JEREMAÏAH 7 - Khasi CL Bible (BSI)

U Jeremaïah u ïalap hapoh ka Templ

^1-3 U Trai u la phah ïa nga sha ka khyrdop jong ka Templ ha kaba ki briew jong ka Judah ki leit rung shapoh ban mane. U la ong ïa nga ban ïeng hangta bad pynbna ïa kaei kaba U Trai Badonbor Baroh, U Blei jong ka Israel, u don ban ong ha ki: “To pynkylla ïa ka rukom kaba phi im bad ïa kiei kiei kiba phi leh, bad ngan shah ïa phi ban ïaishong hangta.

⁴ Sangeh ban ngeit ïa kito ki kyntien shukor, ‘Ngim lei lei! Kane ka dei ka Templ jong U Trai, kane ka dei ka Templ jong U Trai, kane ka dei ka Templ jong U Trai!’

⁵ “To pynkylla ïa ka rukom kaba phi im bad sangeh ban leh ïa kiei kiei kiba phi leh. To long u bym noh shiliang ha kaba phi ñiew iwei ïa iwei pat.

⁶ Sangeh ban shim kabu ïa ki nongwei, ki khunswet, bad ïa ki riewkynthei. Sangeh ban pynïap ïa ki briew balui lui hapoh kane ka ri. Sangeh ban mane ïa kiwei pat ki blei, namar kata kan pynjot ïa phi.

⁷ Lada phi kylla, ngan shah ïa phi ban ïaisah hangne hapoh ka ri kaba nga la ai ha ki kpa tymmen jong phi kum ka jingdon jingem kaba neh.

⁸ “Ha khmih, phi buh ïa la ka jingshaniah ha ki kyntien shukor.

⁹ Phi tuh, pynïap briew, klim, ïathuh lamler hapoh ka jingsmai, ai jingainguh ha u Baal, bad mane ïa ki blei kiba phim pat ju tip mynshuwa.

¹⁰ Phi leh ïa kine kiei kiei kiba nga ijli, bad nangta phi wan bad ïeng ha ka jingdon ryngkat jong nga, hapoh ka Templ jong nga, bad ong, ‘Ngim lei lei!’

¹¹ Hato phi pyrkhat ba ka Templ jong nga ka dei ka jakarieh ïa ki nonglute? Nga la ïohi ïa kaei kaba phi leh.

¹² Khie leit sha Shiloh, ka jaka kaba nyngkong ha kaba nga la jied ba yn mane, bad peit aïu nga la leh ïa ka namar ki pop jong ki briew jong nga ki Israel.

¹³ Phi la leh ïa kine ki pop baroh, bad wat la nga la kren ïa phi bad ïai kren, phi la kyntait ban shahshkor. Phin ym jubab haba nga la khot ïa phi.

¹⁴ Bad kumta, kaei kaba nga la leh ïa ka Shiloh ngan leh ruh ïa kane ka Templ jong nga, ha kaba phi shaniah. Hangne ha kane ka jaka kaba nga la ai ha ki kpa tymmen jong phi bad ha phi, ngan leh ïa kata kajuh kaba nga la leh ïa ka Shiloh.

¹⁵ Ngan beh noh ïa phi na ka jingïohi jong nga kumba nga la leh ïa ki ba-ha-ïing ha-sem jong phi, ki paid Israel. Ma nga, U Trai, nga la kren.”

Ka jingbymkohnguh jong ki briew

¹⁶ U Trai u ong, “Ko Jeremaïah, wat duwai na ka bynta kine ki briew. Wat ïam lane duwai na ka bynta jong ki; wat ïasaid bad nga, namar ngan ym shahshkor ïa me.

¹⁷ Hato mem ïohi aïu ki leh hapoh ki nongbah jong ka Judah bad ha ki lynti jong ka Jerusalem?

¹⁸ Ki khynnah ki lum diengthang, ki rangbah ki sliew ding, bad ki kynthei ki khleh kpu ban shet kpu ïa ka blei kaba ki khot ka Syiem jong ka Bneng. Ki la theh ruh ïa ki jingainguh waiñ ha kiwei pat ki blei, khnang ban pynmong ïa nga.

¹⁹ Hato nga long shisha ma nga uta uba ki pynmong? Em, ki ïa pynmong ïa lade hi bad ki wallam ka jinglehrain ha lade hi.

