JINGKHEIÑ 10 - Khasi CL Bible (BSI)

Ki turoi rupa

¹ U Trai u ong ha u Moses,

² “Shna ar tylli ki turoi da ka rupa ba la shoh tyrnem ban pyndonkam ha kaba khot lang ïa u paidbah, bad ha kaba kynriah jaka shong dara.

³ Haba la put jlan ïa ki turoi baroh ar tylli, u paidlang baroh u dei ban ïalumlang sawdong jong me ha ka jaka rung sha ka Ïingjaiñ ka Jingdon Ryngkat jong nga.

⁴ Hynrei haba la put tang kawei ka turoi, te tang ki rangbah kur ki dei ban wan ïalumlang sawdong jong me.

⁵ Haba put tang shiphang, kito ki jait kiba shong dara shaphang mihngi kin mih.

⁶ Haba la put shiphang ha ka sien kaba ar, kito ki jait kiba shong dara shaphang shathie kin mih. Kumta ïa ki jingput kiba tang shiphang la pynsawa na ka bynta ban mihnoh,

⁷ hynrei haba khot lang ïa u paidbah, dei ban pynjlan ïa ka jingsawa.

⁸ Ki khun shynrang u Aaron, ki lyngdoh, ki dei ban put ïa ki turoi. “Ïa kane ka aiñ harum dei ban batskhem ha ki por ban wan baroh.

⁹ Haba phi don ha ka thma ha la ka ri, haba phi ïada ïa lade pyrshah ïa u nongshun uba tur ïaleh ïa phi, ai dak ban ïaleh thma da kine ki turoi. Ma nga U Trai U Blei jong phi, ngan ïarap bad pyllait im ïa phi na ki nongshun jong phi.

¹⁰ Kumjuh ruh ha ki por lehkmen — ha ki Jingkhawai Niam Bnai Thymmai bad ha kiwei pat ki Jingkhawai Niam jong phi — phi dei ban put ïa ki turoi haba phi wanrah ïa ki jingainguh thang bad ki jingainguh ïasyllok jong phi. Te ngan ïarap ïa phi. Nga long U Trai U Blei jong phi.”

Ki Israel ki mihnoh

¹¹ Ha ka sngi kaba arphew jong u bnai uba ar ha ka snem kaba ar hadien ba ki paidbah ki la mihnoh na Ijipt, u lyoh uba halor ka Ïingjaiñ ka Jingdon Ryngkat U Trai u la kiew shajrong,

¹² bad ki Israel ki la sdang ïa la ka jingleit na ka ri shyiap Sinai. Uta u lyoh u wan neh ha ka ri khlaw jong ka Paran.

¹³ Ki sdang ban ïaid da ka hukum U Trai lyngba u Moses,

¹⁴ bad man ka por ba ki mih, ki ïaid ryntih. Kito kiba hap hapoh ka lama jong ka dara ba ïalam u Judah ki mih nyngkong eh, la ka kynhun kynhun ha ka jingïalam u Nahshon u khun jong u Amminadab.

¹⁵ U Nethanel u khun jong u Suar u ïalam ïa ka jait Issakhar,

¹⁶ bad u Eliab u khun jong u Helon u ïalam ïa ka jait Sebulun.

¹⁷ Nangta, haba la lied ïa ka Ïingjaiñ, ki jait Gershon bad Merari, kiba bah ïa ka, ki sdang mihnoh.

¹⁸ Nangta pat, kito kiba hapoh ka lama jong ka dara ba ïalam u Reuben, kin mihnoh, kynhun kynhun ha ka jingïalam u Elisur u khun jong u Shedeur.

¹⁹ U Shelumiel u khun jong u Surishaddai u ïalam ïa ka jait Simeon,

²⁰ bad u Eliasaph u khun jong u Deuel u ïalam ïa ka jait Gad.

²¹ Nangta, ki Lebi kiba na ka jait Kohath kin mihnoh, ki da rah ïa ki tiar ki tar kiba kyntang. Katba kin da poi ha kawei pat ka jaka shong dara, la dep pynïeng biang ïa ka Ïingjaiñ.

²² Nangta, kito kiba hapoh ka lama jong ka dara ba ïalam u Ephraim kin mihnoh, kynhun kynhun ha ka jingïalam u Elishama u khun jong u Ammihud.

²³ U Gamaliel u khun jong u Pedahsur u ïalam ïa ka jait Manasseh,

²⁴ bad u Abidan u khun jong u Gideoni u ïalam ïa ka jait Benjamin.

²⁵ Khatduh eh, kito kiba hap hapoh ka lama jong ka dara ba ïalam u Dan, kiba shakri kum ka kynhun ïada na shadien ïa ki kynhun baroh, kin mihnoh, kynhun kynhun ha ka jingïalam u Ahieser u khun jong u Ammishaddai.

²⁶ U Pagiel u khun jong u Okhran u ïalam ïa ka jait Asher,

²⁷ bad u Ahira u khun jong u Enan u ïalam ïa ka jait Naphtali.

²⁸ Kane keiñ, ka dei ka jingpynbeit ryntih ïa ka jingïaid kynhun kynhun, ha man ba ki Israel ki lied noh ïa ki dara bad ki mihnoh.

²⁹ U Moses u ong ha u kynum jong u, u Hobab u khun jong u Jethro, u nong Midian, “Ngi te ngi la khreh ban mihnoh sha kata ka jaka ïa kaba U Trai u la ong ban ai ha ngi. U la kular ban pynmanbha ïa ki Israel, te kumta ale wan bad ngi, bad ngin ïabynta lem ïa ka jingmanbha jong ngi lem bad phi.”

³⁰ U Hobab u jubab, “Em, ngan leit phai noh sha la ka ri.”

³¹ U Moses u ong ha u, “Sngewbha wat ym iehnoh ïa ngi. Phi, phi tip ha-ei ngin sher dara ha ka ri khlaw, bad phi lah ban long u nonglam lynti ïa ngi.

³² Lada phi wan ryngkat bad ngi, ngin ïabynta lem bad phi ïa baroh ki jingkyrkhu ba U Trai u ai ha ngi.”

U paidbah u mihnoh

³³ Haba u paidbah u la mihnoh na Sinai, u lum uba khuid, ki la ïa-ïaid lai sngi lynti. Ka Synduk ka Jutang U Trai borabor ka leit ha shuwa jong ki ban wad ïa ka jaka ba kin shong dara.

³⁴ Ha man ba ki mihnoh na kawei pa kawei ka jaka shong dara, u lyoh jong U Trai u don halor jong ki mynsngi.

³⁵ Ha man ka por ba ka Synduk ka Jutang ka mihnoh, u Moses un ong, “To ïeng, Trai; pynsakma ïa ki nongshun jong me bad pynher krad ïa kito kiba isih ïa me!”

³⁶ Bad ha man ka por ba ka sangeh, un ong, “Wan phai, Trai, sha ki hajar ki longïing Israel.”