JEREMAÏAH 6 - Khasi CL Bible (BSI)

La kerkut ïa ka Jerusalem da ki nongshun

¹ Ko ki briew ka Benjamin, to phet ban lait im! Phet noh na Jerusalem! Pynsawa ïa ka turoi ha Tekoa bad to thaw ka ding-ai-dak ha Beth Hakkherem. Ka jingjot bad ka jingpynjot ki la wan artat na shatei.

² Ka nongbah Seïon ka long kaba itynnat, hynrei ïa ka yn sa pynjot;

³ ki syiem kin sher dara hangta lem bad ki kynhun shipai jong ki. Kin pynïeng ïa la ki ïingjaiñ sawdong ka nongbah, bad uwei uwei un sher dara hangno hangno ba u kwah.

⁴ Kin ïa-ong, “Pynkhreh ban tur ïaleh ïa ka Jerusalem! To khreh! Ngin tur ïaleh ha ka por shiteng sngi!” Hynrei nangta kin ïa-ong, “Ka la slem palat, ka sngi ka la jan kut artat, bad ki syrngiew janmiet ki la sdang jrong.

⁵ Ngin tur ïaleh mynmiet; ngin pynjot ïa ki kut jong ka nongbah.”

⁶ U Trai Badonbor Baroh u la hukum ïa kine ki syiem ban khet ïa ki dieng bad ban shna ki kynton khnang ban kerkut ïa ka Jerusalem. U la ong, “Ngan pynshitom ïa kane ka nongbah namar ka la dap da ka jingbanbeiñ.

⁷ Kumba ka pukri ka pynneh sngur ïa ka um jong ka, kumta ruh ka Jerusalem ka pynneh ïa ka jingsniew jong ka. Nga ïohsngew ïa ka jingleh jubor bad ka jingpynjot hapoh ka nongbah, ka jingpang bad ki jingmong ki long baroh kiba nga ïohi.

⁸ Ko ki briew ka Jerusalem, ai ba kine ki jingjynjar kin long ka jingmaham ïa phi, lymda kumta ngan iehnoh ïa phi; ngan pynkylla ïa ka nongbah jong phi sha ka ri shyiap, ka jaka ha kaba ym don mano mano bashong basah.”

Ka Israel kaba ïeng ïaleh pyrshah

⁹ U Trai Badonbor Baroh u ong ha nga, “Ïa ka Israel yn sloit pynkhuid kum ka bri sohwaiñ na kaba la kheit ïa uwei pa uwei u sohwaiñ. Kumta pha dei ban pyllait im ïano ïano katba pha lah katba dang don ka por.”

¹⁰ Nga la jubab, “Mano ban shahshkor ïa nga lada nga la kren ha ki bad maham ïa ki? Ki long kiba mutlop bad ki kyntait ban shahshkor ïa ka khubor jong me; ki rkhie ïa kaei kaba me ong ïa nga ban ong.

¹¹ Ka jingbitar jong me pyrshah ïa ki ka pluh ruh hapoh jong nga, A Trai, bad ngam lah ban kun slem shuh ïa ka.” Nangta U Trai u la ong ha nga, “To theh noh ïa ka jingbitar jong nga halor ki khynnah ha ki surok bad ha ki jingïalang jong ki samla shynrang. Ïa ki rangbah bad ki tnga jong ki yn shim noh, bad wat ïa kiba tymmen tam yn ym pynsah.

¹² Ïa ki ïing jong ki yn ai noh ha kiwei, bad kumta kan long ïa ki lyngkha jong ki bad ki tnga jong ki. Ngan sa pynshitom ïa ki briew jong kane ka ri.

¹³ Uwei pa uwei, uba khraw bad uba rit, u pyrshang ban shna pisa da ka jingbymhok; wat ki nongïathuhlypa bad ki lyngdoh ki thok ïa ki briew.

¹⁴ Ki leh kumba ki jingmong jong ki briew jong nga ki long tang ki jingtrud. ‘Baroh ka bit ka biang,’ ki ong, haba baroh kam bit kam biang.

