JEREMAÏAH 9 - Khasi CL Bible (BSI)

¹ Nga kyrmen ba ka khlieh jong nga ka long ka pukri um, bad ba ki khmat jong nga ka umpohliew ki ummat, khnang ba nga lah ban ïam mynsngi bad mynmiet na ka bynta ki briew jong nga kiba la shah pynïap.

² Nga thrang ban don ka jaka ban sah ha ka ri shyiap ha kaba nga lah ban lait na ki briew jong nga. Ma ki baroh ki long ki bymïaineh, ki paidbhur ki nongshetkylla.

³ Ki long borabor kiba kloi ban ïathuh lamler; ka jingbymhok ha ka jaka jong ka jingshisha, ka synshar ïa ka ri. U Trai u ong, “Ki briew jong nga ki leh ïa kawei kaba sniew hadien kawei pat bad kim shym pdiang ïa nga kum U Blei jong ki.”

⁴ Uwei uwei baroh u dei ban da sumar bha pyrshah ïa u paralok jong u, bad ym don uno uno uba lah ban shaniah ïa u hynmen u para shynrang jong u; namar uwei pa uwei uba shi para u long uba dap da ka jingshukor kum u Jakob, bad uwei uwei u krenbeiñ ïa ki paralok jong u.

^5-6 Ma ki baroh ki ïalam bakla ïa la ki paralok, bad ym don uwei ruh uba ïathuh ïa ka jingshisha; ki la hikai ïa la ki thylliej ban lamler bad kin ym iehnoh ïa ka jingleh pop jong ki. Ki leh ïa kawei ka jingleh jubor hadien kawei pat, bad kawei ka jingleh shukor ka bud ïa kawei pat. U Trai u ong ba ki briew jong u ki kyntait ïa u.

⁷ Namar kane U Trai Badonbor Baroh u ong, “Ngan phrang ïa ki briew jong nga kum ïa ka nar bad buh ïa ki ha ka jingtynjuh. Ki briew jong nga ki la leh ïa kaba sniew — sa kaei pat kaba nga lah ban leh bad ki?

⁸ Ki thylliej jong ki, ki long ki khnam kiba shyrkhei; ki ïathuh lamler borabor. Uwei uwei u kren ki kyntien sngewieit ïa u paramarjan jong u, hynrei ha ka jingshisha u pynap ka jingriam ïa u.

⁹ Hato ngan ym pynshitom ïa ki na ka bynta kine kiei kiei? Hato ngan ym pynhiarkput halor ka jaitbynriew kaba kum kane? Ma nga, U Trai, nga la kren.”

¹⁰ Nga la ong, “Ngan ïam sngewsih na ka bynta ki lumbah bad jaw ummat na ka bynta ki jaka pynbamphlang, namar ki la tyrkhong, bad ym don mano mano ba leit jingleit lyngba jong ki. Ïa ka jingsawa ki jingri ym shym ïohsngew shuh; ki sim bad ki mradkhlaw ki la phet bad kim don shuh.”

¹¹ U Trai u ong, “Ngan pynlong ïa ka Jerusalem ka thup ki jingpra, ka jaka ha kaba ki myrsiang ki shong; ki nongbah ka Judah kin kylla ri shyiap, ka jaka ha kaba ym don mano mano bashong ba sah.”

¹² Nga la kylli, “Ko Trai, balei ka ri ka ha ka jingjot jingpra bad ka tyrkhong kum ka ri shyiap, ba ym don mano mano ba leit jingleit lyngba jong ka? Uei uba stad eh ban shemphang ïa kane? Hano me la batai ïa ka ba u lah ban ïathuh ha kiwei pat?”

¹³ U Trai u la jubab, “Kane ka la jia namar ki briew jong nga ki la iehnoh ïa ka jinghikai jong nga kaba nga la ai ha ki. Kim shym la kohnguh ïa nga lane leh ïa kaei kaba nga la bthah ïa ki.

¹⁴ Pynban, ki la long kiba mutlop bad ki la mane ïa ki bleithaw u Baal kumba ki kpa jong ki, ki la hikai ïa ki ban leh.

¹⁵ Kumta te, to shahshkor ïa kaei kaba ma nga, U Trai Badonbor Baroh, U Blei ki Israel, ngan leh: Ngan ai ki jhur kthang ha ki briew jong nga ban bam bad ka bih ban dih.

¹⁶ Ngan pynsakma ïa ki hapdeng ki jaitbynriew kiba ma ki lymne ki kpa tymmen jong ki, ki la ïohsngew, bad ngan phah ki kynhun shipai pyrshah ïa ki tad haduh ba ngan da pynjot khoit ïa ki.”

Ki briew ka Jerusalem ki kyang jam ban ïoh jingïarap

¹⁷ U Trai Badonbor Baroh u la ong, “To pyrkhat shaphang kaei kaba jia! Khot ïa ki nongïambriew ban wan, ïa ki kynthei kiba rwai ki jingrwai ïapbriew.”

¹⁸ Ki briew ki la ong, “Ïathuh ïa ki ban pynkloi bad rwai ka jingrwai ïapbriew na ka bynta jong ngi, tad haduh ba ki khmat jong ngi kin dap da ki ummat, bad ba ki irmat jong ngi ki jhieh na kaba ïam.”

¹⁹ To shahshkor ïa ka jingsawa ka jingïam ha Seïon, “La pynjot ïa ngi! La pynlehrain khoit ïa ngi! Ngi dei ban iehnoh ïa ka ri jong ngi; ïa ki ïing jong ngi la pynkhyllem.”

²⁰ Nga la ong, “To sngap ïa U Trai, phi ki kynthei, bad to pynshahshkor ïa ki ktien jong u. To hikai ïa ki khun kynthei jong phi kumno ban ïambriew, bad ïa ki paralok jong phi kumno ban rwai ka jingrwai ïapbriew.

²¹ Ka jingïap ka la wan shapoh lyngba ki jingkhangïit jong ngi bad ka la rung sha ki ïingsyiem jong ngi; ka la ot ïa ki khynnah ha ki surok bad ïa ki samla shynrang ha ki jaka ïew.

²² Ki metïap ki la saphriang ha kylleng, kum ki kynton sboh halor ki lyngkha, kum u riewhadem ba la ot bad iehnoh da ki nongot, u riewhadem u bym don mano mano ba lum. Kane ka long kaei kaba U Trai u la bthah ïa nga ban ong.”

²³ U Trai u ong, “Ki rangbah bastad kim dei ban kob sarong ïa ka jingstad jong ki, lymne ki rangbah bakhlaiñ ïa ka jingkhlaiñ jong ki, lymne ki rangbah bariewspah ïa ka spah jong ki.

²⁴ Lada uno uno u kwah ban kob sarong, u dei ban kob sarong ba u ithuh bad ba u shemphang ïa nga, namar ka jingieit jong nga ka long kaba neh, bad nga leh ïa kaba hok bad kaba dei. Kine ki long kita kiei kiei kiba pynsngewbha ïa nga. Ma nga, U Trai, nga la kren.”

^25-26 U Trai u ong, “Ka por ka wan haba ngan pynshitom ïa ki briew ka Ijipt, ka Judah, ka Edom, ka Ammon, ka Moab, bad ki briew ka ri shyiap, kiba la ot lyngkot ïa ki shñiuh jong ki. Kine ki briew baroh ki long kiba la otsher, hynrei ki bym shym la bat ïa ka jutang kaba ka thmu. Ym don mano mano na kine ki briew bad ym don mano mano na ki paid Israel kiba la bat ïa kane ka jutang jong nga.”