kaba lam byrlieh stem ha ka rong.

^8-9 Ka hap ha ka jaka shong dara mynmiet ryngkat bad ka umjer. Ha ka step kaba bud ki briew ki leit kylleng kylleng ban khar ïa ka, ki tylliat ïa ka lane dung pynni ïa ka, bad nangta ki shet bad pynlong kpu stang ïa ka. Ka jingmad ka long kum u kpu ba la shet ha ka umphniang Olib.)

¹⁰ U Moses u ïohsngew ba ki briew baroh ki ïakhñium katba ki dang ïa-ïeng lymbung kynhun kynhun ha khmat jingkhang jong ki ïingjaiñ jong ki. U la sngewkhuslai namar ba U Trai u la bitar ïa ki,

¹¹ bad u la ong ha U Trai, “Balei keiñ ba me la pynjynjar sat ïa nga katne katne? Balei ba mem sngewbha ïa nga? Balei ba me la ai ha nga ka jingkitkhlieh ïa kine ki paidbah baroh?

¹² Ngam shym thaw ïa ki lymne pynkha ïa ki! Balei ba me ong ïa nga ba ngan long nongri khun bad rah ïa ki kum ïa ki khunlung shi lynter lynti shaduh ka ri kaba me la kular ha ki kpa tymmen jong ki?

¹³ Nangno nga lah ban pynbiang doh ïa kine ki paidbah? Ki ud sa ud bad ki pan doh ban bam.

¹⁴ Da lade hi ngam lah shuh ban kitkhlieh ïa kine ki paidbah baroh; ka la khia than ïa nga!

¹⁵ Lada me leh kumne ïa nga, to sngewsynei ïa nga bad pynïap noh ïa nga, khnang ba ngan ym hap shah shuh ïa kane ka jingleh badonbor jong me.”

¹⁶ U Trai u ong ha u Moses, “Lumlang hynñiewphew ngut ki rangbah badonburom ïa kiba la ñiew kum ki nongïalam jong u paidbah, wan ïalam ïa ki sha nga ha ka Ïingjaiñ ka Jingdon Ryngkat jong nga bad ong ba kin ïeng hangta hajan jong me.

¹⁷ Ngan wan hiar bad ïakren bad me hangta, bad ngan shim khyndiat ka bor mynsiem ïa kaba nga la ai ha me bad ngan ai ïa ka ha ki. Te kin sa lah ban ïakit lem ïa ka jingkitkhlieh na ka bynta kine ki paidbah, bad men ym donkam shuh ban kit tang marwei hi.

¹⁸ Mynta ong ïa ki paidbah, ‘Pynkhuid ïa lade na ka bynta lashai; bad phin sa ïoh ka doh ban bam. U Trai u la ïohsngew ba phi ïakren khñium bad ong ba phi mutdur ba phi don khyndiat ka doh, bad ba phi kham ïoh bam bha ha Ijipt. Te mynta U Trai un ai ka doh ba phin bam, bad phi dei ban bam ïa ka.

¹⁹ Phi dei ban bam ïa ka ym tang shi sngi ne ar sngi, ne san sngi, ne shiphew sngi, ne wat arphew sngi ruh,

²⁰ hynrei baroh shi bnai, haduh ba kan da mihnoh shabar na ki shkor jong phi, haduh ba phin da sngewjli ïa ka. Kane kan jia namar ba phi la kyntait ïa U Trai uba don hangne hapdeng jong phi bad ba phi la ïakhñium ha u ba phim dei ban iehnoh ïa ka Ijipt.’”

²¹ U Moses u ong ha U Trai, “Hangne nga ïalam ïa ki hynriew lakh ngut ki briew, bad me, me ong ban men ai doh ïa ki ka ban biang haduh shi bnai?

²² Hato don blang don masi katta katta ban pynïap kat haduh ban da pynbiang ïa ki? Hato ki dohkha baroh ha ka duriaw kin dap na ka bynta jong ki?”

²³ “Hato don u pud ïa ka bor jong nga?” U Trai u jubab. “Men sa ïohi shen la kata kaba nga la ong kan urlong ne em!”

²⁴ Kumta u Moses u la mihnoh bad ïathuh ha uta u paidbah ïa kaba U Trai u la ong. U la lumlang hynñiewphew ngut ki nongïalam bad u la buh ïa ki sawdong ka Ïingjaiñ.

²⁵ Nangta U Trai u wan hiar ha u lyoh bad u la kren ïa u. U la shim khyndiat ka bor mynsiem kaba u la ai ha u Moses bad u ai ïa ka ha kita ki hynñiewphew ngut ki nongïalam. Haba kata ka bor mynsiem ka la wan shong ha ki, ki sdang ban pyrta jam kum ki nongïathuhlypa, hynrei tang shipor.

²⁶ Ar ngut na kita ki hynñiewphew ngut ki nongïalam, u Eldad bad u Medad, ki sah ha ka jaka shong dara bad kim shym la leit sha ka Ïingjaiñ. Hangta ha ka jaka shong dara, kata ka bor mynsiem ka wan ha ki, bad ki ruh ki sdang ban pyrta jam kum ki nongïathuhlypa.

²⁷ Uwei u samla u la mareh ban leit ïathuh ha u Moses shaphang kaei ba u Eldad bad u Medad ki leh.

²⁸ Te u Joshua u khun jong u Nun, uba long u nongïarap jong u naduh ba u dang samla, u ong, “Ko Kynrad, pynsangeh ïa ki!”

²⁹ U Moses u jubab, “Hato me pyrkhat lem shaphang kiei kiei kiba ïadei bad nga? A ban da U Trai u ai ïa la ka bor mynsiem ha ki briew jong u baroh bad u pynlong ïa ki ban pyrta jam kum ki nongïathuhlypa!”

³⁰ Nangta u Moses bad kita ki hynñiewphew ngut ki nongïalam jong ki Israel ki leit phai sha ka jaka shong dara.

U Trai u phah ïa ki 'iar khiar

³¹ Kyndit kyndit U Trai u phah ïa ka lyer kaba wan kit ïa ki 'iar khiar na duriaw, kiba her kumba shi mitar na sla khyndew. Kine ki dem ha ka jaka sher dara bad baroh sawdong jong ka da bun bun kilomitar kat shaba phai.

³² Kumta kita ki briew ki ïakem 'iar khiar baroh shi sngi ha kata ka sngi, baroh shi miet, bad baroh shi sngi ha kawei pat ka sngi; ym don uwei ruh uba lum duna ïa ka shihajar kilo. Nangta ki thad ïa ki sawdong kata ka jaka shong dara.

³³ Katba kata ka doh ka dang bun ba kin bam, U Trai u bitar lep ïa kita ki briew bad u pynngat ka jingïapthem kaba jur hapdeng jong ki.

³⁴ Ïa kata ka jaka la khot ka Kibroth Hattaabah (kaba mut “ki Jingtep ka jingkwah rhah”), namar hangta ki la tep ïa ki briew kiba la kwah rhah ban bam doh.

³⁵ Na kata ka jaka ki paidbah ki la kynriah noh sha Haseroth, ha kaba ki la sher dara.