JINGKHEIÑ 1 - Khasi CL Bible (BSI)

Ka jingkheiñbriew kaba nyngkong jong ki Israel

¹ Ha ka sngi kaba nyngkong jong u bnai uba ar, ha ka snem kaba ar hadien ba ki Israel ki la mihnoh na Ijipt, U Trai u kren ha u Moses hangta ha ka Ïingjaiñ ka Jingdon Ryngkat jong U ha ka ri shyiap Sinai.

² U ong, “Ma me bad u Aaron phin shim ka jingkheiñbriew ïa ki paid Israel da ki kur ki kur bad ki longïing longsem. Thoh ïa ki kyrteng jong ki rangbah baroh

³ kiba arphew snem lane kiba kham heh rta kiba bit na ka bynta ka kam shipai.

⁴ Khot uwei u rangbah kur na kawei pa kawei ka jait, ban ïarap ïa phi.”

^5-16 Kine ki long ki rangbah, ki nongïalam hapoh ki jait jong ki, kiba la jied na ka kynhun na ka bynta kane ka kam: Ka jait Reuben — U Elishur u khun jong u Shedeur u long u rangbah kur. Ka jait Simeon — U Shelumiel u khun jong u Surishaddai u long u rangbah kur. Ka jait Judah — U Nahshon u khun jong u Amminadab u long u rangbah kur. Ka jait Issakhar — U Nethanel u khun jong u Suar u long u rangbah kur. Ka jait Sebulun — U Eliab u khun jong u Helon u long u rangbah kur. Ka jait Ephraim — U Elishama u khun jong u Ammihud u long u rangbah kur. Ka jait Manasseh — U Gamaliel u khun jong u Pedahsur u long u rangbah kur. Ka jait Benjamin — U Abidan u khun jong u Gideoni u long u rangbah kur. Ka jait Dan — U Ahieser u khun jong u Ammishaddai u long u rangbah kur. Ka jait Asher — U Pagiel u khun jong u Okhran u long u rangbah kur. Ka jait Gad — U Eliasaph u khun jong u Deuel u long u rangbah kur. Ka jait Naphtali — U Ahira u khun jong u Enan u long u rangbah kur.

¹⁷ Da ka jingïarap jong kine ki khat-ar ngut ki rangbah, U Moses bad u Aaron

¹⁸ ki la khot lang ïa ka kynhun baroh kawei ha ka sngi kaba nyngkong jong u bnai uba ar bad ki shim kyrteng ïa ki briew baroh da ki kur ki kur bad da ki longïing longsem. Ki kyrteng jong ki rangbah baroh kiba arphew snem lane kiba kham rangbah la buh jingthoh bad la ñiew ruh ïa ki,

¹⁹ kumba U Trai u la hukum. Ha ka ri shyiap Sinai, U Moses u la shim kyrteng ïa u paidbah.

^20-46 Ki rangbah kiba arphew snem bad kiba kham rangbah kiba bit na ka bynta ka kam shipai, la shim kyrteng kat kum ka kur bad ka longïing longsem, da kaba sdang na ka jait Reuben, u khun nyngkong jong u Jakob. Ki jingkheiñ baroh ki long kumne harum: Ka jait Reuben — Sawphew hynriew hajar sanspah ngut. Ka jait Simeon — Sanphew khyndai hajar laispah ngut. Ka jait Gad — Sawphew san hajar hynriewspah sanphew ngut. Ka jait Judah — Hynñiewphew saw hajar hynriewspah ngut. Ka jait Issakhar — Sanphew saw hajar sawspah ngut. Ka jait Sebulun — Sanphew hynñiew hajar sawspah ngut. Ka jait Ephraim — Sawphew hajar sanspah ngut. Ka jait Manasseh — Laiphew ar hajar arspah ngut. Ka jait Benjamin — Laiphew san hajar sawspah ngut. Ka jait Dan — Hynriewphew ar hajar hynñiewspah ngut. Ka jait Asher — Sawphew wei hajar sanspah ngut. Ka jait Naphtali — Sanphew lai hajar sawspah ngut. Baroh lang ki long hynriew lakh lai hajar sanspah sanphew ngut.

⁴⁷ Ïa ki Lebi ym shym la shim kyrteng bad kita kiwei pat ki jait,

⁴⁸ namar U Trai u la ong ha u Moses,

⁴⁹ “Haba me shim ka jingkheiñbriew jong ki rangbah kiba bit na ka bynta ka kam shipai, wat ym kynthup ïa ka jait u Lebi.

⁵⁰ Hynrei, buh ïa ki Lebi ba kin peit bad sumar ïa ka Ïingjaiñ ka Jingdon Ryngkat jong nga bad ïa ki jingbuh jingsat jong ka baroh. Ki kin rah ïa ka, bad ïa ki tiar ki tar jong ka, kin shakri ha ka, bad kin pynïeng ïa la ki dara sawdong jong ka.

⁵¹ Man ba phi pynkynriah ïa ka jaka shong dara, ki Lebi kin lied ïa ka Ïingjaiñ ka Jingdon Ryngkat jong nga bad kin pynïeng biang ïa ka ha ka jaka shong dara bathymmai. Uno uno uwei pat uba wan sha jan ka Ïingjaiñ un shah pynïap.

⁵² Kiwei kiwei pat ki Israel kin sher dara ha la ka kynhun kynhun, uwei pa uwei bad la ka jong ka kynhun bad hapoh la ka jong ka lama.

⁵³ Hynrei ki Lebi kin pynïeng dara sawdong ka Ïingjaiñ ban ap sumar ïa ka, khnang ba yn ym don mano mano ban wan sha jan bad pynkhie ïa ka jingbitar jong nga ban shoh ïa ka kynhun ki Israel.”

⁵⁴ Kumta ki paid Israel ki la leh ïa kata baroh kaba U Trai u la hukum ïa u Moses.