JEREMAÏAH 51 - Khasi CL Bible (BSI)

Ka jingbishar shuh shuh halor ka Babilonia

¹ U Trai u ong, “Nga wallam ïa ka lyer ka jingjot pyrshah ïa ka Babilonia bad ïa ki briew jong ka.

² Ngan phah ïa ki nongwei ban pynjot ïa ka Babilonia kum ka lyer kaba pynher noh ïa u phlangïap. Haba kata ka sngi jong ka jingpynjot ka wan, kin tur ïaleh na baroh sawdong bad kin ieh syllen ïa ka ri.

³ Wat ai por ïa ki shipai ban siat ïa ki khnam ne kieng ïa ki atiar ïaleh jong ki. Wat pyllait ïa ki samla shynrang! Pynjot ïa ka kynhun shipai baroh kawei!

⁴ Kin mynsaw bad kin ïap ha ki lynti bah jong ki nongbah jong ki.

⁵ Ma nga, U Trai U Blei Badonbor Baroh, ngam pat shym la iehnoh ïa ka Israel bad ka Judah, wat la ki la leh pop pyrshah ïa nga, U Bakhuid jong ki Israel.

⁶ To phet noh na Babilonia! Phet ban lait im! Wat ai ba yn shah pynïap na ka bynta ka pop jong ka Babilonia. Nga mynta nga siew kylliang bad pynshitom ïa ka kumba ka dei hok.

⁷ Ka Babilonia ka long kum ka khuri ksiar ha ka kti jong nga, ba pynlong ïa ka pyrthei baroh kawei ban buaid. Ki jaitbynriew ki dih ïa ka waiñ bad ki kylla khleh bieit.

⁸ Ka Babilonia kynsan kynsan ka kyllon bad la pynjot noh! To ïam namar jong ka! Pynïoh dawai na ka bynta ki jingmong jong ka, bad lehse yn lah ban pynkhiah.

⁹ Ki nongwei kiba sah hangta ki ong, ‘Ngi la pyrshang ban ïarap ïa ka Babilonia, hynrei ka la dier palat. To ngin ieh ïa ka mynta bad ngin leit phai noh sha ïing. U Blei u la pynshitom ïa ka Babilonia da ka bor jong u baroh bad u la pynjot thiaw ïa ka.’ ”

¹⁰ U Trai u ong, “Ki briew jong nga ki pyrta, ‘U Trai u la pyn-i ba ngi la leh ïa kaba dei. Ïa ngin ïaleit bad ïathuh ïa ki briew jong ka Jerusalem ïa kaei kaba U Trai U Blei jong ngi u la leh.’ ”

¹¹ U Trai u la pynkhih ïa ki syiem jong ka Media, namar u thmu ban pynjot ïa ka Babilonia. Dei da kumta un siew kylliang namar ka jingpynjot ïa ka Templ jong u. Ki rangbah ai hukum ban tur ïaleh, ki hukum, “Pynnep ïa ki khnam jong phi! Pynkhreh ïa ki stieh jong phi!

¹² Ai ïa ka dak ban tur ïaleh ïa ki kynroh jong ka Babilon. Pynkhlaiñ ïa ki nongap! Buh ïa ki nongap phira! Buh ïa ki rangbah ban apthap!” U Trai u la leh ïa kaei kaba u la ong ban un leh ïa ki briew jong ka Babilonia.

¹³ Kata ka ri ka don shibun ki wah bad ka spah kyrhai, hynrei ka por jong ka, ka la kut, bad ïa u ksai jingim jong ka, la pyndkut.

¹⁴ U Trai Badonbor Baroh u la smai da la ka jong ka jingim ba un wallam shibun ki rangbah ban tur ïaleh ïa ka Babilonia kum shi kynhun ki puit, bad kin pyrta da ka jingjop.

Ka jingrwai ainguh ïa U Blei

¹⁵ U Trai u la thaw ïa ka khyndew da ka bor jong u; da la ka jingstad u la thaw ïa ka pyrthei bad pynïar ïa ki bneng.

¹⁶ Ha ka hukum jong u ki um halor ka suiñbneng ki kyrhuh; u wallam ïa ki lyoh na kiba kut ka khyndew. U pynlong ïa ka leilieh ban thaba ha u slap bad u phah ïa ka lyer na ka kamra jingkynshew jong u.

