JEREMAÏAH 52 - Khasi CL Bible (BSI)

Ka jingkyllon ka Jerusalem

¹ U Sedekaïah u la don arphew wei snem ka rta mynba u la long u syiem ka Judah, bad u la synshar ha Jerusalem khatwei snem. Ka kyrteng jong ka kmie jong u ka dei ka Hamutal, ka khun jong u Jeremaïah uba sah ha ka nongbah Libnah.

² U syiem Sedekaïah u la leh pop pyrshah ïa U Trai, kumba u syiem Jehoïakim u la leh.

³ U Trai u la bitar haduh katta katta ïa ki briew jong ka Jerusalem bad ka Judah kat haduh ba u beh noh ïa ki na khmat jong u. U Sedekaïah u ïaleh pyrshah ïa u Nebukhadnessar, u syiem ka Babilonia,

⁴ bad kumta u Nebukhadnessar u wan lem bad ka kynhun shipai jong u baroh bad u tur ïaleh ïa ka Jerusalem ha ka sngi kaba shiphew jong u bnai uba shiphew ha ka snem kaba khyndai jong ka jingsynshar u Sedekaïah.

⁵ Ki la pynïeng dara shabar ka nongbah, tei ïa ki kynroh ban kerkut sawdong jong ka, bad kerkut ïa ka haduh ka snem kaba khatwei jong ka jingsynshar u Sedekaïah.

⁶ Ha ka sngi kaba khyndai jong u bnai uba saw jong kata kajuh ka snem, haba ka 'nemsniew ka la jur palat kat haduh ba ki briew kim don ei ei shuh ban bam, ïa ki kynroh ka nongbah la pynpei lyngba.

⁷ Wat la ki nong Babilonia ki ker sawdong ïa ka nongbah, baroh ki shipai ki lait phet ha ka por mynmiet. Ki la phet lyngba ka kper u syiem, ki leit lyngba ka khyrdop ba pynïasoh ïa ki ar tylli ki kynroh, bad ki phet na ka liang ban poi sha ka Them Jordan.

⁸ Hynrei ka kynhun shipai Babilonia ka beh kthong ïa u syiem Sedekaïah, la kem ïa u ha ki them ba don hajan Jerikho, bad baroh ki shipai jong u ki iehnoh noh ïa u.

⁹ Ïa u Sedekaïah la ïalam sha u syiem Nebukhadnessar, uba don ha ka nongbah Riblah ha ka ri ki Hamath bad hangta u Nebukhadnessar u rai pynrem ïa u.

¹⁰ Ha Riblah u pynïap ïa ki khun shynrang jong u Sedekaïah katba u Sedekaïah u nang peit bad u khrai khlieh ruh ïa ki rangbah synshar jong ka Judah.

¹¹ Hadien kata, u phah ban khlaw noh ïa ki khmat u Sedekaïah bad teh ïa u ha ki kynjri bad rah sha Babilon. U Sedekaïah u ïaisah ha byndi ha Babilon haduh ka sngi jong ka jingïap jong u.

Ka jingpynjot ïa ka Templ

¹² Ha ka sngi kaba shiphew jong u bnai uba san ha ka snem kaba khatkhyndai jong ka jingsynshar u Nebukhadnessar u syiem ka Babilonia, u Nebusaradan, u nongaibuit jong u syiem bad u rangbah jong ka kynhun shipai jong u, u rung shapoh Jerusalem.

¹³ U phah thang ïa ka Templ, ka ïingsyiem, bad ki ïing jong ki riewpawkhmat baroh ha Jerusalem;

¹⁴ bad ki shipai ki pynpra ïa ki kynroh jong ka nongbah.

¹⁵ Nangta u Nebusaradan u la rah noh sha Babilonia ïa ki briew kiba dang sah ha ka nongbah, ki nongtrei batbit kiba dang sah, bad kito kiba la phet noh sha ki nong Babilonia.

¹⁶ Hynrei u ieh ha Judah katto katne ki briew kiba duk tam, ki bym don ïing don sem, bad u buh ïa ki ban trei ha ki bri sohwaiñ bad ki lyngkha.

¹⁷ Ki nong Babilonia ki pynpait lyngkhot ïa ki rishot ba la shna da ka rnong bad ïa ki kali kit kiba don ha ka Templ, lem bad ki pipa baheh kiba da ka rnong, bad ki kit lut ïa ka rnong sha Babilon.