²⁰ Bad kumta ma nga, U Trai Nongsynshar, ngan theh ïa ka jingbitar shla jong nga halor kane ka Templ. Ngan theh ïa ka halor ki briew bad ki mrad kumjuh, bad wat halor ki dieng bad ki jingthung. Ka jingbitar jong nga kan long kum ka ding kaba ym don mano mano ba lah ban pynlip.

²¹ “Ko ki briew jong nga, katto katne ki jingkñia phi thang tylli halor ka duwan, bad katto katne la shah ïa phi ban bam. Hynrei kaei kaba ma nga, U Trai, nga ong ka long ba phi lah ruh ban bam ïa ki baroh.

²² Ngam shym la ai ha ki kpa tymmen jong phi ïa kino kino ki hukum shaphang ki jingainguh thang lane kino kino kiwei pat ki jait jingkñia, mynba nga la wallam ïa ki na Ijipt.

²³ Hynrei nga la hukum ïa ki ban kohnguh ïa nga, khnang ba ngan ïoh long U Blei jong ki bad ki kin ïoh long ki briew jong nga. Bad nga la ong ha ki ban im kumba nga la lah hukum ïa ki, khnang ba kiei kiei kin bit kin biang ïa ki.

²⁴ Hynrei kim shym kohnguh lane pynshahshkor ei ei. Pynban, ki la leh ïa kaei kaei kaba ka dohnud ba-mutlop bad basniew jong ki ka ong ïa ki ban leh, bad ki la nang kham sniew ha ka jaka ban kham bha.

²⁵ Naduh ka sngi ba ki kpa tymmen jong phi ki la mihnoh na Ijipt haduh kane hi ka sngi, nga la ïai phah ïa ki shakri jong nga, ki nongïathuhlypa, sha phi.

²⁶ Pynban ym don mano mano ba sngap lane pynshahshkor. Pynban, phi la nang kham mutlop bad ïeng ïaleh pyrshah ban ïa ki kpa tymmen jong phi.

²⁷ “Kumta, ko Jeremaïah, men kren ïa kine ki kyntien baroh ha ki briew jong nga, hynrei kin ym shahshkor ïa me; men khot ïa ki, hynrei kin ym jubab.

²⁸ Men ïathuh ïa ki ba ka jaitbynriew jong ki kam shym kohnguh ïa nga, U Trai U Blei jong ki, lane ïoh jinghikai na ki jingpynshitom jong ki. Ka jingïaineh ka la ïap. Ym shym la ïakren shuh shaphang jong ka.”

Ki kam bapop hapoh ka Them Hinnom

²⁹ “To ïambriew, ko ki briew ka Jerusalem; to ot noh ïa u shñiuh jong phi bad bret noh ïa u. To rwai ka jingrwai ïapbriew halor ki kliar lum, namar ma nga, U Trai, nga bitar, bad nga la kyntait ïa ki briew jong nga.

³⁰ “Ki briew ka Judah ki la leh ïa kaba sniew. Ki la buh ïa ki bleithaw jong ki, kiba nga ijli, hapoh ka Templ jong nga bad ki la pyntngit ïa ka.

³¹ Ha ka Them Hinnom ki la tei ka duwan ba la khot ka Topheth, khnang ba ki lah ban kñia ïa ki khun shynrang bad ki khun kynthei jong ki hapoh ka ding. Ngam shym la hukum ïa ki ban leh ïa kane — kam shym la rung wat ha ka jingpyrkhat jong nga.

³² Bad kumta, ka por kan wan ha kaba yn ym khot shuh ïa ka, ka Topheth lane ka Them Hinnom, hynrei ka Them ka Jingpynïap. Kin tep ïa ki briew hangta namar ym don hangno hangno hawei pat ban tep ïa ki.

³³ Ki metïap kin long ka jingbam ïa ki sim bad ïa ki mradkhlaw, bad yn ym don mano mano ban beh pyntieng ïa ki.

³⁴ Ka ri kan kylla ri shyiap. Ha ki nongbah ka Judah bad ha ki lynti ka Jerusalem ngan pynkut ïa ka jingsawa ka jingkmen bad ka jingsngewkmen bad ïa ki jingsawa bakmen ki jingkhawai shongkurim.