¹⁷ Ha ka jingïohi ïa kane, ki briew ki long mutlop bad kumba ïap; kito kiba shna ïa ki bleithaw ki lyngngoh ngaiñ namar ki blei ba ki shna ki long kiba shu thok bad khlem jingim.

¹⁸ Kim dondor bad dei ban ñiewbeiñ ïa ki; ïa ki yn sa pynjot haba U Trai u wan ban leh ïa ki.

¹⁹ U Blei u Jakob um long kum ma ki; dei tang ma u uba la thaw ïa kiei kiei baroh, bad u la jied ïa ki Israel ban long ki briew jong u hi. U Trai Badonbor Baroh long ka kyrteng jong u.

U tyrnem jong U Trai

²⁰ U Trai u ong, “Ko Babilonia, pha long u tyrnem jong nga, ka atiar jong nga ha ka thma. Nga la pyndonkam ïa pha ban ïuhroit ïa ki jaitbynriew bad ïa ki hima,

²¹ ban pynkhynñiuh ïa ki kulai bad ïa ki nongshong kulai, ban pynkhynñiuh ïa ki kali ïapom bad ïa ki nongñiah jong ki,

²² ban pynïap ïa ki shynrang bad ïa ki kynthei, ban pynïap ïa kiba la tymmen bad ïa kiba dang samla, ban pynïap ïa ki khynnah shynrang bad ki khynnah kynthei,

²³ ban pynïap ïa ki nongaplangbrot bad ki kynhun langbrot jong ki, ban pynïap ïa ki nonglur bad ïa ki kulai jong ki, ban ïuhroit ïa ki nongsynshar bad ki rangbah synshar ba-halor.”

Ka jingpynshitom ïa ka Babilonia

²⁴ U Trai u ong, “Phin ïohi ïa nga ba nga siew kylliang ïa ka Babilonia bad ïa ki briew jong ka na ka bynta ka jingsniew baroh kaba ki la leh ïa ka Jerusalem.

²⁵ Ko Babilonia pha long kum u lumbah uba pynjot ïa ka pyrthei baroh kawei, hynrei ma nga, U Trai, nga long u nongshun jong pha. Ngan shim noh ïa pha, pynmadan ïa pha ha ka khyndew, bad ieh ïa pha ha u dpei.

²⁶ Yn ym don ki maw na ki jingjot jong pha ba yn pyndonkam pat na ka bynta ki jingtei. Phan long kum ka ri shyiap junom. Ma nga, U Trai, nga la kren.

²⁷ “To ai ïa ka dak ban tur ïaleh! Put ïa ka turoi khnang ba ki jaitbynriew kin ïohsngew! Pynkhreh ïa ki jaitbynriew na ka bynta ka thma pyrshah ïa ka Babilonia! Ong ïa ki hima Ararat, Minni, bad Ashkenas ban tur ïaleh. Thung ïa u rangbah pynïaidkam ban ïalam ïa ka jingtur ïaleh. Wallam ïa ki kulai kum ka kynhun ki puit.

²⁸ Pynkhreh ïa ki jaitbynriew na ka bynta ka thma pyrshah ïa ka Babilonia. Phah ïa ki syiem ka Media, ïa ki nongïalam bad ki rangbah synshar jong ki, bad ki kynhun shipai jong ki ri baroh kiba ki synshar.

²⁹ Ka khyndew ka kyiuh bad ka khynñiuh namar ba U Trai u pyndep ïa ka jingthmu jong u ban pynlong ïa ka Babilonia ka ri shyiap, ha kaba yn ym don mano mano ban shong ban sah.

³⁰ Ki shipai Babilonia ki la sangeh ban ïaleh bad ki sah ha ki kut jong ki. Ki la duh noh ïa ka jingshlur jong ki bad ki la long kum ki kynthei. Ïa ki khyrdop jong ka nongbah la pynpra, bad ki ïing ki don ha ka jingpluh.

³¹ U nonglamktien uwei hadien uwei u mareh ban ïathuh ha u syiem ka Babilonia ba ïa ka nongbah jong u la pynpra na baroh ki liang.

³² U nongshun u la kurup ïa ka jaka ba jam ïa ka wah bad u la thang ïa ki kut. Ki shipai Babilonia ki la lamwir.