¹⁸ Ki rah ruh ïa ki byrsha bad ki tiar buh dpei ba ju pyndonkam ban pynkhuid ïa ka duwan, ki tiar ba ju pyndonkam ban sumar ïa ki sharak, ki pliang ba pyndonkam ban pdiang ïa ka snam na ki jingkñia, ki pliang ba pyndonkam ha kaba thang jingiwbih, bad baroh ki tiar ba la shna da ka rnong ba ju pyndonkam ha ka jingshakri ha ka Templ.

¹⁹ Ki la shim baroh kiei kiei ba la shna da ka ksiar bad ka rupa; ki pliang rit, ki jingdiang ba ju pyndonkam ban rah ïa ki rnga barhem, ki pliang ba ju buh ïa ka snam na ki jingkñia, ki tiar buh dpei, ki diengpynïeng sharak, ki pliang ba pyndonkam ïa ki jingiwbih, bad ki pliang ba pyndonkam ha kaba theh ïa ki jingainguh waiñ.

²⁰ Ki dur da ka rnong kiba u syiem Solomon u la shna na ka bynta ka Templ — ki ar tylli ki rishot, ki kali kit, ka pipa kaba heh, bad ki khat-ar tylli ki masi dab ba kyrshan ïa ka — ki khia palat ban thew ïa ki.

^21-22 Ki ar tylli ki rishot ki ïasyriem kumjuh: uwei uwei u don phra mitar ka jingjrong bad 5.3 mitar sawdong. Ki long thylli hapoh, bad ka nar ka don hynñiewphew san milimitar ka jingrben. Halor jong uwei uwei u rishot ka don ka dur da ka rnong kaba 2.2 mitar ka jingjrong, Baroh sawdong jong uwei uwei la don ka jingsop da ka rnong ba la pynitynnat da ki dur soh Pomkranet kiba la thaw da ka rnong.

²³ Ha ka jingker ïa uwei uwei u rishot la don baroh shispah tylli ki dur soh Pomkranet, bad khyndaiphew hynriew tylli na kine lah ban ïohi na khyndew.

Ïa ki briew jong ka Judah la rah sha Babilonia

²⁴ Nalor kine, u Nebusaradan, u rangbah shipai, u la rah kum ki koidi ïa u Seraïah u Rangbah Lyngdoh, U Sephanaïah u lyngdoh ba kham hapoh, bad ïa ki lai ngut ki rangbah synshar ka Templ kiba kham pawkhmat.

²⁵ Na ka nongbah u la shim ïa u rangbah pynïaidkam uba la ju ai hukum ïa ki shipai, hynñiew ngut na ki nongaibuit jong u syiem kiba dang don ha ka nongbah, u nongbud jong u rangbah shipai uba dei peit ïa ki jingbuh jingthoh kam shipai, bad hynriewphew ngut kiwei pat ki rangbah bapawkhmat.

²⁶ U Nebusaradan u la ïalam ïa ki sha u syiem ka Babilonia, uba don ha ka nongbah Riblah ha ka ri ki Hamath.

²⁷ Hangta u syiem u la phah ban tied ïa ki bad ban pynïap. Kumta ïa ki briew ka Judah la rah noh na ka ri jong ki sha ka jinglongmraw.

²⁸ Kane ka long ka jingbuh jingthoh ïa ki briew kiba u Nebukhadnessar u la rah kum ki koidi: ha ka snem kaba hynñiew jong u kum u syiem u la ïalam noh lai hajar arphew lai ngut;

²⁹ ha ka snem kaba khatphra jong u, phraspah laiphew ar ngut na Jerusalem;

³⁰ bad ha ka snem kaba arphew lai jong u, hynñiewspah sawphew san ngut — ba la rah noh da u Nebusaradan. Ha baroh, ïa ki saw hajar hynriewspah ngut ki briew la rah noh.

³¹ Ha ka snem kaba u Ebilmerodakh u la long u syiem ka Babilonia, u la pyn-i jinglehisynei ïa u Jehoïakhin u syiem ka Judah da kaba pyllait ïa u na ka byndi. Kane ka la jia ha ka sngi kaba arphew san jong u bnai uba khat-ar ha ka snem kaba laiphew hynñiew hadien ba la rah noh ïa u Jehoïakhin kum u koidi.

³² U Ebilmerodakh u la lehbha ïa u bad u la ai ïa ka burom kaba kham khraw ban ïa kaba u ai ïa kiwei pat ki syiem kiba la shah ringmraw lang bad u ha Babilonia.

³³ Kumta ïa u Jehoïakhin la shah ba un law noh ïa ki jaiñphong byndi bad ban ïabam lang ha ka miej jong u syiem shi lynter ka jingim jong u.

³⁴ Man ka sngi katba u dang im, u la ïoh ïa ka baibam na ka bynta ki jingdonkam jong u.