¹⁵ Hato kin sngewlehrain namar ki la leh ïa kine kiei kiei kiba ijli? Em, kim shym la sngewlehrain satia; kim tip hi ruh kumno ban sawkyr-ang. Bad kumta kin kyllon kumba kiwei ki la kyllon; haba nga pynshitom ïa ki, kata kan long kaba kut jong ki. Ma nga, U Trai, nga la kren.”

Ka Israel ka kyntait ïa ka lynti U Blei

¹⁶ U Trai u ong ha ki briew jong u, “To ïeng ha ka jaka ba ïashem ki lad bad to khmih. Kylli shaphang ki lynti ïaid kiba mynbarim bad hangno ka don ka surok babha tam. To ïaid ha ka, bad phin im ha ka jingsuk.” Hynrei ki ong, “Em, ngin ym leh!”

¹⁷ Nangta U Trai un thung ki rangbah nongap phira ban shahshkor ïa ka jingmaham jong ka turoi. Hynrei ki ong, “Ngin ym shahshkor.”

¹⁸ Kumta U Trai u ong, “To shahshkor phi ki jaitbynriew, bad to tip kaei ka ban jia ïa ki briew jong nga.

¹⁹ To shahshkor, ko pyrthei! Kum ka jingpynshitom ïa ki jingthmu jong ki nga wallam ka jingjot halor kine ki briew, namar ki la kyntait ïa ka jinghikai jong nga bad kim shym la kohnguh ïa ki ktien jong nga.

²⁰ Nga salia aïu ïa ka jingiwbih kaba ki wallam ïa nga na Sheba, lane ki musla na ka ri bajngai? Ngan ym pdiang ïa ki jingainguh jong ki lane ban sngewbha ha ki jingkñia jong ki.

²¹ Bad kumta ngan pynlong ïa kine ki briew ban jynthut bad kyllon. Ki kpa bad ki khun kin ïap, bad kumta kin long ki paralok bad ki paramarjan.”

Ka jinghiarthma na shatei

²² U Trai u ong, “Ki briew ki wan na ka ri ha ka phang bashatei; ka jaitbynriew kaba khrawbor na sha jngai bah ka pynkhreh ïa ka thma.

²³ Ki la shim ïa la ki ryntieh bad ki waitlam; ki long kiba runar bad ki bym don jingisynei. Ki sawa kum ka duriaw bakyrhuh, katba ki shong ha ki kulai jong ki. Ki la pynkhreh ïa ka thma pyrshah ïa ka Jerusalem.”

²⁴ “Ngi la ïohsngew ïa ka khubor,” ong ki briew ka Jerusalem, “bad ki kti jong ngi ki noh kyrwep, la kem ïa ngi da ka jinglyng-a bad ka jingpang kum ka kynthei kaba suh kha.

²⁵ Ngim nud ban leit sha ki rudnong lane ïaid ha ki surok, namar ki nongshun jong ngi ki la kieng atiar bad ka jingshyrkhei ka don ha baroh sawdong jong ngi.”

²⁶ U Trai u ong ha ki briew jong u, “To kup jaiñ khain bad to tyllun ha u dpei. To ïam sngewsih lem bad ki ummat kthang kumba phin ïam ïa u khun marwei, namar uta uba wan ban pynjot ïa phi un tur ïaleh kynsan.

²⁷ Ko Jeremaïah, tynjuh ïa ki briew jong nga, kumba men tynjuh ïa ka nar, bad to ïit ki long kiba kumno.

²⁸ Ma ki baroh ki long ki nongïaleh pyrshah ba-mutlop, kiba eh kum ka rnong bad u nar. Ma ki baroh ki long kiba sniew, ki da ïaid kylleng bad pynsaphriang ïa ka lorni.

²⁹ Ka lawar ding ka klang rhem bha, hynrei ka eitnar kam um bad ka tuid noh. Ka long ka bymmyntoi ban ïai phrang ïa ki briew jong nga, namar ïa kito kiba sniew ym shym la weng noh.

³⁰ Yn khot ïa ki, ka eitnar bymdondor, namar ma nga, U Trai, nga la kyntait ïa ki.”