³³ Shen u nongshun un ot ïa ki bad un ïuhroit ïa ki kum u kew ha ka jaka tylliat kew. Ma nga, U Trai Badonbor Baroh, U Blei jong ki Israel, nga la kren.”

³⁴ U syiem ka Babilonia u la pynkut ïa ka Jerusalem bad bam ïa ka. U pynthylli ïa ka nongbah kum ïa u khra; kum u mrad kynsha u la nguid ïa ka. U la shim kat ïa kaba u kwah bad bret noh ïa kiba sah.

³⁵ To ai ba ki briew ka Seïon kin ong, “To ai ba ka Babilonia kan kitkhlieh na ka bynta ka jinglehbor halor jong ngi!” To ai ba ki briew ka Jerusalem kin ong, “To ai ba ka Babilonia kan kitkhlieh na ka bynta kaei kaba ngi la shahshitom!”

U Trai un ïarap ïa ki Israel

³⁶ Bad U Trai u la ong ïa ki briew ka Jerusalem, “Ngan shimti na ka bynta jong phi bad ngan pynlong ïa ki nongshun jong phi ba kin hap siew ïa kaei kaba ki la leh ïa phi. Ngan pynrngad ïa ki tyllong um jong ka Babilonia bad ngan pynlong ïa ki wah jong ka ban tyrkhong.

³⁷ Kata ka ri kan long kum ka kynton ñiut ha kaba ki mradkhlaw ki im. Kan long kaba shyrkhei ban peit; yn ym don mano mano ban sah hangta, bad baroh kiba ïohi ïa ka kin sngewshyrkhei.

³⁸ Ki nong Babilonia baroh ki kyrhuh kum ki sing bad jlew kum ki khun sing.

³⁹ Hato ki jlawnguid? Ngan pynkhreh ïa ki ka jingkhawai bad pynlong ïa ki ban buaid bad sngewtynnat. Kin ïohthiah bad kin ym kyndit shuh.

⁴⁰ Ngan ïalam ïa ki ban shah pynïap, kum ki khunblang, ki blang, bad ki langbrot shynrang. Ma nga, U Trai nga la kren.”

Ka kupar jong ka Babilon

⁴¹ U Trai u ong shaphang ka Babilon: “Ïa ka nongbah kaba ka pyrthei baroh kawei ka la ïaroh la kurup ïa ka! Katno kaba itriem ban ïohi ba ka Babilon ka la long ïa ki jaitbynriew!

⁴² Ka duriaw ka la tyllep ïa ka Babilon bad tap da ki jingat phyllung bakyrhuh.

⁴³ Ki shnong ki la long kiba ishyrkhei ban peit bad ki long kum ka ri shyiap bym don um, ha kaba ym don ba sah lane wat ban ïaid nangta.

⁴⁴ Ngan pynshitom ïa u Bel, u blei ki nong Babilonia, bad ngan pynlong ïa u ban aiti noh ïa ki tiar jong u kiba shu tuh; ki jaitbynriew kin ym mane shuh ïa u. “Ki kynroh ka Babilon ki la khyllem.

⁴⁵ Ko ki paid Israel, to phet noh nangta! Phet ban lait im na ka jingbitar shla jong nga.

⁴⁶ Wat nym duh noh ïa ka jingshlur ne sheptieng namar ki khubor lamler ba phi ïohsngew. Man ka snem ki khubor lamler bapher ki phriang — ki khubor lamler shaphang ka jinglehbor ha ka ri bad ba uwei u syiem u ïaleh ïa uwei pat.

⁴⁷ Bad ka por ka poi haba ngan leh ïa ki bleithaw jong ka Babilonia. Ïa ka ri baroh kawei yn buh ha ka jinglehrain, bad ïa ki briew jong ka baroh yn pynïap.

⁴⁸ Baroh kiei kiei ha ka pyrthei bad ha suiñbneng kin risa da ka jingkmen ynda ka Babilonia kan kyllon ha ki briew kiba wan na shatei ban pynjot ïa ka.

⁴⁹ Ka Babilonia ka la long ka daw ïa ka jingïap jong ki briew ha baroh kawei ka pyrthei, bad mynta ka Babilonia kan kyllon namar ka la long ka daw ïa ka jingïap jong kiba bun ki Israel. Ma nga, U Trai, nga la kren.”

Ka khubor U Blei ïa ki Israel ba don ha Babilonia

⁵⁰ U Trai u ong ha ki briew jong u kiba don ha Babilonia: “Phi la lait na ka jingïap! Mynta to leit! Wat ap! Wat la phi don jngai na ïing, pyrkhat shaphang jong nga, U Trai jong phi, bad kynmaw ïa ka Jerusalem.

⁵¹ Phi ong, ‘La pynjahburom ïa ngi bad la pynlehrain ïa ngi; ngi sngew ba ngim lah leh ei ei shuh namar ki nongwei ki la shimti noh ïa ki jaka bakhuid ha ka Templ.’

⁵² Te nangta, nga ong ba ka por ka poi ba ngan leh ei ei ïa ki bleithaw jong ka Babilon, bad kiba mynsaw kin ud ha ka ri baroh kawei.

⁵³ Wat la ka Babilon ka lah ban kiew sha suiñbneng bad tei ka kut baskhem hangta, ngan dang ïai phah hi ïa ki briew ban pynjot ïa ka. Ma nga, U Trai nga la kren.”

Ka jingpynjot shuh shuh ïa ka Babilon

⁵⁴ U Trai u ong, “To shahshkor ïa ka jingsawa ka jingïam ha Babilon, jong ka jingïam pangnud namar ka jingpynjot ha ka ri.

⁵⁵ Nga pynjot ïa ka Babilon bad nga pynsngap jar ïa ka. Ki kynhun shipai ki tur shapoh kum ki jingat phyllung bakyrhuh bad tur ïaleh da ki jingpyrta bajam.

⁵⁶ Ki la wan ban pynjot ïa ka Babilon; ïa ki shipai jong ka la kem, bad ïa ki ryntieh jong ki la kdiah. Nga long U Blei uba pynshitom ïa kaba sniew, bad ngan leh ïa ka Babilon kumba ka dei hok ban ïoh.

⁵⁷ Ngan pynbuaid ïa ki nongsynshar jong ka — ki rangbah kiba stad, ki nongïalam, bad ki shipai. Kin ïohthiah bad kin ym kyndit shuh. Ma nga u syiem, nga la kren. Nga long U Trai Badonbor Baroh.

⁵⁸ Ïa ki kynroh bakhlaiñ jong ka Babilon yn pyntwa haduh khyndew, bad ïa ki khyrdop bajrong jong ka yn thang noh. Ka jingtrei jong ki jaitbynriew baroh kam long ei ei; ki jingpyrshang jong ki, ki kut ha ka ding. Ma nga, U Trai Badonbor Baroh nga la kren.”

La phah ïa ka khubor jong u Jeremaïah sha Babilonia

⁵⁹ U nongsumar ïa u syiem Sedekaïah u dei u Seraïah, u khun jong u Neraïah bad u ksiew jong u Mahseïah. Ha ka snem kaba saw ba u Sedekaïah u long u syiem ka Judah, u Seraïah u dang leit sha Babilonia bad u, bad nga la ai ha u katto katne ki jingbthah.

⁶⁰ Nga la thoh ha ka kot ïa ka jingthoh shaphang ka jingpynjot baroh ka ban wan hap ha Babilonia, ryngkat bad kine baroh kiei kiei kiwei pat shaphang ka Babilonia.

⁶¹ Nga la ong ïa u Seraïah, “Haba men poi ha Babilon, pynthikna ban pule jam ha ki briew ïa kiei kiei baroh ba la thoh hangne.

⁶² Nangta sa duwai, ‘A Trai, me la ong ba men pynjot ïa kane ka jaka, haduh ba yn ym don jingthaw ba im ha ka, u briew lane u mrad, bad ba kan long kum ka ri shyiap junom.’

⁶³ Ko Seraïah, ynda me dep ban pule ïa kane ka kot ha ki briew, nangta sa teh ïa ka ha u maw bad bret ïa ka ha ka wah Ïuphratis bad ong,

⁶⁴ ‘Kane ka long kaei ka ban jia ïa ka Babilonia — kan ngam bad kan ym lah khie shuh, namar ka jingpynjot ba U Trai un wallam ha ka.’ ” Ki ktien jong u Jeremaïah ki kut hangne.